Day ArchiveBarbie nxjerr kukullën e parë me diabet të tipit 1

Në filmin “Barbie” të Greta Gerwig, Barbieland është një parajsë barazie dhe diversiteti.

Por edhe pse kukulla e famshme ka dalë që në vitin 1959, Mattel nisi në vitin 2019 prodhimin e Barbie-ve me aftësi të veçanta.

Tani kompania ka nxjerrë në treg kukullën e parë Barbie me diabet të tipit 1, risia e linjës së krijuar “për të mundësuar që më shumë fëmijë të shohin pasqyrimin e vetes dhe të inkurajojnë lojën me kukulla që shkon përtej përjetimit të një fëmije”, raporton The Guardian.

Diabeti i tipit 1 është një sëmundje autoimunitare ku trupi sulmon dhe shkatërron qelizat në pankreas që prodhojnë insulinën. Ajo shpesh diagnostikohet në fëmijëri dhe pacientët duhet të matin nivelin e glukozëës dhe të injektojnë insulinën çdo ditë.

Kukulla Barbie është rezultat i bashkëpunimit me organizatën botërore jofitimprurëse për diabetin e tipit 1, Breakthrough T1D. Kukulla ka një monitor në krah i cili qëndron i palëvizur falë një ngjitësi mjekësor në formë zemre. Barbie ka edhe një celular me një aplikacion që mat nivelin e sheqerit në gjak gjatë ditës.

Sot ka më shumë se 175 lloje të ndryshme Barbie sa i përket ngjyrës së lëkurës, syve, flokëve, trupave dhe problemeve shëndetësore. Midis tyre ka një Barbie të verbër, një me ngjyrë që ka sindromën Down, me aparat dëgjimi, proteza dhe  karrige me rrota si dhe një Barbie me vitiligo.

Shtatzënë pas 18 vitesh falë inteligjencës Artificiale

Një fëmijë falë Inteligjencës Artificiale, pas 18 vitesh përpjekjesh. Dhe e gjitha falë sistemit Star, të përdorur nga Qendra e Fertilitetit të Universitetit Columbia.

Çfarë është i aftë të bëjë? Do ta shohim së shpejti, por ndërkohë, le të tregojmë historinë e një çifti amerikan që donin një fëmijë për gati dy dekada, duke iu nënshtruar cikleve të shumta të riprodhimit të asistuar në të gjithë botën. Të gjitha dështuan për shkak të infertilitetit të tij, të shkaktuar nga azoospermia e rëndë.

Por çifti, i cili me sa duket nuk kishte ndërmend të përfitonte nga dhurimi i spermës, vendosi të provonte një qasje të re në Qendrën e Fertilitetit të Universitetit Columbia, e cila zhvilloi metodën STAR, e cila përdor inteligjencën artificiale për të identifikuar dhe nxjerrë ato spermatozoide të rralla të fshehura që janë të vështira për t’u gjetur nën mikroskop nga syri i njeriut, sado i kujdesshëm të ishte.

Studiuesit në Qendër më pas ekzaminuan mostrën e marrë nga burri me sistemin e AI, duke gjetur tre spermatozoide individuale, të cilat u mblodhën dhe u përdorën për të fekonduar vezët e gruas, duke rezultuar në shtatzëninë e parë të bërë të mundur nga metoda STAR. Foshnja pritet në dhjetor.

Inteligjenca artificiale ka disa vite që po hyn në laboratorët e mjekësisë riprodhuese dhe nuk është rastësi që seanca të tëra iu kushtuan asaj në konferencën Eshre të mbajtur së fundmi në Paris, e cila u përqendrua në Mjekësinë Riprodhuese dhe Embriologjinë.

AI ndihmon laboratorët të vlerësojnë cilësinë e oociteve dhe shëndetin e embrioneve dhe gjithashtu mund të përdoret në fushën e infertilitetit mashkullor, si në këtë rast.

Metoda STAR, të zhvilluar nga drejtori i qendrës së Universitetit Columbia, Zev Williams dhe kolegët e tij, posaçërisht për të ndihmuar në identifikimin e pak spermatozoideve të pranishme në mostrat nga burrat me azoospermi. Ata vetë u impresionuan nga rezultatet.

