Day Archive“Eni milioneri”- Pronat arsyeja e krimit? Si djali thuri planin e vrasjes së Pëllumb Metës

Pëllumb Meta me origjinë nga fshati Shemëri i Krujës lindi në Shënavlash të Durrësit më 8 qershor të vitit 1974, aty ky prindërit e tij Hamid dhe Fatime ishin shpërngulur prej kohësh nga Kruja.

Mes jetës së emigracionit dhe Shqipërisë, Pëllumbi pas vdekjes së nënës së tij vendosi të kthehej përfundimisht në Shqipëri, ku ishte bërë edhe baba i 4 fëmijëve, 2 vajzave dhe 2 djemve. Familjarët e Pëllumbit pretendojnë se që prej vdekjes së nënës së tyre nuk kanë pasur komunikim me bashkëshorten e tij, Blerinën, e cila kishte distancuar edhe fëmijët nga familjarët e Pëllumbit, me të cilët prej vitesh nuk flisnin.

Përtej këtij fakti, Pëllumbi nisi t’i përkushtohej familjes në vendlindjen e tij pas kthimit nga Italia. Ai nisi punën si roje në Shënavlash te tregu i makinave, punë që e bëri deri në ditën e fundit të jetës për rreth 23 vite, deri në 10 shkurt të vitit 2024.

 

 

10 shkurti i 2024-ës ishte edhe fundi i jetës së Pëllumb Metës, i cili ekzekutohet nga familjarët e tij. Një krim i rëndë i cili tronditi edhe më shumë opinionin publik sesi 4 familjarë, 3 fëmijët dhe nëna u bënë bashkë për të eleminuar kryefamiljarin e tyre dhe e varrosën në kasollen e bagëtive.

Sipas hetuesve, i gjithë plani i këtij krimi horror ishte i parapërgatitur deri në detaje. Por si u zbulua e vërteta dhe si nisi policia hetimet deri në zbardhjen e ketij krimi monstruoz?

Shefi i seksionit te hetimit të krimeve ndaj personit në Policinë e Durrësit, Ruzhdi Domi, i cili ka hetuar rastin që kur mbërriti kallëzimi në polici deri në zbardhjen e ngjarjes, shpjegon se si policia ra në gjurmët e së vërtetës.

Sipas grupit hetimor, fëmijët kishin realizuar të gjithë planin e fshehjes së krimit me detaje, nga largimi i makinës së të ndjerit, varrimi dhe fshehja e armës, të cilën sipas policisë dyshohet se e zotëronte i biri i viktimës, Hyseni. Ajo që i bëri më shumë përshtypje policisë në këtë krim ishte edhe qetësia e femijëve dhe bashkëshortes së Pëllumbit pas ngjarjes.

Fëmijët dhe nëna e tyre sipas grupit hetimor kanë dhënë deklarata kontradiktore për autorësinë e krimit, por në bazë të hetimeve të deritanishme policia deklaron se autor i qitjes së armës është djali i madh i Pëllumbit, Hyseni, i cili ka bashkëpunuar me motrën Hygertën. Hetuesit kanë bërë prova në poligon qitje me armë për të provuar nëse Hygerta di të përdorë armën.

Grupi hetimor të gjithë anëtarët e familjes po i heton si pjesëmarrës në krim, edhe pse bashkëshortja e Pëllumbit është poceduar në gjendje të lirë. Vëllai i Pëllumbit, Ramazani hedh akuza ndaj gruas së vëllait të tij.

Nga ana ligjore, policia e ka zbardhur ngjarjen ku kemi 3 anëtarë të familjes të arrestuar dhe një nën hetim, por cili ishte motivi i vërtetë i kësaj ngjarje kaq të rëndë, saqë bëri bashkë të gjithë fëmijët të vrisnin babanë tyre. Grupi hetimor po heton për motivin e ngjarjes, edhe pse shprehen të rezervuar për shkak të sekretit hetimor. Pista e fejesës së Hygertës se Pëllumbi donte ta fejonte pa dëshirë dhe dhuna në familje apo inçesti janë përjashtuar nga hetuesit. Hygerta iu nënshtrua edhe analizave gjinekologjike, ku vërtetua që nuk kemi të bëjmë me abuzim seksual.

