Në fund të majit të kaluar, Klose, në një festë të klubit bardhekaltër, deklaroi se ishte larguar nga kjo skuadër pasi nuk i ishte ofruar kurrë rinovimi, ndërsa ish-drejtori sportiv, Igli Tare, u shpreh në lidhje me këto deklarata se nuk është e thënë se pas një futbollisti të madh të jetë një njeri i madh (kuptohet, referenca ishte për Klosen).

Në një prononcim të fundit për “Il Messaggero”, ish-sulmuesi i kombëtares gjermane iu kthye sërish kësaj teme.

“Nuk dua të bëj polemika, thjesht thashë që nëse një klub vendos të ndërpresë një marrëdhënie me një lojtar, duhet t’i tregosh paraprakisht e jo të presësh ditën e fundit siç ndodhi me mua, Lulic, Maurin, Bizzarrin, lista është e gjatë…”.

Më pas sulmuesi gjerman evidentoi vlerat e Tares për merkaton: “Kur nuk më komunikuan asgjë, mora vendimin të ndalesha dhe të largoja shqetësimin, por e tregova historinë time që këto keqkuptime të mos përsëriten në të ardhmen, që të ndryshojë mmetoda e punës te Lazio. U ndamë keq, sepse Tare nuk është një person që i thotë gjërat në fytyrë, por duhet pranuar që ka bërë një punë të madhe te Lazio, më mori mua dhe shumë talente si Felipe Anderson dhe Milinkovic”, tha Klose. /zoom.al/