Sistemi STAR do të bëjë një ndryshim, është ajo që ata e quajnë një ndryshim të madh. Merrni parasysh se në një mostër të dhënë nga një pacient ku teknikët e trajnuar shumë mirë nuk kishin gjetur asnjë spermatozoid, sistemi STAR, brenda një ore, gjeti 44.

Kur mostra vendoset në një çip të projektuar posaçërisht nën mikroskop, sistemi STAR (shkurtim për Sperm Tracking and Recovery) lidhet me mikroskopin nëpërmjet një kamere me shpejtësi të lartë dhe përdor teknologji imazherie me precizion të lartë për të ekzaminuar mostrën, duke marrë më shumë se 8 milionë imazhe në më pak se një orë.

Sistemi më pas izolon menjëherë spermatozoidet e identifikuara në një pikë të vogël, duke u lejuar embriologëve që nuk do të kishin qenë kurrë në gjendje ta dallonin atë me sytë e tyre ta mbledhin dhe ta ruajnë atë.

“Është si të kërkosh një gjilpërën në kashtë, sepse ky pacient nuk kishte 200 ose 300 milionë spermatozoidë të zakonshëm, por bëhet fjalë për dy ose tre. Dhe sistemi, duke përfunduar kërkimin në më pak se një orë pa përdorur asnjë mjet që mund të dëmtonte spermën, i gjeti ato”, shpjegoi Williams.

Hamasi pranon të lirojë 10 pengje izraelite, por me kusht

Hamasi njoftoi sot se ka rënë dakord të lirojë dhjetë pengje si pjesë e bisedimeve për të arritur një armëpushim në Rripin e Gazës.

Sipas organizatës palestineze, pikat që janë ende në negociata janë hyrja e ndihmës humanitare, tërheqja e forcave izraelite nga enklava dhe “garancitë e vërteta” për një armëpushim të përhershëm.

Hamasi shtoi se bisedimet janë “të vështira” për shkak të “këmbënguljes së Izraelit”.

Kujtojmë se presidenti amerikan, Donald Trump tha dje se një armëpushim në Gaza mund të arrihet këtë javë ose javën tjetër.

Çfarë mund të ndodh në Kosovës pas 26 korrikut?

Situata në Kosovë mbetet e bllokuar, ndërsa heqja e mandateve të deputetëve – një opsion i përmendur në rast të moskonstituimit të Kuvendit deri më 26 korrik – nuk konsiderohet e realizueshme.

Ekspertët paralajmërojnë se, nëse ky afat shkelet, vendi do të përballet me një krizë politike dhe juridike të panjohur më parë.

Askush nuk ka përgjigje të qartë se çfarë do të ndodhë në Kosovë pas 26 korrikut – datë kur skadon afati prej 30 ditësh që Gjykata Kushtetuese u ka dhënë deputetëve të zgjedhur për të konstituuar Kuvendin. Deri tani, përpjekjet për formimin e këtij institucioni ligjvënës kanë dështuar 44 herë. Partitë politike vazhdojnë të fajësojnë njëra-tjetrën për ngërçin dhe të mos lëvizin nga qëndrimet e tyre.

Në këtë atmosferë bllokade, ish-gjyqtarja e Gjykatës Kushtetuese të Kosovës, Gjyljeta Mushkolaj, thotë se barra e përgjegjësisë duhet të kalojë tani mbi presidenten e vendit, Vjosa Osmani, e cila e ka detyrë kushtetuese të garantojë funksionimin demokratik të institucioneve. Sipas saj, e para e shtetit duhet t’i intensifikojë përpjekjet për arritjen e një konsensusi mes partive politike, dhe nëse kjo dështon, të kërkojë interpretim shtesë nga Gjykata Kushtetuese, për të qartësuar hapat e ardhshëm.

“Gjykata Kushtetuese duhet të jetë më e prerë rreth afatit që e ka përcaktuar dhe pasojave që vijnë pas këtij afati. Roli i Gjykatës Kushtetuese nuk ka përfunduar ende”, thotë Mushkolaj për Radion Evropa e Lirë.

Javën e kaluar, presidentja Osmani priti për dy ditë me radhë përfaqësuesit e partive politike, në përpjekje për të zhbllokuar situatën. Pas takimeve, ajo u shpreh qartë se konstituimi i Kuvendit brenda afatit 30-ditor të përcaktuar nga Gjykata Kushtetuese, është “detyrim e jo opsion” dhe u bëri thirrje partive që sa më shpejt të gjejnë zgjidhje.

