Shqipëria lë pas Spanjën, Greqinë, Serbinë, Luksemburgun, Sllovakinë e shumë vende të tjera dhe e tregton naftën me çmime si të Gjermanisë, Italisë, Danimarkës, Anglisë e vendeve të tjera ku standardi i jetesës është shumë herë më i lartë dhe pagat mesatare disa herë më të larta se në vendin tonë.

Çmimi i naftës për Shqipërinë është 1.73 dollarë për litër ose 192 Lekë,  më shumë se sa në Greqi, Spanjë e Luksemburg.

Por ditët e fundit, shumë pika tregtimi të naftës në vend e kanë kaluar dhe këtë nivel duke arritur deri në 198 lekë për litër.

Sipas Bankës së Shqipërisë dhe Ministrisë së Financave rritja e menjëherëshme nuk është për t’u shqetësuar.

Por sipas ekspertëve, çmimi i naftës është ndër shkaqet kryesore të rritjes së çmimeve të produkteve ushqimore e mallrave të tjera.

Ministrja e Financave, Delina Ibrahimaj tha se shtrenjtimi i karburanteve është pasojë e rritjes së arit të zi në bursa. Por sipas indeksit global, kjo rritje nuk është reflektuar në vendet e tjera.

Në indeks rezulton se mestarja e çmimit të naftës në në botë është 1.14 dollarë për litër (123 lekë), por vërehet diferencë e madhe mes vendeve të varfra dhe të pasura.

“Si një rregull i përgjithshëm, vendet e pasura kanë çmime më të larta të naftës, ndërkohë që vendet e varfra dhe prodhuesit kanë cmime më të ulta”, thuhet në raportimin e ideksit global.

Por ky rregull nuk vlen për Shqipërinë. Çmimi i naftës, sipas ekspertëve, në Shqipëri çmimi rëndohet jo vetëm nga taksat që qeveria mbledh përmes tij, por edhe nga abuzimet nga grosistët, të cilët kanë pozita dominuese në treg. /Zoom.al