Day ArchivePërplasje e ashpër mes Nokës dhe Bidos në Kuvend: Gjipeja do të jetë varri yt politik

Seanca maratonë në Kuvend është shoqëruar me debate të forta dhe tone të larta mes deputetit të Partisë Demokratike, Flamur Noka, dhe atij të Partisë Socialiste, Ardit Bido, lidhur me çështjen e pronave në Gjipe.

Gjatë fjalës së tij nga foltorja, Noka akuzoi Bidon se është “ideatori i një falsifikimi” që synon, sipas tij, vjedhjen e 22 hektarëve tokë në Gjipe.

Ai e ironizoi se “lepuri fle në Gjipe” dhe se “gjumi i prishur nuk zgjidhet me kostum e poza”.

Noka: Kur të vijë çështja e Gjipesë ngrije dorën ti, ai do jetë varri yt ligjor dhe politik. Gjipeja, pusho! Të pickova ku të dhemb fort. E di ti ku fle lepuri. Lepuri fle në Gjipe. Aty te 22 hektarët, por mos kujto se kreu i narkos do jetë i gjatë. Jo, jo, ajo Gjipeja do të bëhet makthi yt. 

Sepse ti ke urdhëruar dhe je hartues i një falsifikimi, ideatori i vjedhjes së pronës së himariotëve. E di që e ke gjumin e prishur, e mbaj mend kur qaheshe të unë të të ndihmoja me ndonjë punë e betoheshe se ishe i PD-së. Të njoh mirë, Ja është dëshmitar Bujari dhe Shpëtim Idrizi ishe gati të fshije këpucët, nuk ta zgjidh dot hallin. Gjipeja s’do të lësh të flesh gjumë deri kur të shkosh te vendi. Ka shumë socialistë këtu por nuk preken se lugën e çorbës nuk e kanë ngrënë të gjithë.

Bido: Opozita të mos flasë për historinë e kombit se na e bën pis. Më kujtohet në zgjedhjet e kaluara sesi kandidati shënonte ‘flamuris nokas’. Nuk pres të dijë as kush e ka ngritur flamurin e as ku e ka ngritur Flamurin. Sa bën kostumi yt sot, është pasuria ime sot. 

I bie në moshën 14-vjeçare sipas Nokës kam futur një dokument. Sa i përket asaj që kam kërkuar punë te ti, që në moshën 19-vjeçare kam marrë 1 mln lekë. Diferenca është të jesh i pasur pa punuar asnjë ditë.

Braçe kritika për buxhetin: Pensionet të turpshme, duhet një reformë e plotë

Deputeti i Partisë Socialiste, Erion Braçe, ka kritikuar skemën aktuale të pensioneve me të cilin kryeministri Edi Rama ka rrahur gjoksin prej muajsh, duke e cilësuar atë “një çështje që bën me turp cilindo”.

I ftuar në emisionin “Top Story”, Braçe tha se, edhe pse buxheti i shtetit për vitin e ardhshëm është i ndërtuar mirë dhe ruan një ekuilibër pozitiv mes investimeve dhe deficitit, sistemi i pensioneve ka nevojë për një reformë të thellë dhe afatgjatë.

Deputeti socialist nënvizoi se reforma duhet të realizohet që në vitin e parë të mandatit pas zgjedhjeve, duke theksuar se zvarritja e saj ka sjellë një situatë të padrejtë për qytetarët që kanë punuar gjithë jetën.

“Sa i takon buxhetit të shtetit. Do thoja vërejtje time. Ai është i ndërtuar mirë. Investimet janë më të mëdha se deficit. Jemi në një suficit të lehtë primar që i thotë të gjithë qytetarëve që nuk po i bëhen barrë. Nga pikëpamja e politikave është i ndërtuar mirë. Çështja e pensioneve bënë me turp cilindo. Duhet një balancë. Më vjen mirë që ka kthjelltësi buxheti dhe qeveria.

Është më shumë se sa një shpërblim i një viti. Patjetër kjo nuk duhet të zv. një reformë të plotë të skemës së pensioneve. Duhet bërë në vitin e parë të mandatit pas zgjedhjeve. U bë shumë gjatë që jemi në qeveri. Këtu vijmë te sikleti.

