40-vjeçari, i cili është djali i xhaxhait të biznesmenit, Ardian Nikulaj që u vra më 19 prill brenda lokalit të tij në Lezhë, u qëllua me breshëri plumbash brenda automjetit të tip ML, nga një makinë në lëvizje.

Eno Nikulaj u dërgua në spitalin e Lezhës por nuk i mbijetoi plagëve të marra duke ndërruar jetë.

Burime për Zoom.al raportojnë se atentatorët e Eno Nikulaj lëviznin me një automjet tip BMW me targa AB138HT.

Targat janë vjedhur në Tiranë më 29 nëntor 2023 pranë komisariatit nr.6. Ndërkohë një automjet është duke u djegur tek ura e tubit në Rinas pranë aeroportit, makinë kjo që dyshohet se është përdorur nga atentatorët.

Atentati ndaj Eno Nikulajt dyshohet se gjithashtu është kryer për gjakmarrje, e njëjta arsye pse u vra edhe biznesmeni Ardian Nikulaj.

Ky i fundit u ekzekutua mesditën e 19 prillit 2023, orës 13:25, nga një grup personash me pagesë teksa po pinte kafe në biznesin e tij.

Edmond Haxhia akuzohet se ka porositi vrasjen e Ardian Nikulajt. Haxhia është djali i dajës së  Elton Lekstakajt i cili kishte pasur konflikt me viktimën që prej vitit 1997.

Dyshohet se Haxhia ka paguar ekzekutorin portugez dhe katër bashkëpunëtorët e tij nga Britania e Madhe, mes të cilëve edhe një grua, konkretisht: Ruben Saraiva, Harry Simson, Thomas mithan, Steven Hunt dhe Harriet Bridgeman.

Gjakmarrja mes dy fiseve

Historia e përplasjeve mes fiseve Nikulaj dhe Lekstakaj në Lezhë e ka zanafillën në vitin 1996, ku konflikti nisi në një karburant në dalje të qytetit të Lezhës për 10 mijë lekë të vjetra.

Vëllai i Ardian Nikulaj bashkë me një përson tjetër ishin shitës në karburantin në fjalë dhe një nga pjesëtarët e familjes Lekstakaj po furnizonte makinën. Pas furnizimit me karburant shitësit kanë debatuar me drejtuesin e mjetit me pretendimin se nuk kishte bërë pagesën prej 10 mijë lekësh të vjetra të furnzimit me karburant.

Pas debatit verbal drejtuesi i mjetit është larguar, duke u rikthyer i armatosur disa minuta më vonë dhe ka qëlluar në drejtim të dy punonjësve duke i lënë të vdekur në vend mes të cileve dhe vëllain e Ardian Nikulaj.

Aty nis dhe historia e gjakmarrjes, ku pak muaj më vonë vriten Gëzim Lekstakaj dhe Laurent Gjetja që ishte nip i familjes. Ndërsa në vitin 1999 vritet Gjovalin Lekstakaj dhe plagoset rëndë Pjetër Lekstakaj, ngjarje këto të pazabardhura.