Vendimi për kthimin mbrapsht të emigrantëve vetëm dy ditë pas vendosjes së tyre në vendin tonë, vjen pas urdhërit të gjykatës së Romës një ditë më parë, e cila tha se vendet nga vinin emigrantët, konkretisht Bangladeshi dhe Egjipti nuk janë vende të sigurta. Për këtë arsye ata duhet të qëndrojnë në territorin e vendit ku kanë bërë kërkesën e azilit.

Skema është njësoj edhe për personat e mitur, personat vulnerabël, dhe gratë, gjë që ka minimizuar në maksimum numrin e personave të përshtatshëm për tu sjellë në Shqipëri.

Janë 22 vende të cilat shteti Italian i konsideron të sigurta, përfshirë Bangladeshin dhe Egjiptin nga kishin origjinën refugjatët e parë që u sollën në Shqipëri, por një gjë e tillë është hedhur poshtë nga gjykata ndërkombëtare e të drjetave të njeriut, të cilës gjykata e Romës iu referua për vendimin e një dite më parë.

Ky vendim ishte një goditje për marrëveshjen miliona euroshe dhe shumë të diskutuar mes Romës dhe Tiranës.

Vendimi hedh dyshime të mëtejshme mbi realizimin dhe zbatimin e planeve të BE për emigrantët, të diskutuara edhe në mbledhjen e kësaj jave ku marrëveshja Shqipëri-Italia u sugjerua të merej si model nga vetë presidentja e Komisionit Europian, Ursula Von Der Leyen.

Pas vendimit të gjyaktës së Romës, kryeministrja Meloni u shpreh e vendosur duke thënë se Italia nuk do të tërhqiet nga kjo marrëveshje. Partia e saj gjithashtu, “Vëllezërit e Italisë”, dënuan vendimin e gjykatës ndërsa ministri i punëve të brendshme tha se do ta apelojë.

Opozita nga ana tjetër kritikoi ashpër qeverinë dhe e quajtën dështim marrëveshjen, duke përmendur faktin që vetëm udhëtimi i parë i 16 emigrantëve të paligjshëjm në shqipëri kushtoi të paktën 250 mijë euro.