Këshilltari i saj për media, Bekim Kupina, thotë për Radion Evropa e Lirë se presidentja është duke i shqyrtuar mundësitë ligjore për t’iu drejtuar Gjykatës Kushtetuese me kërkesën për sqarim të aktgjykimit, “në mënyrë që të qartësohen pasojat juridike, në rast se Kuvendi nuk konstituohet brenda afatit të përcaktuar nga ajo”.

Në Institutin e Kosovës për Drejtësi (IKD) thonë se konsensusi është e vetmja rrugë për të tejkaluar bllokadën dhe për të konstituuar Kuvendin deri më 26 korrik. Nëse kjo nuk ndodh, Kosova do të përballet me një situatë të panjohur deri më tash, thotë Naim Jakaj nga ky institut.

“Kosova do të hyjë në një situatë të re juridike dhe politike, që nuk e ka përjetuar më herët. Pasojat e saj do t’i ndiejmë në muajt e ardhshëm, në rast se Kuvendi nuk konstituohet deri më 26 korrik”, thotë Jakaj për Radion Evropa e Lirë.

A mund t’iu merret mandati deputetëve

As Lëvizja Vetëvendosje, që doli e para në zgjedhjet parlamentare të 9 shkurtit, nuk ka një përgjigje të qartë për zhvillimet që mund të pasojnë nëse Kuvendi nuk konstituohet deri më 26 korrik. Më 9 korrik, në përgjigje të pyetjes së gazetarëve për këtë çështje, deputetja e Vetëvendosjes, Mimoza Kusari-Lila, tha shkurt: “E paparashikuar”.

Dy ditë më parë, ajo përmendi mundësinë që të gjithë deputetët e Kuvendit të humbin mandatin, nëse nuk e konstituojnë institucionin brenda afatit 30-ditor, të përcaktuar nga Gjykata Kushtetuese.

“…janë 120 deputetë të legjislaturës së 9-të, që mund t’iu merret mandati, dhe të vazhdohet pastaj me deputetët që janë në listat e të gjitha partive politike”, tha Kusari-Lila.

Por, Mushkolaj shpjegon se mandatin e deputetëve të zgjedhur në mënyrë demokratike nuk mund ta marrë askush.

“Populli ua ka dhënë këtë mandat dhe populli ua merr mandatin. Vetëm nëse shkojmë në zgjedhje. Por, përsëri, duhet të konstituohet Kuvendi”, thotë profesoresha në Fakultetin Juridik të Universitetit të Prishtinës.

Jakaj, gjithashtu, nuk e sheh të mundshme heqjen e mandatit të deputetëve.

Ai thekson se Kushtetuta e Kosovës, në nenin 70, përcakton qartë arsyet për përfundimin ose pavlefshmërinë e mandatit të deputetit.

Ato përfshijnë: mosbetimin, dorëheqjen, emërimin në qeveri, përfundimin e mandatit të kuvendit, mungesën prej gjashtë muajsh në seanca, dënimin me vendim gjyqësor të formës së prerë për vepër penale me një ose më shumë vite burgim, ose vdekjen e deputetit.

“Në asnjë nga pikat e aktgjykimit, Gjykata Kushtetuese nuk i ka saktësuar pasojat kolektive apo individuale për deputetët, në rast të moskonstituimit brenda afatit prej 30 ditësh”, shton Jakaj.

Muhaxhiri: Nuk ka precedent për marrjen e mandateve

Edhe Artan Muhaxhiri, sociolog dhe njohës i politikës në Kosovë, thotë se vendimi i Gjykatës Kushtetuese nuk parashikon marrjen e mandateve nga deputetët, në rast të moskonstituimit të Kuvendit brenda afatit. Për më tepër, thekson ai, në Kosovën e pasluftës nuk ka ndonjë precedent të ngjashëm.

Ai thotë se një hap i tillë do të kërkonte një vendim të ri të Gjykatës dhe ndryshime në mënyrën e zëvendësimit të deputetëve, por, prapëseprapë, nuk do të garantonte tejkalimin e bllokadës politike që po e pengon formimin e institucioneve.