Mësohet nga burime konfidenciale se një pistë e fortë është ajo e konflikteve pasurore për tokën, ku personazh kyç është djali i madh i Pëllumbit, Hyseni. Pëllumbi kishte në zotërim rreth 12 dynym tokë, të cilën e kishte edhe me dokumente të rregullta. Po ashtu mësohet se gjatë kontrolleve në banesë policia nuk i ka gjetur këto dokumente, madje në shtëpinë e të ndjerit nuk janë gjetur as para.

Këto dokumente të tokës i mbante gjithmonë me vete Hyseni, kudo që ai shkonte. Këtë informacion e disponon edhe grupi hetimor. Hetuesit po vijojnë kërkimet dhe ende nuk janë gjetur këto dokumente, madje dyshohet edhe për bashkëpunëtorë të jashtëm, që mund të kenë ndihmuar djalin e të ndjerit.

News24 shkoi te pronat e Pëllumb Metës, i cili tokat i kishte në dy parcela, një para banesës, ndërsa tjetrën rreth 2 km larg në një zonë industriale, tokë e cila ishte nxjerrë edhe në shitje. Metri i tokës sipas vëllait të të ndjerit kushton deri në 50 euro, ku në total tokat e Pëllumbit vlenin deri në 500 mijë euro.

Sakaq, një mbishkrim i çuditshëm është vënë re nga hetuesit edhe në murin e kasolles ku fëmijët varrosën të atin. Në mur shkruhet “Eni milioneri, 1 milionë dollar”. Djalin e madh të Pëllumbit Hysenin e thërrisnin shkurt Eni.

Në dëshmitë e tyre fëmijët deklarojnë se konfliktet familjare kanë qenë të vazhdueshme në familje me babanë, konflikti i fundit ishte i Hysenit me të ndjerin, ku Hyseni i kërkonte të atit që t’i blinte një makinë, edhe pse ishte i papunë dhe sapo ishte kthyer nga Italia.

Hyseni kishte qenë më parë emigrant në Angli ku kishte qëndruar edhe në kamp, në një nga kampet ku kanë humbur jetën dhe janë keqatrajuar shumë emigrantë shqiptarë. Në Angli nuk dihet puna që ka kryer Hyseni, por më pas ai kishte shkuar në Itali, ku edhe atje nuk kishte punuar dhe më pas u kthye në Shqipëri. 12 ditë pas kthimit ndodhi edhe krimi, ku fëmijët vranë babanë e tyre. Hetuesit kanë sekuestruar të gjitha telefonat celularë të fëmijëve të të ndjerit dhe ka dyshime se krimi është planifikuar nga fëmijët, përkatësisht nga Hygerta dhe Hyseni dhe ky i fundit u kthye në Shqipëri për të realizuar planin.

Por, pse fëmijët kishin kaq shumë urrejtje ndaj babait të tyre së bashku me nënën dhe u bënë bashkë në këtë krim? Burime konfidenciale thanë se hetuesit po hetojnë edhe një lidhje të dyshuar jashtëmartesore të viktimës prej vitesh, ku dyshohet se në dijeni ishin edhe bashkëshortja e Pëllumbit dhe fëmijët dhe ky shkak mund të ketë çuar në konfliktet të vazhdueshme familjare dhe se ka qenë bashkëshortja që mund t’i ketë rritur fëmijët me një urrejtje ndaj të atit, aq sa u bënë të gjithë bashkë për të vrarë atë.

Burime të besueshme thanë se ka prova ku Hyseni i thotë motrës që ta marrë ajo përsipër krimin sepse ky i fundit do të shesë tokën dhe do ta nxjerrë nga burgu. Po ashtu edhe motra e madhe Bedra, e cila ishte e fejuar dhe u lejua nga xhaxhai të merrte pjesë në varrimin e babait, është larguar nga burri dhe ka shkuar te nëna e saj Blerina, e cila po qëndron të prindërit e saj.

Gjatë realizimit të këtij dokumentari, kontaktuam edhe babanë e Blerinës, zotin Baftjar Togun, për të marrë edhe versionin e Blerinës dhe të vajzës së madhe për ngjarjen, por babai i Blerinës tha se vajza e tij nuk do që të flasë më në media. Vëllai i Pëllumbit i tronditur nga ngjarja kërkon të dijë shkakun e vërtetë të ngjarjes dhe i bën apel drejtësisë që t’i shkojë çështjes deri në fund.

