Fluturimet në dy nga aeroportet më të ngarkuara në botë, në Doha dhe Dubai, u ndërprenë të hënën, duke shkaktuar kaos për mijëra udhëtarë që mbetën të bllokuar për orë të tëra.
Mbyllja e përkohshme e hapësirës ajrore të disa vendeve të Gjirit pasoi një sulm iranian ndaj një baze ushtarake amerikane në kryeqytetin e Katarit, Doha.
Katari, Bahreini dhe Kuvajti mbyllën hapësirat e tyre ajrore si masë sigurie, duke detyruar linjat ajrore të anulojnë ose devijojnë qindra fluturime. Aeroportet e Dubait pezulluan gjithashtu përkohësisht shërbimet e tyre, duke përkeqësuar situatën, raporton “Reuters”.
Sipas të dhënave të “FlightRadar24”, në Aeroportin Ndërkombëtar Hamad në Doha u anuluan rreth 250 fluturime, ndërsa 238 të tjera u vonuan. Në Aeroportin Ndërkombëtar të Dubait, rreth 145 fluturime u anuluan dhe më shumë se 450 u vonuan.
Pamjet dhe dëshmitë nga terreni tregojnë radhë të gjata dhe tension në rritje mes udhëtarëve. “Nuk kam fjetur për 19 orë dhe kam pritur në këtë radhë për më shumë se nëntë orë”, tha Lily Rogers, një 21-vjeçare nga SHBA, që ndodhej në Aeroportin e Dohas. Sipas saj, pasagjerëve u ofrua vetëm ujë, ndërsa përleshje të vogla shpërthyen në radhët e gjata 200 metra.
Nga ana tjetër, “Qatar Airways” bëri të ditur se po bën përpjekje për të rivendosur orarin normal të fluturimeve, me ndërprerje të mundshme që mund të zgjasin deri më 26 qershor. Aeroportet e Dubait dhe autoritetet lokale nuk kanë dhënë ende një koment zyrtar për situatën.