“E para, ata deputetë që do të vinin, do të kishin më pak legjitimitet dhe pothuajse të gjithë do të ishin anonimë, pa përvojë politike. Vetë fakti që nuk janë zgjedhur, dëshmon se nuk kanë arritur sukses as në garën përbrenda partive të tyre”, thotë Muhaxhiri për Radion Evropa e Lirë.

Ai shton se personat që do t’i zëvendësonin deputetët aktualë, do të vepronin nën udhëzimet e liderëve të partive të tyre, ndaj sjellja e tyre në procesin e konstituimit të Kuvendit do të ishte e njëjtë me atë të deputetëve aktualë.

“Do të ktheheshim në pikën ku jemi tash, por me një humbje të kohës dhe me një dëmtim të perspektivës së Kosovës dhe imazhit institucional në përgjithësi”, thekson Muhaxhiri.

Ku ka mbetur seanca konstituive e Kuvendit të Kosovës?

Deri më tani, deputetët kanë përfunduar vetëm dy pika të agjendës: raportin e Komisionit të përkohshëm për verifikimin e mandateve dhe betimin e deputetëve. Procesi ka ngecur te pika e tretë: zgjedhja e kryetarit të Kuvendit. Kandidatja e Lëvizjes Vetëvendosje, Albulena Haxhiu, nuk ka arritur t’i sigurojë 61 votat e nevojshme në disa runde votimi për t’u zgjedhur në këtë post.

Dy parti parlamentare, PDK-ja dhe AAK-ja, e shohin Haxhiun si figurë përçarëse dhe kërkojnë nga Lëvizja Vetëvendosje të propozojë një emër tjetër për kryeparlamentar. LDK-ja thotë se nuk do të mbështesë asnjë kandidat të Vetëvendosjes për këtë pozitë. E, Vetëvendosje këmbëngul tani që votimi për Haxhiun të bëhet në mënyrë të fshehtë, duke premtuar se nëse ajo nuk i merr 61 vota, do të propozojë një kandidat tjetër.

Por, kjo formë votimi kundërshtohet nga partitë e tjera, duke e futur situatën në një rreth vicioz. Gjykata Kushtetuese nxori aktgjykimin për konstituimin e Kuvendit me afat 30 ditësh më 26 qershor, pas 37 tentativave të dështuara në këtë proces.

Megjithatë, ekspertët kushtetues dhe partitë politike e kanë kuptuar dhe interpretuar këtë vendim në mënyra të ndryshme. Muhaxhiri thotë se për të tejkaluar bllokadën në Kuvend, është e nevojshme që Gjykata Kushtetuese të dalë me një vendim më të qartë dhe më të drejtpërdrejtë./REL

“Akuzohet për disa krime/ Prokuroria zvicerane kërkon paraburgim për Noizyn

Media zviceriane Watson ka raportuar se reperi shqiptar Noizy është arrestuar në aeroportin e Zyrihut të shtunën e 5 korrikut.

Zyra e Policisë Kantonale të Zyrihut njoftoi të hënën [7 korrik] se ky veprim u ndërmor me kërkesë të Zyrës së Prokurorisë së Zyrihut për Krimet e Rënda, por siç raporton Watson, autoritetet nuk kanë dhënë detaje të tjera në lidhje me ndalimin e tij.

Zyra e prokurorisë njoftoi të martën se 38-vjeçari akuzohet për disa krime të ndryshme. Ndaj tij ka nisur një procedim penal dhe për shkak të natyrës së hetimit, Watson shkruan se autoritetet nuk japin detaje të tjera në lidhje me rastin.

Po ashtu, ndaj Noizy-t është kërkuar masa e sigurisë, paraburgim, si masë parandaluese. Mirëpo deri më tani nuk është marrë një vendim i tillë.  

“Për më tepër, prezumimi i pafajësisë zbatohet deri në dhënien e një vendimi përfundimtar”,shkruan Watson.

Reperi shqiptar do të performonte në Rinora 4 në Rumlang, por për momentin planet e tij janë pezulluar.

Vdekja tragjike e Diogo Jotës, ja shuma që bashkëshortja dhe fëmijët e mitur të futbollistit do të përfitojnë

Vdekja tragjike e futbollistit Diogo Jota dhe vëllai të tij Andre Silva tronditi mbarë botën e sportit, por jo vetëm.

