Në një intervistë në “Vizion Plus”, Osmani tha se e shtuna do të sjellë një përmirësim të kushteve të motit, por e diela do të rikthejë rrebeshet dhe reshjet e shiut.

“Kjo javë ka sjellë atë që i thonë “Plakat e Prillit”. Kemi pasur reshjet e shiut herë pas herë në formën e rebesheve, kemi pasur shfaqje të flokëve të dëborës në qytetet e zonave malore. Po ashtu kemi pasur një rënie të ndjeshme të rënieve të temperaturave të ajrit.

Sot do të kemi mbizotërim të vranësirave të dendura, reshjet e shiut do të jenë të pakta në zonat veriore dhe qendrore, ndërsa në zonat jugore kemi reshje të pakta. Pjesa e dytë e ditës është ajo që do të sjellë zhvillime të vranësirave, duke bërë që në zonat jugore të kemi rebeshe të reshjeve të shiut. Më të prekura pritet të jenë qarku i Vlorës dhe i Gjirokastrës.

Temperaturat e ajrit orët e para të mëngjesit mbeten të ulëta, maksimumet mbeten në vlerat 20-21 gradë Celsius

Dita e shtunë sjell përmirësim të kushteve të motit. Do të kemi mbizotërim të kthjellimeve, kalime të pakta të vranësirave, që më të dukshme do të jenë në pjesën e dytë të ditës. Temperaturat e ajrit do të kenë rritje si në vlerat minimale, ashtu edhe në ato maksimale, duke bërë që minimumet të shkojnë në vlerën 0-1 gradë Celsius, ndërsa maksimumet 22 gradë Celsius.

Dita e diel sjell ndryshim të menjëhershëm të kushteve të motit. Do të kemi rrebeshe shiu në një pjesë të madhe të territorit shqiptar dhe në zonat malore reshje dëbore. Kjo vjen si pasojë e rënies së temperaturave të ajrit gjatë orëve të vona të mbrëmjes”, tha meteorologu.

Pas të dielës, sipas Osmanit, moti i mirë do të na shoqërojë gjatë të hënës dhe të martës, ndërsa të mërkurën do të bëjë sërish “kthesë”.

“Dita e hënë dhe e martë sjellin përmirësim të kushteve të motit, duke bërë që të kemi intervale të gjata me diell, më të dukshme në Ultësirën Perëndimore. Pasditet sjellin kalime të lehta të vranësirave, më të dukshme bëhen ditën e martë, pasi ka sinjale që mesjava të sjellë sërish reshjet. Do të kemi një rritje të menjëhershme të temperaturave të ajrit, duke bërë që maksimumet ditën e hënë të jenë rreth vlerës 22 gradë Celsius, kurse e marta do të sjellë një rritje me 3 gradë Celsius”, tha Hakil Osmani.