Mësohet se Eni Qirjako është lënë me masën e sigurisë “detyrim paraqitjeje”, ndërkohë për 3 të tjerët është dhënë masa e sigurisë “arrest shtëpie”.

Në një dalje për mediat, kryeprokurorja e Tiranës Elizabeta Imeraj, tregoi edhe skemën se si vepruan katër të akuzuarit.

“Specialistja e IT-së, e punësuar tek AKSHI ka pasur akses tek pagat, ka hyrë dhe i ka marrë të dhënat, i ka shpërndarë tek kolegu i saj, pa autorizim ua ka shitur subjekteve private”, tha ajo.

Referuar dosjes hetimore, transferimi i të dhënave është bërë në periudha të ndryshme kohore, nga tetori i vitit 2020 deri në shtator të vitit 2021. Të dhënat dyshohet se janë nxjerrë nga databasa e sistemit CATS.

Qirjako është vënë në dijeni të shpërndarjes së pagave në dhjetor të vitit të kaluar dhe ka konstatuar se data e ora e krijimit të file-ve që janë bërë publike përmes WhatsApp-it përkon me të dhënat që i ka dërguar kolegut të saj, Andi Agarat.

Për këtë ajo ka vënë në dijeni drejtorin e saj Ervin Muça, ndaj të cilit po zhvillohen hetime në gjendje të lirë. Kryeprokurorja Imeraj paralajmëroi edhe një tjetër hetim, pas publikimit të më shumë se 530 mijë targa të mjetesh të qytetarëve.

“Kemi sekuestruar edhe serverat në DPRSHTR pas daljes së targave”, tha ajo.