Në qoftë se do flisja për paketë fiskale, korrektim sa të mundem të ligjit të paqes fiskale me shpërblim, kur ligji për tatimin mbi vlerën e shtuar duhet përmbysur totalisht. Një bujk nuk do të kompensohet n.q.s. shet te një biznes i vogël, n.q.s. e shet në tregjet publike prap nuk kompensohet, duhet ta çojë te një grumbullues. Fitues mund të jen të gjithë që regjistrohen në tatime”, tha Braçe.

Lista e mbyllur e PD-së, Salianji: U bënë deputetë ata që rrinë me shumë në kafe

Ish-deputeti i Partisë Demokratike, Ervin Salianji, ka kritikuar listën e mbyllur të PD-së për zgjedhjet e 11 majit, duke akuzuar drejtuesit e partisë se kanë përjashtuar nga lista përfundimtare kandidatët që dolën fitues nga primaret në disa qarqe.

I ftuar në emisionin “Opinion”, Salianji tha se vendimmarrjet e fundit kanë shkatërruar entuziazmin që demokratët kishin ndërtuar gjatë procesit të primareve dhe se, sipas tij, PD po humbet kontaktin me bazën.

Salianji shtoi se strukturat e PD janë demotivuara nga mungesa e transparencës dhe se 7 muaj pas zgjedhjeve, deputetët demokratë nuk janë takuar me qytetarët që i votuan.

Salianji: Unë kam bërë reagim publik nga burgu. Lista e PD-së, e ka shfryrë të gjithë entuziazmin që krijoj edhe ardhja e Chris LaCivita. Doni t’jua them unë se cili ka qenë problemi, që nuk po e themi, nuk po thuhen hapur, qartë dhe troç. Unë po shpreh shqetësimet e demokratëve. U bën primaret, u vendos që kandidatët për deputet do të zgjidheshin me primare, u zgjodh i pari Tiranës deputet? Jo.

U zgjodh ai që doli i pari në Dibër, në Kukës, në Elbasan? Jo. U zgjodh deputetet ajo zonja që doli e para në Fier? Këta nuk i ke as në listë të hapur as në listë të mbyllur.

Cili ka qenë kriteri për të qenë deputet? Kush rri më shumë në kafe, apo kush rri më shumë në zyre? Po ma gjetët ju një parim, dakord janë. Unë mendoj se ky është problemi. O vendosim kriter votën, ose përgjegjësinë që ka lidershipi që i vendos. Aleancat kush i vendosi?  A ka m reaguar unë që aty? Ka reaguar çdo njeri që ka qenë në garë, kanë dalë në publik. Kanë thënë që unë kam marrë votat. Disa të nënës, disa të njerkës.

Vijmë te një element që është thelbësor, demotivohet struktura kur ne themi një gjë dhe bëjmë një tjetër. Do i them hapur. A ka mundësi që në parti politike të shmang të mos takojë njerëz që janë bërë copash për të mbledh vota. Struktura nuk ka takuar njëri. Keni parë ju të bëjnë ndonjë takim atje ku isha në Durrës 7 muaj pas zgjedhjeve? Asnjë s’ka bërë.

AKU kthen ngarkesën me misër nga Serbia, tjetrën e bllokon për asgjesim

Dy ngarkesa me misër, me origjinë nga Serbia, janë kapur nga Autoriteti Kombëtar i Ushqimit në doganë pasi kanë rezultuar me Aflatoksinës B1.

Një prej ngarkesave është kthyer mbrapsht në vendin e origjinës, ndërsa tjetër është bllokuar në ambientet e subjektit për t’u agjesuar.

Dy ngarkesat me misër u futën në vendin tonë përmes pikës kufitare të Hanit të Hotit.

Kujtojmë se në të njëjtën pikë kufitare në muajin nëntor u bllokuan 25 tonë misër po nga Serbia, për të njëjtën prani në të, Aflatoksinën B1, e cila prodhohet nga myku.