Faktet dhe informacionet që u dhanë në këtë dokumentar u bazuan në informacione të cilat janë në dosjen e thelluar hetimore, por janë autoritetet ata që thonë fjalën e fundit. Grupi hetimor shprehet se janë drejt zbardhjes së motivit të ngjarjes./BW

Si bankat e mëdha po shndërrohen në “balena” të Bitcoin Izraeli kërkon emrat e pengjeve që janë gjallë si kusht për marrëveshje për armëpushim të ri Formula që ju llogarit sa orë duhet të flini, këshilla për një gjumë më të mirë

Për shumë njerëz, koha e zgjimit është e njëjtë, por koha e fjetjes ndryshon në varësi të jetës sociale, orarit të punës ose detyrimeve familjare.

Dhe nëse e dini se keni nevojë për një sasi specifike gjumi, thjesht duhet të kuptoni se në cilën orë duhet të shkoni në shtrat.

Ky artikull, do t’ju ndihmojë të kuptoni se si të llogarisni kohën më të mirë për të shkuar në shtrat bazuar në orën e zgjimit dhe ciklet natyrale të gjumit.

Për sa gjumë keni nevojë?

Sipas burimeve, këto janë udhëzimet e përgjithshme për grupmoshat e ndryshme:

• Një i porsalinur : 14 deri në 17 orë.
• Një fëmijë nga mosha 5 vjeç – 12 vjeç: 10 deri në 13 orë.
• Një adoleshent: 8 deri në 10 orë.
• Një i rritur: 7 deri në 9 orë.
• Një i moshuar: 7 deri në 8 orë.

Megjithatë kjo mund të jetë e ndryshme për çdo individ, pasi nevojat e trupit ndryshojnë nga një njeri tek tjetri.

Si të llogarisni sa orë duhet të flini?

Për të llogaritur se sa orë duhet të flini, ju duhet të bazoheni në:

– kohën tuaj të zgjimit

– plotësimin e pesë ose gjashtë cikleve 90-minutëshe të gjumit.

Nëse synoni të flini nga 7 deri në 9 orë gjumë çdo natë, atëherë ju nevojiten 5 deri në 6 cikle 90-minutëshe.

Për shembull, nëse ju duhet të zgjoheni në orën 6 të mëngjesit, për 7 orë gjumë, ju duhet të flini rreth orës 10 të mbrëmjes.

Dhe nëse ju duhet të zgjoheni në orën 7 të mëngjesit, për 7 orë gjumë, duhet të flini rreth orës 11 të mbrëmjes.

Shenjat që tregojnë se nuk po flini mjaftueshëm.

Mungesa e gjumit mund të ndikojë në shumë aspekte të jetës tuaj, prandaj është e rëndësishme të mësoni të njihni disa nga shenjat e pagjumësisë dhe të mundoheni t’i trajtoni ato.

Disa prej tyre janë:

• – përgjumje gjatë ditës
• – jeni të irrituar
• – jeni më pak produktiv dhe i fokusuar
• – oreksi më i madh
• – gjykimi dhe vendimmarrja juaj është e dobët
• – keni rrathë të errët poshtë syve

Këshilla për një gjumë më të mirë.

• Ushtrohuni rregullisht gjatë ditës dhe jo para se të flini, sepse kjo mund të ndërpresë ciklin tuaj të gjumit.
• Ekspozimi në diell mund të ndihmojë në ruajtjen e ritmit cirkadian të trupit tuaj, që ndikon në ciklin e gjumit dhe zgjimi.
• Mundohuni të mos bëni flini pasditeve vonë.
• Mundohuni të zgjoheni në të njëjtën orë çdo ditë.
• Kufizoni alkoolin, kafeinën dhe nikotinën në mbrëmje.
• Fikni pajisjet elektronike të paktën 30 minuta para gjumit. Drita e tyre mund të stimulojë trurin tuaj dhe ta bëjë më të vështirë të bini në gjumë.
• Krijoni një rutinë relaksuese para gjumit, si të bëni një banjë të ngrohtë, të dëgjoni muzikë qetësuese ose të lexoni një libër./AgroWeb.org

Çmimet e apartamenteve në Tiranë shtrenjtohen deri në 30% brenda një viti, kryeson periferia

Çmimet e apartamenteve në Tiranë vetëm po shtrenjtohen. Nga vëzhgimi i “Monitor” në terren, çmimet në periferi janë mbi 1,000 euro për metër katror dhe afër qendrës, mbi 2,000 euro metër katror. Te banesat e zonave periferike çmimet janë rritur me 11-31%.