Sigurisht, më të prekurit janë familjarët e tyre, prindërit dhe bashkëshortja Rute me fëmijët e mitur të 28-vjeçarit.

Pas ngjarjes, bota e futbollit vërshoi me mesazhe ngushëllimi, por dhe me gjeste të rralla e plot kuptim. I tillë ishte dhe vendimi i Liverpool, klubi ku Digo aktivizohej, për t’i dhënë bashkëshortes pagën e lojtarit deri në fund, e po ashtu duke vendosur një fond për të mbështetur arsimimin e 3 djemve të tij deri në moshën 18-vjeçare.

Por sa është kjo shumë? Sipas “Daily Mail”, e veja e Diogo Jotës mund të trashëgojë deri në 35 milionë paund nga pasuria e tij për sigurinë financiare të saj dhe tre fëmijëve të tyre. Jota nënshkroi për herë të parë një kontratë me Wolverhampton Wanderers në vitin 2018, nga e cila fitonte 38,000 £ në javë. Dy vjet me këto paga e panë atë të fitonte 3,952,000 £ përpara se të shënonte shumën e madhe me një transferim në Anfield, ku dy vitet e para të kontratës së tij katërvjeçare me 83,000 £ në javë e panë atë të fitonte edhe 8,632,000 £ të tjera.

Si rezultat i talentit të tij fenomenal, Liverpooli e zgjati kontratën për pesë vjet në vitin 2022 dhe ia rriti pagën në 140,000 £ në një kontratë që e pa atë të fitonte 21,840,000 £ para vdekjes së tij tragjike. Këtu përfshiheshin bonuse performance, dhe 65 golat e tij në 182 ndeshje kontribuan në pasurinë e tij. Megjithatë, ai ishte gjithashtu një sipërmarrës i Esports dhe ambasador global i markës.

Jota pritej të merrte 14.5 milionë paund të tjera për dy vitet e mbetura të kontratës së tij, të cilën pavarësisht raportimeve në mediat portugeze që sugjeronin se Liverpooli do ta respektonte, ende nuk është konfirmuar. Kjo do të thotë që të ardhurat totale të Jotës prej rreth 34.4 milionë paundësh që nga mbërritja në Premier League mund të trashëgohen nga Rute dhe dy djemtë e tyre, Dinis, katër vjeç, Duarte, dy vjeç, dhe vajza e tyre tetëmuajshe, Mafalda./TAR

Jep dorëheqjen kreu i Agjencisë së Mbikqyrjes Policore

Kreu i Agjencisë së Mbikëqyrjes Policore (AMP), Florian Sulejmani, ka dhënë dorëheqjen nga detyra.

Mësohet se ai i ka dorëzuar dorëheqjen ministrit të Brendshëm, Ervin Hoxha, një ditë më parë, ndërsa arsyet nuk janë bërë ende publike.

Dorëheqja e Sulejmanit vjen disa javë pasi ai ishte pezulluar përkohësisht nga detyra me kërkesë të Prokurorisë së Beratit, në kuadër të një hetimi për “shpërdorim detyre”, që lidhej me transferimin e vartësve të tij.

Më pas, çështja u transferua në Prokurorinë e Tiranës, e cila e pushoi hetimin dhe kërkoi heqjen e masës së pezullimit, që u pranua nga Gjykata më 26 prill.

Florian Sulejmani u emërua në krye të AMP-së në nëntor 2023. Emërimi i tij u bë me urdhër të Kryeministrit. Për momentin, nuk ka një reagim zyrtar nga ana e tij apo e Ministrisë së Brendshme për dorëheqjen.

Adis Patushi thyen heshtjen mes aludimeve për ndarjen nga Fifi

Në mes të zërave që prej ditësh kanë qarkulluar rreth një ndarjeje të mundshme me Fifin ka ardhur më në fund reagimi i parë nga bashkëshorti i saj, Adis Patushi.

Ai ka zgjedhur të mos flasë drejtpërdrejt, por të shprehë ndjenjat e tij në mënyrë të ndjeshme dhe simbolike, përmes një poezie të njohur të Agim Doçit, te postuar në Instagram.

“Sa isha gjallë më ndenjën ftohtë
Nuk e kuptoja çfarë kisha bërë
Doja nga njerëzit një fjalë të ngrohtë
Vetëm më iku, jeta e tërë…”

Ky mesazh i heshtur, por emocionalisht i ngarkuar, është interpretuar nga ndjekësit si një reagim i drejtpërdrejtë ndaj situatës që po përjeton çifti.

