Emmanuel Macron duhet të emërojë një kryeministër për të shtyrë përpara buxhetin dhe më pas të thërrasë zgjedhje të parakohshme presidenciale për të zgjidhur krizën politike në Francë, ka deklaruar ish-kryeministri i tij i parë.
Komentet e Édouard Philippe vijnë pasi kryeministri i tretë i Francës brenda një viti, Sébastien Lecornu, dha dorëheqjen të hënën, pasi përpjekja e tij për të formuar një qeveri dështoi.
Macron i ka kërkuar atij të hartojë një plan të fundit për stabilitet deri në fund të së mërkurës – por duket se mbështetja për presidentin francez po bie, madje edhe mes aleatëve të tij.
Philippe, i cili ka qenë kryeministër nga viti 2017 deri në 2020 dhe tani drejton partinë centriste Horizons, tha se “nuk ishte në favor të dorëheqjes së menjëhershme dhe të papritur” të presidentit, por se i takon atij të përmbushë mandatin që i është dhënë.
Deri tani, presioni ndaj presidentit francez 47-vjeçar për të dhënë dorëheqjen ka ardhur kryesisht nga kundërshtarët e tij politikë në të majtën radikale dhe të djathtën ekstreme.
Por ndërhyrjet publike nga aleatët e tij tregojnë sa serioze është bërë kriza politike.
Macron, i cili është në detyrë që nga viti 2017, u filmua të hënën duke ecur i vetëm përgjatë lumit Senë në Paris, i ndjekur nga truprojat e tij, ndërsa kriza më e fundit politike përfshinte presidencën e tij.
Burime pranë presidentit kanë bërë të ditur se ai do të “marrë përgjegjësinë” nëse bisedimet e fundit të Sébastien Lecornu për stabilitetin dështojnë – megjithëse nuk u saktësua se çfarë do të nënkuptonte kjo.
Blloku centrist i Macron-it humbi shumicën parlamentare pasi ai thirri zgjedhje të parakohshme parlamentare, si reagim ndaj një disfate në zgjedhjet për Parlamentin Evropian vitin e kaluar./Zoom.al
“ChatGPT më çoi në prag të vdekjes”, 55-vjeçari padit OpenAI për këshillat mjekësore