Afër qendrës, rritja shkon rreth 9% dhe brenda Unazës së Vogël të Tiranës, apartamentet shiten me çmime nga 2,100 deri në 2,300 euro për metër katror. Në vlera, luhatja e tyre varion nga 150 deri në 300 euro për metër katror krahasuar me vjet.

Sipas kryetarit të Shoqatës së Ndërtuesve të Shqipërisë, Erjon Harizi, shtrenjtimi u ndikua nga shtimi i detyrimeve të ndërtuesve për taksën e ndikimit në infrastrukturë, pas rritjes së çmimeve të referencës, kostove direkte për paga të punëtorëve dhe materialeve.

Blerja e shtëpisë është një nga investimet më afatgjatë që kryhet vetëm një herë. Në Tiranë, çmimet e pronave afër qendrës janë të papërballueshme për shumë familje shqiptare, të cilat po zgjedhin si alternativë kryesore për strehim periferinë dhe zonat jashtë Tiranës.

Por këtë vit është shtrenjtuar edhe periferia, duke kapur në befasi shumë blerës. Si ndërtuesit, edhe agjentët e tregut të pasurive të patundshme, pohuan se për arsye të leverdisë së çmimit dhe zhvillimit urbanistik, një ndër zonat me përqendrimin më të lartë të kërkesës është Paskuqani. Çmimet e shitjes janë nën 1,000 euro për metër katror.

“Në disa zona të caktuara të periferisë të Tiranës, si pasojë edhe e zhvillimeve urbane, kemi rritje të çmimeve, si në Kashar pranë QTU me çmime deri në 1,000 euro për metër katror, apo në Paskuqan, me çmime mesatare 950 euro për metër katror, që vjen si risi në Tiranë me një distancë shumë të shkurtër pranë Bulevardit të Ri.

Ndërsa në zona të tjera, çmimet e apartamenteve në Tiranë vazhdojnë të jenë të pandryshuara”, thotë Dritan Leka, nga agjencia imobiliare “Century 21 CPM”.

Shtrenjtim të çmimeve ka pasur edhe në lagje të tjera periferike. Në rrugën e “Kokonozëve”, te dy kantieret e reja të ndërtimit, rresht njëri pas tjetrit, çmimet variojnë nga 1,300 deri në 1,500 euro për metër katror.

“85% e apartamenteve janë prenotuar për blerje”, pohoi një nga menaxherët e zyrës së shitjes. Ai tha se rritja është ndikuar nga kostoja e lartë për punime cilësore të brendshme dhe të fasadës së jashtme dhe pagat e larta për punëtorët.

Në një nga komplekset pothuajse të përfunduara në rrugën “Xhanfize Keko” në zonën e Porcelanit, administratori për shitjet pohoi se çmimet variojnë nga 1,450 deri në 1,500 euro për metër katror.

Nga ndërtuesit, të njëjtat nivele çmimesh ofroheshin edhe për dy objektet e reja, një në zonën e Xhamllikut dhe tjetri në Kinostudio. Vjet në zonat Kinostudio-Porcelan, çmimi maksimal i shitjes për objektet e reja arriti në 1,300 euro për metër katror.

Krahasuar me vjet, çmimet në këtë zonë u rritën nga 12 deri në 15%. Ndërsa më 2021, në periudhën pas pandemisë, çmimet e apartamenteve të reja ndryshuan me 36% (nga 1,100 euro arritën në 1,500 euro për metër katror).

Çmimet kanë shënuar rritje edhe në zonën e Freskut, kryesisht tek objektet ekzistuese, nga 800 deri në 900 euro që ishin vjet, në vitin 2024 janë 1,000 euro për metër katror (rritja varion 12-25%).

Në skajin tjetër të periferisë së Tiranës, “Astiri”, sipas agjentëve imobiliarë, çmimet e pronave në vijën e parë janë 1,600 euro për metër katror. Vjet, çmimi maksimal i shitjes për këtë zonë ishte 1,300 euro për metër katror (rritja 23%).