“Autoriteti Kombëtar i Ushqimit, në vijim të transparencës dhe informimit të publikut dhe në zbatim të legjilacionit në fuqi bën me dije se bazuar Planit Vjetor të Kontrolleve Zyrtare, në Pikën Inspektimit Kufitar Hani Hotit ka kryer mostrimin në dy ngarkesa me misër, ushqim për kafshë, origjina Serbi, të cilat pas kryerjes së analizimit laboratorik, janë konfirmuar me prani të Aflatoksinës B1.

Informojmë se njëra nga ngarkesat, është kthyer në vendin e origjinës, ndërsa ngarkesa tjetër është bllokuar në ambientet e subjektit me destinacion asgjësimin.

AKU garanton opinionin publik se çdo produkt ushqimor i importuar, i nënshtrohet kontrolleve rigoroze për të garantuar produkte të sigurta ushqimore në mbrojtje të shëndetit të konsumatorëve”, thuhet në njoftimin e AKU-së për mediat.

Washington Examiner: Rama, përfitues i drejtpërdrejtë i aktivitetit të krimit të organizuar shqiptar

NGA Washington Examiner

Pse po duket se administrata Trump është dakord që udhëheqësi i një aleati të NATO-s të veprojë si partner i pastrimit të parave të kartelit të drogës Sinaloa të Meksikës?

Presidenti Donald Trump e ka bërë luftën kundër drogës së paligjshme në Shtetet e Bashkuara një përparësi kryesore të mandatit të tij të dytë. Por Trump duhet të pranojë se perandoria globale e trafikimit të drogës përfshin aleatë nominalë amerikanë, si dhe armiq të dukshëm si diktatori venezuelian Nicolas Maduro.

Po i kushtohet shumë vëmendje presionit në rritje të Trump ndaj Maduros për lehtësimin e tij të kontrabandës masive të drogës në SHBA. Dhe ndërsa do të ishte një gabim që Trump të largonte ushtarakisht Maduron nga pushteti, Trump ka autoritetin, dhe ka të drejtë, për të përdorur forcën ushtarake kundër karteleve të drogës që veprojnë brenda dhe jashtë Venezuelës. Megjithatë, nëse ai është serioz në lidhje me goditjen e karteleve, Trump do të duhet të rrisë ndjeshëm presionin mbi një aleat të veçantë të NATO-s: Shqipërinë.

Me Edi Ramën kryeministër, Shqipëria është sot kryeqyteti i padiskutueshëm i trafikimit të drogës në Evropë. Mafia shqiptare shfrytëzon aksesin në portet më të mëdha të Evropës dhe kontrollon disa nga tregjet më fitimprurëse të drogës në kontinent, siç është ai i Londrës. Ajo ka një fokus të veçantë në trafikimin dhe shpërndarjen e kokainës, por është gjithashtu e përfshirë në trafikimin e armëve dhe detyrimin e grave të reja në tregun seksual. Këto grupe kriminale përdorin dhunë ekstreme për të dominuar tregjet kriminale dhe për t’iu shmangur përpjekjeve qesharake të zbatimit të ligjit evropian për t’i ndaluar ato. Por, ndërsa ai ndihet rehat duke bërë shaka miqësore me homologët e tij të NATO-s dhe Bashkimit Evropian, burime të shumta të inteligjencës dhe sigurisë amerikane i kanë thënë Washington Examiner se Rama është një përfitues i drejtpërdrejtë i aktivitetit të krimit të organizuar shqiptar. Ekzistojnë gjithashtu prova publike në rritje për fajësinë e Ramës.

 Futet në lojë Luftar Hysa. Udhëheqësi i familjes së krimit të organizuar Hysa në Shqipëri, Luftar e paraqet veten si një biznesmen i cilësuar padrejtësisht si një gangster. Realiteti, përsëri, siç i kanë thënë Washington Examiner burime të shumta të inteligjencës dhe zbatimit të ligjit, është se Luftar është një nga pastruesit kryesorë të parave për Kartelin Sinaloa.

