Shqipëria mbetet e ndjeshme ndaj pastrimit të parave për shkak të korrupsionit, rrjetit të krimit të organizuar dhe institucioneve të dobëta ligjore dhe qeveritare.

Më tej, raporti vijon:

“Krime të mëdha që krijojnë të ardhura në Shqipëri përfshijnë trafikun e drogës, evazionin fiskal dhe kontrabandën. Organizatat kriminale shqiptare kanë lidhje me rrjetet që veprojnë në Evropë dhe Amerikën e Jugut. Shqipëria regjistroi një progres me përdorimin e ligjit të konfiskimit antimafia, duke përfshirë konfiskimin e 40 përqind të pasurive që i përkasin mbretit famëkeq të drogës, Klement Balili, i quajtur “Eskobari i Ballkanit”. Reformat gjyqësore në vazhdim, duke përfshirë vettingun e gjyqtarëve dhe prokurorëve për të çrrënjosur korrupsionin nga sektori i drejtësisë dhe krijimi i njësive të shumta të specializuara të policisë që synojnë financat dhe krimet ekonomike, kanë përmirësuar perspektivat e Shqipërisë për adresimin e pastrimit të parave. Sidoqoftë, këto përpjekje vështirësohen nga sfidat e drejtësisë së krijuar së fundmi dhe korrupsioni i përhapur, që minon shtetin e së drejtës”.

Departamenti Amerikan i Shtetit ndalet te metodologjitë e pastrimit të parave:

“Trafikimi i narkotikëve dhe aktivitetet e tjera të krimit të organizuar janë burimet kryesore të pastrimit të parave. Afërsia e Shqipërisë me Evropën Perëndimore dhe prania e shqiptarëve në organizata kriminale të Evropës Perëndimore dhe Amerikës së Jugut rrit problematikat. Investime në pasuri të paluajtshme dhe projektet e zhvillimit të biznesit janë ndër metodat më të përhapura të pastrimit të paligjshëm të të ardhurave. Boshllëqet ligjore në legjislacionin AML 2019 lejojnë ende veprimtarinë e kazinove në vendpushimet me pesë yje dhe ato turistike”.