Nga të dhënat e marra nga zyrat e pasurive të paluajtshme, apartamente me çmime 1,000 euro për metër katror po tregtohen edhe në Sauk. Në Yzberisht çmimet nga 1,100 euro për metër katror kanë arritur në 1,300 euro (rritja 18%).

Në zonën rezidenciale “Univers City” (pas QTU), apartamentet sipas agjentëve të pasurive të patundshme janë me çmim 1,050 euro, nga 800-850 euro për metër katror që u shitën vjet (rritja 21-31%).

Në vitin 2021, me fillimin e punimeve, sipas të dhënave të zyrës së shitjes së kompleksit rezidencial, çmimet e shitjes nisnin nga 580 deri në 650 euro për metër katror (deri tani çmimet janë rritur nga 61 deri në 81% në raport me fazën e parë të ndërtimit).

 

Çmimet e larta të qendrës zhvendosin kërkesën drejt periferisë

Në të gjithë territorin e Shqipërisë, në 6 muajt e parë të vitit 2023, sipas rezultateve të vrojtimit për tregun e pasurive të paluajtshme dhe indeksit të çmimeve të Bankës së Shqipërisë, 52% e pronave të shitura kanë qenë në periferitë brenda qytetit (nga 45% që ishte në periudhën paraardhëse), ndërsa rreth 32% e shitjeve të realizuara përfaqësohen nga prona në zonat më të preferuara brenda qytetit (nga 45% gjatë periudhës paraardhëse).

Rreth 16% e shitjeve ishte për prona të ndërtuara jashtë qytetit, nga 10% në 6-mujorin e kaluar.

Sipas agjentëve të tregut të pasurive të paluajtshme, kërkesa e lartë në periferinë e Tiranës është ndikuar nga niveli i çmimeve, që janë më të përballueshme sesa të qendrës.

“Kërkesa për prona në periferi ndahet në dy nivele, për qëllime strehimi dhe rritje standardi. Për qëllime strehimi parapëlqehet periferia, për shkak të çmimeve të përballueshme nga familjet e reja dhe të ardhurit nga rrethet.

Ndërsa kategoria e dytë e blerësve janë ata individë që kërkojnë të rrisin cilësinë e jetesës, duke banuar në hapësira të gjelbra me parqe lojërash me ajër më të pastër dhe larg nga zhurmat e kryeqytetit”, pohon Dritan Leka, nga agjencia imobiliare “Century 21 CPM”.

Erjon Harizi, nga Shoqata e Ndërtuesve, shton se këtë vit është rritur kërkesa për blerje në periferi nga vendasit për qëllime biznesi, nëpërmjet rishitjes dhe dhënies me qira. Z. Harizi tha se në Paskuqan vihet re një rritje e madhe e kërkesës për strehim, për shkak të zhvillimit që po merr zona, por edhe çmimeve më të lira krahasuar me vende të tjera periferike.

Vijon shtrenjtimi i çmimeve për pronat e qendrës së Tiranës

Në 6-mujorin e parë të 2023, sipas rezultateve të vrojtimit “Tregu i pasurive të paluajtshme” dhe indeksit të çmimit të banesave të Bankës së Shqipërisë u raportua rënie e lehtë e çmimeve të shitjes në zonat e periferisë dhe jashtë Tiranës, ndërsa në zonat e qendrës, çmimet mesatare shënuan rritje.

Indeksi i Çmimit për Tiranën u rrit gjithashtu, me 13,3% ndaj periudhës paraardhëse, duke treguar pak ndryshime në terma vjetorë. Kjo ecuri u diktua nga rritja me rreth 29% e çmimeve mesatare për pronat e shitura në qendër të kryeqytetit, krahasuar me periudhën paraardhëse.

Ndërsa në zonat periferike dhe ato jashtë kryeqytetit, sipas të dhënave të indeksit “Fischer”, çmimet kanë treguar rënie shumë të vogla.

Në zonat afër qendrës, tendenca e rritjes së çmimeve të shitjes vijoi edhe në 2024. Në hyrje të Komunës së Parisit, në të tre objektet e reja rezidenciale që po zhvillohen, çmimet e apartamenteve janë nga 2,300 deri në 2,500 euro për metër katror. Vjet, çmimi i tyre maksimal ishte 2,300 euro për metër katror (rritja 9%).

