zoom

Politikë

Berisha përsëri në konferencë dy orë para seancës, e quan sulm të Ramës dhe Sorosit ndaj opozitës

Ish-kryeministri Berisha doli përsëri sot në konferencë para mediave, ku ritheksoi se hetimi dhe masa ndaj tij është sulm i qëllimshëm ndaj opozitës dhe se nuk e njeh masën e paligjshme të Gjykatës. Ai këmbënguli se është shkelur Kushtetuta.

Ndërsa sot pritet që të zhvillohet seanca tjetër ndaj ish-kryeministrit, Berisha ka akuzuar sërish prokurorët e gjyqtarët e SPAK. Berisha sulmoi prokurorët që po hetojnë dosjen e klubit Partizani, ai tha se ata janë të lidhur me pushtetin kriminal të Edi Ramës dhe George Soros.

“Kur një fakt i vetëm të paraqitet unë marrë çdo vendim, por të garantoj se me falsitet, trillime dhe shpifje kurrë nuk mund të ketë gjë që të detyrojë Berishën të tërhiqet. Reforma që kanë përfituar qindra mijëra shqiptarë. Jam krenar për to, transformova çështjet e pronësisë. Nëse një familja i imi ka përfituar 1 metër katror në kundërshtim me ligjin atëherë janë përgjegjës. Të thuash se ku i mori paratë që hyri me 113 metër tokë dhe doli me 5 mln siç bëjnë organet e Soros dhe skapistët e Edi Ramës, do të thotë të mashtrosh në mënyrën më groteske. Ai që përfundoi me 5.4 mln euro, ishte investitor me marrëveshje, të firmosur të noterizuar që në vitin 2008. Ai vendosi kon në themel të këtij aktiviteti dhe kontributi i tij ishte jo 113 metra tokë, ishte 1250 metër katrorë tokë se bleu tokat e kushërinjve. Qindra e qindra apartamente u ndërtuan me paratë e shitjeve në themel. Bektashi vendosi më shumë para, maltezi vendosi më shumë tokë. Nuk ka gjë më të pafytyrë dhe të pandershme”, tha Berisha.

Ndonëse avokatët e tij paralajmëruan se do të padisin gjyqtaren Irena Gjoka për shpërdorim detyre, Berisha thotë se nuk është në dijeni nëse është depozituar kërkesa. A kanë depozituar apo jo s’di të them se nuk kam pasur komunikim. Kërkesa është reale, ajo do përballet me të gjithë procesin ligjor. Ka shkelur Kushtetutën./ZOOM.AL/