Nga sot, kalimi në tunelin e Llogarasë është me pagesë.

Pas dy sezonesh verore ku kalimi ishte pa tarifë, tashmë përdoruesit e mjeteve duhet të paguajnë, pas publikimit në Fletoren Zyrtare të çmimeve për secilën kategori mjetesh.

Skema e pagesës është ndarë në 5 kategori automjetesh:

• Motoçikletat dhe mjetet me dy rrota: 100 lekë
• Automjetet me dy boshte dhe lartësi deri 1.30 m (makina pasagjerësh dhe automjete të lehta shpërndarjeje): 250 lekë
• Automjetet me më shumë se dy boshte dhe lartësi deri 1.30 m (makina pasagjerësh me rimorkio, automjete të lehta shpërndarjeje me rimorkio): 500 lekë
• Automjetet me dy ose më shumë boshte dhe lartësi mbi 1.30 m (furgonë, minibusë, automjete të mesme): 1,000 lekë
• Mjetet e rënda me tre ose më shumë boshte dhe lartësi mbi 1.30 m (autobusë, kamionë me shumë rimorkio): 5,000 lekë

Pra, vetëm për një rrugë kalimi në tunel, tarifat e përcaktuara nga Belinda Balluku dhe Petrit Malaj arrijnë deri në 5 mijë lekë. Nëse i njëjti mjet (autobus, kamion) do të bëjë edhe rrugën e kthimit duke u futur në tunelin e Llogarasë, kostoja do të shkojë 10 mijë lekë.

Tuneli i Llogarasë është një vepër infrastrukturore e sulmuar shpesh nga opozita dhe nën hetim nga SPAK.

Kostoja e ndërtimit të tunelit ka kapur vlerën mbi 260 milion €, ku janë zhvilluar disa procedura tenderimi, ku ekspertët kanë ngritur  dyshime për korrupsion dhe konflikt interesi. 

Ndërtimi i tunelit nisi më 15 nëntor 2021, pas shpalljes së një gare tenderuese që u fitua nga një konsorcium turk i përbërë nga dy kompani: “Intekar Yapi” dhe “Asl Insaat”. Por tenderi mbart “flamur të kuq” për garë të pandershme, sipas Open Procurement Albania./ Zoom.al

Postime të lidhura

• 
  Rihapet tuneli i Llogarasë, pa pagesë gjatë sezonit veror
• 
  Tuneli i Llogarasë do të bëhet me pagesë, ja sa do të jetë tarifa