Seanca u mbajt me dyer të mbyllura, teksa dy të ndaluarit mohuan respektivisht përfshirjen dhe qëllimin e sulmit. Dritan Nano dhe Dorian Alia nuk e kanë pranuar akuzën, duke deklaruar se ngjarja nuk ka qenë e organizuar.

Ndërkohë vijon të jetë e njëjta gjendja shëndetësore e avokatit Sokol Mëngjesi, me të njëjtat parametra. Vazhdon të jetë në monitorim intensiv nga stafi mjekësor në reanimacion, ku i bëhen ekzaminime herë pas here për të parë gjendjen e tij.

Prokuroria e Tiranës dorëzoi aktet e dosjes dhe kërkoi “arrest me burg” për dy të arrestuarit e deritanishëm, Dritan Nano si urdhërues i dyshuar i krimit dhe Dorian Alia si autor i agresionit, të akuzuar për dhunën barbare në ish-Bllok, ndaj avokatit Sokol Mëngjesi, katër ditë më parë. Ndaj tyre rëndojnë akuzat plagosje e rëndë me dashje kryer në bashkëpunim, kundërshtim dhe goditja e avokatit po e kryer ne bashkëpunim.

Për Drivald Aliaj, Elton Kasaj dhe Romario Tabaku, prokuroria ka kërkuar caktimin e masës së sigurisë arrest me burg në mungesë, për të njëjtat akuza si Nano (foto sipër) e Alia. Kapja e tyre deri tani nuk është bërë e mundur megjithë kontrollet e ushtruara, edhe pse Policia ka ofruar 20 mijë euro shpërblim.

Alia ka thënë se Nano i urdhëroi të kryenin sulmin dhe e bënë për miqësi, por jo me qëllim për ta vrarë avokatin e ish-kryeministrit Sali Berisha, por për ta trembur. Mëngjesi ndodhet në intubim, koma artificiale, prej ditës së ngjarjes, pasi ka traumë të fortë në tru. /ZOOM.AL/