Në një nga komplekset bashkëkohore rezidenciale në Unazën e Vogël të qytetit (pranë rrugës së ish-ndërmarrjes frigoriferi) sipas zyrës së shitjes, çmimet nisin nga 2,100 deri në 2,300 euro për metër katror.

Ndërtuesit në zonën e ish-Bllokut edhe sivjet ofrojnë prona me çmime shitjeje mbi 3,500 euro për metër katror.

Rritja e çmimeve për pronat e qendrës së Tiranës, sipas Dritan lekës, vjen pas disa vitesh qëndrueshmëri, si pasojë e lejeve dhe ndërtimeve të reja që po realizohen. Sipas tij, bëhen më tepër blerje pronash në zonat qendrore nga bizneset.

“Qendra e kryeqytetit po ndryshon me ritme të shpejta, duke u afruar gjithmonë e më shumë me qytetet kryesore europiane. Arkitektë të huaj të njohur po realizojnë projekte mjaft tërheqëse, si vizualisht edhe teknologjikisht. Ky zhvillim ka sjellë vëmendje ndaj qendrës së qytetit dhe si pasojë, edhe rritjen e çmimeve.

Në këto zona po zhvillohen kryesisht godina biznesi dhe blerësit janë kompani të ndryshme, vendase dhe të huaja”, pohon ai.

Shtrenjtohen sërish kullat

Pavarësisht debatit nën zë të ekspertëve se të hyrat e parave të pista në Shqipëri po pastrohen në ndërtim dhe kureshtjes së turistëve të huaj për grataçielat luksoze, shtrenjtimi i çmimeve të shitjes te këto objekte nuk ndalet.

Për vitet 2022-2023, çmimi i apartamenteve në një nga ndërtimet luksoze në Tiranë, “Book Building”, që ka filluar të ndërtohet pas Sahatit, arriti në vlerën e 5,000 eurove për metër katror, sipas zyrës së shitjes së kontaktuar më herët nga “Monitor”.

Nga zyra e shitjeve gjithashtu më parë u pohua se edhe në “Rainbow Center” tek ish-Blloku, që është godinë me 7 kate (nga të cilat dy kate janë qendra tregtare) apartamentet u shitën gjithashtu me çmim 5,000 euro për metër katror.

Këtë vit në kullën pas Sahatit, sipas ndërtuesve, çmimet e rishitjes arrijnë deri në 5,500 euro për metër katror (rritja 10%).

Ndërsa në kullën pas Presidencës, çmimet e shitjes kanë arritur në 4,800 euro për metër katror nga 4,000 euro që ishin në fazën e parë të ndërtimit (rritja 20%).

Të “Building Ekspozita”, çmimet e shitjes vijojnë të jenë mbi 3,500 euro për metër katror.

Në një tjetër kullë, “Eyes of Tirana”, çmimet e shitjes së apartamenteve janë mbi 3,500 euro për metër katror dhe të ambienteve për biznes, mbi 6,000 euro.

Ekziston një debat për çmimet e deklaruara nga zyrat e shitjeve për pronat luksoze në Tiranë dhe çmimit përfundimtar nga transaksionet e shitjes. Erjon Harizi, nga Shoqata e Ndërtuesve të Shqipërisë, pohon se çmimet e pronave të shitura në Tiranë nuk kalojnë në vlerën e 3,500 euro për metër katror.

Ai thotë se pjesa dërrmuese e sipërfaqes së ndërtimit të kullave shërben për hotel dhe ambiente biznesi, ndërsa numri i njësive të biznesit janë të pakta.

Shumica e njësive të banimit dhe të biznesit në kullat e kryeqytetit shiten nëpërmjet zyrave të shitjes të vetë kompanive ndërtuese. Agjencitë imobiliare përfshihen në shitje për një numër shumë të ulët pronash në këto ndërtesa, kryesisht në apartamente që u përkasin pronarëve të truallit, apo raste rishitje nga blerësi i parë./Monitor

“Kur vinte babi në shtëpi, futesha poshtë krevatit”-Roza Lati: Rita ka ngrënë dru për kukullën time

Moderatorja Roza Lati ka bërë një rrëfim prekës për fëmijërinë e saj, teksa ka treguar dhunën që i ati ushtronte ndaj saj dhe të ëmës, Rita Lati.