Karteli Sinaloa është karteli i dytë më i fuqishëm i Meksikës, i cili vetëm kohët e fundit e humbi iniciativën ndaj Kartelit të Gjeneratës së Re të Jaliscos. Edhe pse është i rrethuar nga një luftë e brendshme midis ndjekësve të Joaquín “El Chapo” Guzmán dhe Ismael “El Mayo” Zambada García, i burgosur në SHBA, subjektet e Kartelit Sinaloa ruajnë një shtrirje dhe pushtet të jashtëzakonshëm. Ata janë përgjegjës për sasi vërtet të mëdha kontrabande droge përtej kufirit SHBA-Meksikë çdo vit. Karteli Sinaloa gjithashtu mban lidhje të ngushta me anëtarë të lartë të Partisë Morena të Presidentes Meksikane Claudia Sheinbaum. Për të pasuruar udhëheqësit e tyre dhe mundësuesit e korruptuar politikë-zbatues të ligjit-ushtarak, kartelet duhet të kontrabandojnë drogën e tyre në tregjet e huaja dhe më pas të pastrojnë fitimet nga shitjet e tyre. Këtu është kaq e rëndësishme Shqipëria.

Administrata Biden në thelb e injoroi korrupsionin endemik të kartelit të drogës në Shqipëri. Megjithatë, më 13 nëntor, administrata Trump njoftoi ngrirjen e aseteve të Luftar Hysës dhe katër vëllezërve e motrave të tij. Amerikanëve tani u është ndaluar gjithashtu të bëjnë marrëveshje biznesi me këta njerëz. Departamenti i Thesarit vëren se grupi kriminal Hysa ka “përdorur ndikimin e tij përmes investimeve ose kontrollit mbi biznese të ndryshme me bazë në Meksikë – duke përfshirë lokalet e lojërave të fatit dhe restorantet – për të pastruar të ardhurat nga trafikimi i narkotikëve”.

Me një kundërpërgjigje jo aq delikate ndaj Policisë Mbretërore Kanadeze, njoftimi i Departamentit të Thesarit vëren udhëtimet e rregullta të Luftarit në Kanada dhe përfshin dy nga bizneset e tij kanadeze në listën e sanksioneve. Më tej shpjegon se grupi i krimit të organizuar Hysa “besohet se vepron me pëlqimin e Kartelit Sinaloa, i cili mban kontroll kriminal mbi pjesën më të madhe të territorit ku grupi kryen aktivitetet e tij. … Luftari dhe Arbeni [Hysa] kanë përdorur një entitet me bazë në Evropë për t’u pasuruar nga pastrimi i fondeve të paligjshme që u përkasin trafikantëve të dyshuar të drogës. Luftari gjithashtu zotëron ose drejton disa kompani të përdorura nga” grupi i krimit të organizuar Hysa.

Çfarë mund të jetë ky “entitet me bazë në Evropë”? Nuk mund të jemi të sigurt, por një takim i tetorit 2020 me Ramën jep një ide.

Në tetor 2020, Rama organizoi një takim në zyrën e tij zyrtare në Tiranë me një nga ndërmjetësit e tij politikë, Dorian Ducka; një ish-parlamentar gjerman, Mark Hauptmann; Luftar Hysa dhe Besnik Lulaj. Kur identiteti i pjesëmarrësve u bë publik dy vjet më vonë, Rama deklaroi se ishin takuar për të diskutuar mundësitë e investimeve të ligjshme. Me sa duket, duke mos e kuptuar memorandumin se ai qëndronte në të njëjtin skenar, Luftar Hysa pretendoi se ata kishin diskutuar një libër për turizmin që po shkruante një mik britanik. Ndërsa shumica e raporteve shqiptare, përfshirë fotografitë e pjesëmarrësve që largoheshin nga zyra e Ramës, janë hequr në mënyrë misterioze nga interneti, lidhjet e arkivuara mbeten të disponueshme.

Lulaj është i rëndësishëm këtu. Qeveria dhe familja e Ramës e kanë kontraktuar Lulajn për projekte të shumta fitimprurëse ndërtimi. Por ndoshta më e rëndësishme është Marina Bay Resort and Casino e Lulajt. El Universal ka raportuar se kazinoja përfaqëson një nga vendet kryesore të pastrimit të parave me bazë në Shqipëri për Kartelin Sinaloa. Diversiteti gjeografik në shkallë të gjerë është i rëndësishëm kur bëhet fjalë për pastrimin e miliarda dollarëve nga të ardhurat e drogës. A mund të jetë resorti Marina Bay “entiteti me bazë në Evropë” që i referohet Departamenti i Thesarit?

