Me flamurë në duar dhe duke brohoritur “Berisha, Berisha”, ose “Rama ik, Basha ik”, një numër i madh qytetarësh “pushtoi” automjetin e Sali Berishës ndërsa ky i fundit zbriti për t’i përshëndetur.

Me flamujt kombëtarë dhe ata të Partisë Demokratike në duar, qytetarët bllokuan rrugën, ndërsa Policia Rrugore mundohet të sigurojë qarkullimin e automjeteve.

Disa ditë më parë Sali Berisha organizoi “Foltoren” e Gjirokastrës ku adresoi ndër të tjera edhe çështjen e krizës së paralajmëruar energjitike dhe nuk nguroi që ta cilësonte sërish liderin e PD, si një peng të kryeministrit Edi Rama.

Ndërkohë, në PD situata duket e tensionuar pasi vetëm dje kryetari i partisë i bëri të ditur Flamur Nokës se është shkarkuar nga pozicioni si nënkryetar i Komisionit të Sigurisë Kombëtare ndërsa e paralajmëroi se mund ta përjashtojë edhe nga Grupi Parlamentar i PD –së.