Dy shtetas të kërkuar ndërkombëtarisht për vepra të rënda penale, kryesisht trafikim të lëndëve narkotike, janë arrestuar nga Policia e Durrësit në kuadër të një operacioni të koduar “Implikimi”.
Të arrestuarit janë identifikuar si Enkelet Avduli, 46 vjeç, dhe Sadik Kasa, 38 vjeç.
Sipas njoftimit zyrtar të policisë, arrestimet u realizuan pas koordinimit të informacioneve dhe veprimeve operacionale me partnerët ndërkombëtarë në Itali dhe Spanjë, me qëllim lokalizimin dhe kapjen e dy personave të shpallur në kërkim.
Avduli u arrestua teksa lëvizte me automjet në aksin rrugor Rrogozhinë–Peqin. Ai ishte shpallur në kërkim nga autoritetet italiane, pasi Gjykata e Apelit e Bolonjës e ka dënuar me 7 vite, 5 muaj dhe 9 ditë burgim për veprat penale trafikim të lëndëve narkotike, armëmbajtje pa leje dhe kanosje.
Ndërkohë, Kasa u kap në fshatin Sukth i Ri, pasi ndaj tij autoritetet gjyqësore në Madrid kishin caktuar masën e sigurisë “Arrest në burg” për veprat penale trafikim të lëndëve narkotike dhe pjesëmarrje në organizatë kriminale me qëllim tregtimin e drogës.
Policia bën me dije se Interpol Tirana, në bashkëpunim me autoritetet italiane dhe spanjolle, vijon procedurat për ekstradimin e dy shtetasve.