Më së paku, është e qartë se Rama ka lejuar që Shqipëria të bëhet një shtet mafioz që ofron një strehë të sigurt për disa nga kriminelët më seriozë ndërkombëtarë dhe burimet e tyre të paligjshme. Në rastin më të keq, ashtu si Maduro në Venezuelë, Rama është mundësuesi kryesor i këtij aktiviteti, duke pasuruar veten dhe aleatët e tij në këmbim të një pjese të fitimeve. Por rreziqet e tolerancës së SHBA-së për këtë aktivitet duhet të jenë të qarta.

Në Amerikën Latine, trafikimi i përhapur i drogës i ka bërë politikanët dhe zyrtarët e sigurisë të përfitojnë personalisht nga ky trafikim në vend që ta përballojnë atë. Vetëm disa zyrtarë shumë të guximshëm janë të gatshëm t’u kundërvihen trafikantëve. Dhe ashtu si me kryetarin e bashkisë Carlos Manzo, ata shpesh përfundojnë të vdekur. Kartelet tregojnë se si aktorë të fuqishëm jo-shtetërorë po e zëvendësojnë gradualisht autoritetin shtetëror me të tyren.

Administrata Trump ka ndikim të konsiderueshëm që mund ta aplikojë në Shqipëri. Kjo përfshin tarifa, sanksione dhe kufizime në bashkëpunim. Por të paktën, SHBA-të duhet të kërkojnë ekstradimin e menjëhershëm të familjes kriminale Hysa nga shtëpia e tyre në Meksikë, duke e paralajmëruar Sheinbaum se i sheh këto ekstradime si një shqetësim prioritar. Trump duhet t’i thotë Ramës se nëse nuk ndryshon kurs dhe nuk fillon të përballet me aleatët e tij të dikurshëm, mund të mos i pëlqejë ajo që vjen më pas. Zoom.al/

Will Trump give Albania’s Edi Rama a free pass on drug cartel links?

I alarmuar nga lëvizja e Salianjit në bazë, Berisha: Çfarë ke zotëri, pse del anash!

I alarmuar nga lëvizja e demokratit Ervin Salianji në bazë, Sali Berisha nuk kaloi pa e komentuar as nga takimi që po zhvillon në Mirditë.

Teksa Salianji dhe Alimehmeti morën mbështetje të fortë në Durrës, Berisha tha se ata “po marrin njerëz të pakënaqur”.

“Çfarë ke zotëri, pse del anash”-ishte përgjigja e Berishës për Salianjin. 
Pse del anash ti. Çdo mbledhje pasur dhe do ketë të drejtë të thotë ç’të dojë. Shkon dhe merr njerëz të pakënaqur.

Më çon mesazh një demokrat. Shaupin e ka çuar me detyrim Xhaferri, njeriu i Haramit, Haram Begës. Çfarë ke zotëri, je anëtar i partisë, je i lirë. Ke të drejtë të shprehesh”- u shpreh Berisha. Zoom.al/

U godit me thikë gjatë sherrit në rrjetet sociale, humb jetën 15-vjeçari në Durrës

Ka humbur jetën 15-vjeçari që u godit me thikë në Durrës, gjatë një konflikti mes disa adoleshentëve.

Pas ngjarjes i mituri u shtrua në spital deri ditën e sotme ku ndërroi jetë si pasojë e plagëve të mara.

Përplasja mes tyre erdhi për shkak të një komenti në rrjetet sociale.

Pas mësimit, të dy nxënësit u takuan bashkë me disa shokë për tu sqaruar. Por debati degjeneroi në përdorim të mjeteve të forta dhe të thikave.

Autori i ngjarjes, gjuthashtu adoleshent është kapur nga policia dhe po përballet me akuzat. Zoom.al/

Itali/ Detaje të reja nga vrasja e 49-vjeçares shqiptare

Detaje të reja kanë dalë në dritë nga vrasja e shqiptares 49-vjeçare nga bashkëshorti i saj në Ankona të Italisë.

Kërkimet janë duke vazhduar për Nazif Muslija, 50 vjeç, i dyshuar për vrasjen e gruas së tij, Sadjide Muslija, 49 vjeçe.