Ndonëse nuk ka asnjë përmendje të drejtpërdrejtë për Fifin apo ndarjen, përzgjedhja e vargjeve lë të kuptohet një ndjenjë reflektimi, keqardhjeje apo boshllëku emocional.

Masakroi ish të dashurën shtatzënë me thikë, burg përjetë shqiptarit në Itali

40-vjeçari shqiptar, Bujar Fandaj, është dënuar me burgim të përjetshëm nga Gjykata e Krimeve të rëntda tët Trevizos në Itali, për vrasjen e ish të dashurës së tij 26-vjeçares Vannesa Ballan, më 19 dhjetor të vitit 2023.

Fandaj i cili prej vitesh punonte si zejtar në Altivole të Italisë, u arrestua nga policia italiane menjëherë pas ngjarjes së rëndë të ndodhur në Riese Pio X më 19 dhjetor 2023.

Ngjarja

Mbrëmjen e 19 dhjetorit të vitit 2023 Vannesa u gjet e masaktuar me thikë nga partneri i saj në shtëpinë  etyre. 26-vjeçarja ndodhej me leje lindjeje pasi ishte në muajin e tetë të shtazanisë dhe ishte në pritje të fëmijës së saj të dytë.

Pas mbërritjes në vendngjarje, policia ngriti menjëherë dyshimet te 40-vjeçari shqiptar Bujar Fandaj, pasi ky i fundit në të shkuarën kishte patur lidhje intime me viktimën, por pas ndarjes ai ishte kthyer në makth për 26-vjeçaren dhe partnerin e saj.

Siaps mediave italiane Fandaj nuk e kishte kapërdirë dot ndarjen mes tyre dhe kishte nisur presionin psikologjik ndaj 26-vjeçares duke i publikuar videot e tyre intime në rrjet e më aps duke ia nisur ato edhe parterit të Vannesës.

Por pas denoncimit të të resë, Fandaj ishte tërhequr përkohësisht duke mos e shqetësuar, deri në mbrëmjen e 19 dhjetorit të vitit 2023.

Sipas rindërtimit të ngarjes nga hetuesit, më 19 dhjetor 2023, Fandaj hapi me forcë një dritare dhe hyri në shtëpinë e gruas. Atje, i armatosur me një thikë, ai e goditi Vanessën tetë herë me thikë, duke e lënë të pajetë në dysheme. Më pas ai u përpoq të arratisej nga Italia.

Megjithatë, ai u arrestua disa orë më vonë nga karabinierët në shtëpinë e tij. Në fillim ai rrëfeu ngjarjen, por më pas u përpoq ta minimizonte përgjegjësinë e tij duke mohuar paramendimin. Por provat e mbledhura, duke përfshirë detajet e sulmit dhe mesazhet që i paraprinë vrasjes, e bindën Gjykatën për fajësinë e tij të plotë.

“Do shkojmë në komisariat”/ Detaje nga vrasja e Renis Dobrës, autorët u hoqën si policë

Zbardhen detaje të reja nga rrëmbimi dhe vrasja e 23-vjeçarit Renis Dobra, trupi i të cilit u gjet mëngjesin e sotëm në breg të liqenit të Shkopetit.

Sipas burimeve nga hetimet, ngjarja dyshohet se nisi në fshatin Zenisht, pranë banesës së viktimës. Disa persona të armatosur i kanë zënë pritë mjetit që drejtonte i riu dhe janë prezantuar si efektivë policie.

Në momentin e ngjarjes, një automjet tjetër që kalonte rastësisht në zonë është ndalur për të pyetur nëse kishte ndonjë problem, por autorët e kanë kërcënuar të largohet menjëherë.

Më pas, disa prej tyre janë futur në makinën e Renis Dobrës me pretendimin se do ta “shoqëronin” në komisariat. Në të vërtetë, rruga përfundoi në Shkopet, ku 23-vjeçari u gjet i pajetë.

Dyshimet e para janë se i riu është dhunuar dhe mbytur me litar, para se trupi i tij të hidhej pranë liqenit, bashkë me automjetin. Hetimet vijojnë për identifikimin dhe kapjen e autorëve./ Zoom.al