Prezantuesja u shpreh se aktorja është dhunuar nga i shoqi, pasi i bleu një kukull.

“Një kukull e thjeshtë por në 92′-93′ ishte diçka e madhe. Mami ma bleu dhe im atë nuk kishte qejf që paratë të shpërdoroheshin pa i marrë lejë. Rita ime ka ngrënë një dru për kukullën time. Dhe unë shkova ne tualet dhe qava. Isha vetëm 5-vjeçe. Pasi qava, para pasqyrës qeshja me zor që kur të dilja mos ta shihte babai që kisha qarë”.

Gjithashtu ka rrëfyer se kur i ati i ndjerë kthehej në shtëpi futej poshtë krevatit dhe se është larguar nga shtëpia së bashku me Rita Latin vetë me një çantë dore.

Vrapimi në mot të ftohtë djeg shumë yndyrë, nxit metabolizmin dhe mbron zemrën

Dimri vjen me temperatura të ulta, dita shkurtohet, moti përkeqësohet. Moti i keq i dimrit shpesh i detyron njerëzit të mbyllen brenda dhe të zëvendësojnë rrugët e parqet me palestra dhe salla.

Hulumtimet e fundit, megjithatë, tregojnë se përfitimet e vrapimit në mot të ftohtë janë më të mëdha se sa në muajt e ngrohtë.

Në veçanti, studiuesit argumentojnë se moti i ftohtë ndihmon vrapuesit të djegin më shumë yndyrë, të humbin më shumë peshë dhe të ndihen më të shëndetshëm në përgjithësi.

“Moti i ftohtë nuk duhet t’i mbajë vrapuesit brenda. I inkurajoj pacientët e mi që të vazhdojnë të vrapojnë jashtë ,” tha Joshua Blomgren, asistent profesor në Qendrën Mjekësore të Universitetit Rush në Çikago.

“Ushtrimi është ilaç, edhe në dimër”, shtoi ai.

Vrapimi në mot të ftohtë shkakton më pak stres në trup, gjë që e bën vrapimin në dimër më të lehtë sesa në verë, shtoi Dr. Blomgren. 

Temperaturat më të larta të trupit shoqërohen si me sforcim të shtuar ashtu edhe me tendosje shtesë në zemër, mushkëri dhe metabolizëm.

Georgina Rodriguez zbulon të ardhmen e Ronaldos: Edhe një vit për Cristiano-n, pastaj mbaron

Partnerja e Cristiano Ronaldos, Georgina Rodriguez, ka zbuluar të ardhmen e yllit të futbollit duke treguar se ai mund të tërhiqet nga fusha e blertë pas një ose dy vitesh.

Sulmuesi portugez është nën kontratë me skuadrën saudite Al-Nassr FC. Modelja, e cila ishte në Javën e Modës në Paris të shtunën, zbuloi se kur do të dalë në pension 39-vjeçari.

“Edhe një vit për Cristiano dhe pastaj ka mbaruar. Ndoshta dy, nuk e di”, u shpreh Georgina, siç tregohet në një video që është bërë virale në X.

Arrestim VIP në shtëpinë e yjeve

Nga Lutfi Dervishi

Arrestimet janë gjithmonë të bujshme, por kur këto ndodhin brenda Big Brother, ngjarja bëhet një film i pa harrueshëm.

Liam Osmani, në mënyrën më befasuese të mundshme, sfidoi të gjitha parashikimet duke u bërë protagonisti kryesor i një operacioni policor në zemër të një ndërtese që deri më sot ishte e famshme veç për zënkat e yjeve për një copë djathë të mbetur në frigorifer apo për debatin e nxehtë nëse toka është e sheshte apo e rrumbullaket.

Në vend të strategjive të stërholluara për të fituar simpatinë e publikut, ai zgjodhi një rrugë më të drejtpërdrejtë dhe emocionuese: Të bëhet objektivi i një ndjekjeje policore.