Sipas mediave italiane, viktima u gjet dje, në shtëpinë me shenja të dhunës brutale në kafkë. Nazif Muslija, i cili më parë ishte raportuar për dhunë në familje dhe ishte arrestuar në prill për sulm ndaj gruas së tij me një sëpatë, thuhet se është larguar me një makinë Smart dhe telefoni i tij celular nuk ka qenë i arritshëm që nga mëngjesi i djeshëm.

Hetuesit mjeko-ligjorë kanë punuar gjatë gjithë natës për të gjetur armën e krimit, me hipotezën kryesore që mund të jetë një shkop, por karabinierët ende nuk e kanë gjetur atë. Avokati i Nazifit, Antonio Gagliardi, ka kontaktuar djalin 27-vjeçar të çiftit, i cili jeton në Zvicër, për ta informuar mbi tragjedinë.

“E prisja këtë…” kanë qenë të vetmet fjalë të të riut, i cili vetëm prillin e kaluar kishte strehuar nënën kur babai i tij u arrestua dhe u vu në arrest shtëpie.

Prokurori Rosario Lioniello ka urdhëruar sekuestrimin e shtëpisë ku ndodhi krimi dhe kryerjen e autopsisë mbi trupin e viktimës për të përcaktuar shkakun dhe kohën e vdekjes. Programi i Rai3 “Chi l’ha visto?” ka publikuar fotografinë e Nazifit, duke kërkuar ndihmën e publikut për çdo informacion që mund të çojë në kapjen e tij, pasi hetuesit po përpiqen të ngushtojnë fushën e hetimit dhe të sqarojnë rrethanat e ngjarjes.

Makina përplas motorin në Tiranë

Një aksident rrugor ka ndodhur mbrëmjen e sotme në Bulevardin Zogu i Parë në Tiranë, ku një makinë ka përplasur një motor.

Nga informacionet e para nuk dihet ende nëse ka persona të lënduar, ndërsa në vendngjarje kanë grumbulluar disa qytetarë si edhe policia për të hetuar shkaqet e përplasjes.

Autoritetet bëjnë apel për kujdes dhe respektim të rregullave të qarkullimit rrugor, veçanërisht në ditët me shi, kur lagështia në rrugë është më e lartë dhe trafiku rëndohet./ Zoom.al

Dilema, dorëheqje dhe rrugë e re/ Dy shenjat që do të marrin vendime të mëdha këtë muaj

Demi

Demi, shenja që e vlerëson sigurinë dhe qëndrueshmërinë, do të përballet me një ndryshim të fortë në mes të dhjetorit. Çështje profesionale të lëna pezull prej muajsh dalin më në fund në pah, duke e vënë në pikëpyetje të gjithë strukturën e deritanishme. Dilema kryesore për Demin lidhet me karrierën: të qëndrojë në një pozicion të njohur, por që nuk sjell më zhvillim, apo të marrë një hap të ri drejt një të ardhmeje më premtuese.

Në lojë mund të jenë dorëheqja, ndryshimi i rolit profesional, kërkimi i një rruge të re apo edhe nisja e një sipërmarrjeje personale. Vendimi i marrë në këtë periudhë është afatgjatë dhe mund të hapë derën drejt më shumë lirie, rritjeje dhe përmbushjeje profesionale.

Peshorja

Në mesin e dhjetorit, katrori Venus–Pluton pritet të sjellë në sipërfaqe tensione emocionale që peshorja i ka shmangur prej kohësh. Dëshira e kësaj shenje për ekuilibër dhe harmoni nuk mjafton më, sepse realiteti kërkon një qëndrim të qartë.

Një person i rëndësishëm ose një marrëdhënie e gjatë mund të arrijë në një pikë kritike, ku hapja, ndershmëria dhe diskutimi i sinqertë bëhen të domosdoshme. Peshorja vihet përballë një vendimi thelbësor: të vazhdojë një situatë të njohur, por jo funksionale, apo të zgjedhë një rrugë më autentike, më të lirë dhe më të drejtë për vetveten. Vendimi është i vështirë, por është edhe çlirimtar./ Zoom.al