Dy kulla të reja do t’i shtohen qendrës së Tiranës. Njëra do të ngrihet në rrugën Ibrahim Rugova, përballë Kishës Ortodokse dhe në krah të Shtëpisë me Gjethe, ndërsa tjetra në bulevardin Zhan D’Ark, mes Kishës Katolike dhe selisë së Partisë Demokratike, buzë Lanës (SHIKO HARTEN ME POSHTE NE ZOOM.AL).
Të dyja do të ndërtohen mbi truallin e godinave ekzistuese të Bankës Kombëtare Tregtare (BKT). Zoom.al kishte raportuar më parë për projektin e një kulle në zyrat e mbyllura të BKT në bulevardin Zhan D’Ark, e cila u konfirmua edhe nga një burim zyrtar i BKT.
Kjo ishte edhe një prej aryseve përse BKT i transferoi zyrat qëndrore në afërsi të qendrës tregtare Tirana East -Gate, TEG, në Lundër.
Zoom.al mësoi nga një burim se BKT mund t’i financojë vetë dy projektet, ose mund t’i japë me përqindje.
Për të hedhur dritë mbi projektet dhe mënyrën e financimit të tyre, Zoom.al iu drejtua me disa pyetje Bankës Kombëtare Tregare, por nuk mori përgjigje.
BKT nuk iu përgjigj pyetjeve nëse do t’i ndërtojë vetë kullat apo do t’i japë ato me përqindje dhe a përbëjnë të dyja rastet një aktivitet normal bankar?
Kjo nuk është hera e parë që BKT shmang përgjigjet mbi financimet e saj. E pyetur pak kohë më parë nga Zoom.al nëse po financon direkt ose indirekt në kompani të lidhura me pronarin, për kredi që ai ose palë të lidhura me të kanë marrë në bankën me pronar “Çalik Holding”, ajo dha një përgjigje evasive, duke anashkaluar pikërisht sqarimet mbi financimet.
“BKT financon vetëm kompani të cilat kanë vendin e rezidencës në Shqipëri, të cilat mund të kenë pronarë vendas ose të huaj”, -tha BKT.
Banka Kombëtare Tregtare pranon blerjen e bondeve ruse të konsideruara me risk të lartë
Përsa u përket projekteve të dy kullave në godinat e saj, nuk është e qartë nëse në këtë aktivitet BKT ka hyrë para apo pas humbjes së shumave të mëdha të parave në tregun rus, pasi ajo kishte investuar në bonde ruse, të cilat konsiderohen me risk të lartë. /Zoom.al