Në një akt që mund të konsiderohet si strategjia më revolucionare në historinë e Big Brother, Osmani ndryshoi dinamikën e lojës. Në vend që të kërkonte aleancat brenda shtëpisë, të niste nga thashethemet dhe provokimet e rëndomta, ai zgjodhi një aleat jashtë shtëpisë “më të famshëm”, Prokurorinë e Tiranës.

Ndërsa banorët aty investojnë kohë dhe nerva për t’u lidhur e zgjidhur me banoret e tjerë, Osmani zgjodhi rrugën e sigurtë drejt rikthimit të famës së dikurshme: Të bëhet protagonisti i një arrestimi në kohë reale, duke i dhënë kështu “reality show” një kuptim krejt të ri.

Në vend të një finale me lot, ngasherime e perqafime, Osmani, me një lëvizje të papritur, nderroi statusin e tij nga personi më i kërkuar në personin me të klikuar, duke i dhënë kuptim të ri fjalës “vip” – Very Idiot Person ose Very Important Prisoner.

Ndoshta mësimi më i madh që mund të nxirret nga kjo sagë policore është se në kërkimin për famë, disa zgjedhin të këndojnë, të kërcejnë, ose të bëjnë humor, ndërsa të tjerët… thjesht kërkojnë prangat live në televizion.

Lojtari i ri na mësoi se nuk ka nevojë të vrasësh mendjen për votat e publikut kur mund të sigurosh vëmendjen e tij me një operacion policor.

Në fund të fundit, çfarë është më emocionuese të shohësh një person që tenton të fitojë 100 mijë euro duke qëndruar i fshehur brenda një shtëpie me kamera, për javë të tëra apo të jesh dëshmitar i arrestimit të tij në transmetim direkt?

Siç deklaron vetë, ai dinte se ka kallëzim ndaj tij dhe jo dënim.

Pasi ka udhëtuar me avion nga Gjermania për t’u futur në BB VIP, ka kaluar pa problem kontrollin kufitar në Rinas. Vellai i Madh do të hapë zarfin e zi për të zbuluar si ka ndodhur ky kalim. Ndërsa ai nga shtëpia më e famshme, perfundoi te shtëpia pa qera.

Lojtari i shtëpisë se famshme provoi katerciperisht përsëri e përsëri që VIP në Shqiperi nuk mund të jesh nëse nuk je i denuar per mashtrim dhe më e rendesishmja, edhe policia e ndjek Big Brother-in.

Le të shpresojmë se kryetarë bashkish, deputetë apo ministra të caktuar nuk do të ndjekin këtë strategji loje por do të jenë më të sofistikuar.

“Më kërkoi 4-she në hotel”- Vëllai i Meriton Mjekiqit paralajmëron padi për Dario Dokën

Vëllai i Meriton Mjekiqit iu është përgjigjur akuzave të make-up artist, Dario Doka i cili ka pretenduar se banori i BBV i ka kërkuar të kryejnë marrëdhënie në grup.

Ai u shpreh se ka folur me avokatin dhe do të ngrejë padi ndaj tij.

“Do ketë padi për secilin që bën deklarata të tilla. Kam folur me avokatin në Prishtinë”, tha Rinor Mjekiqi në “Fan Club”.

Dario Dako pak ditë më parë sulmoi moderatorin në një postim në rrjetet sociale, ku u shpreh se Meritoni i kërkonte të bënin 4-she në grup dhe sipas tij kur e refuzoi ai i bëri bllok.

“Shpifës, injorant, burracak. Harron Meritoni që shkruante për 4-she në hotel, dhe pasi nuk pranova më bëri bllok…ahh që s’jam aty t’ia plas njëherë fytyrës ordiner”, shkroi ai.

Në një lidhje telefonike në “Fun Club”, ai u shpreh se është gati që të përballet me moderatorin e njohur për këto deklarata.

“Unë gjërat që them nuk i them për vëmendje, janë të vërteta dhe unë mbaj përgjegjësi për gjërat që them. Ka 5-6 vite që ka ndodhur, nuk po e akuzoj, po them që ka ndodhur, kam folur në kamer me të, por dhe të kisha mesazhe nuk kam pse i nxjerr se janë private.

Nuk pranova të takohem se nuk jam tip që bëj nga këto gjëra dhe më bëri bllok menjëherë pasi refuzova. Jam gati të përballem me të nëse ai e kërkon”, tha Dario Doka.