Tinka Kurti, një emër me një kontribut të madh në kinematografinë shqiptare, sot jeton në një shtëpi për të moshuarit.
Në një videomesazh për Laert Vasilin në Big Brother VIP, Tinka Kurti rrëfeu se ndodhet në një azil në Tiranë, ku po kalon vitet e fundit të jetës së saj.
“Kam pasur shumë probleme. Kam pasur fatin tjetër që erdha në këtë shtëpi që e shihni ju, që është një mrekulli, por për mua ishte një tragjedi. Doja që të ikja sa më parë, por tani nuk them se dua të ik sepse ka njerëz të mrekullueshëm. Këtu ka njerëz të mrekullueshëm dhe ambient shumë të bukur. Më vjen shumë mirë kur iu kushtoheni shumë artistave, sepse jemi të numëruar në jetë tani. Ja na iku Margarita. Na la një dhimbje të madhe. Për mua ka qenë tronditje e madhe, sepse unë kam fituar nga ajo. Ne jemi artistë që i kemi shërbyer popullit, do i shërbejmë këtij kombi deri sa të kem i frymën e fundit”, tha ajo.
Tinka Kurti është një nga aktoret më të njohura dhe të vlerësuara shqiptare, me një karrierë që shtrihet mbi 60 vjet në teatër dhe kinematografi.
Gjatë karrierës së saj, ajo ka luajtur në mbi 50 filma artistikë, duke përfshirë rolet si Nëna Pashako në “Yjet e netëve të gjata”, Nëna në “Çifti i lumtur”, Sinjorina Mançini në “Vajzat me kordele të kuqe” dhe Gjyshja në “Zemra e Nënës”.
Djali i vetëm i Tinka Kurtit, Zef Kurti, ndërroi jetë në vitin 2018 si pasojë e një arresti kardiak./ Zoom.al
