Ai ka treguar nëse Monika Kryemadhi do të kandidojë për postin e Presidentin, pasi ajo u la jashtë Kryesisë. Meta u shpreh se gara është e hapur në të gjitha nivelet, duke shtuar se kushdo është i ftuar të konkurrojë pa asnjë përjashtim.

“Jemi të hapur për garë në të gjitha nivelet, gara është e hapur për Presidentin, gara është e hapur për zv.President, janë dy figurat kryesore të partisë. Kushdo është i ftuar të konkurrojë pa asnjë përjashtim. Mirëpresim çdo alternativë që konkurron me 5 prioritetet tona dhe fuqizon PL si forcë politike opozitare në këtë regjim të korruptuar”, tha Meta.

Ish-presidenti foli edhe për një aleancë dhe koalicion me ish-kryeministrin Sali Berisha në të ardhmen. Ai theksoi se kushtet janë që Sali Berisha të mos bëjë kompromis me parimet e tij, dhe sipas Metës, edhe me “regjimin e Edi Ramës”.

Kreu i PL-së theksoi se Partia Demokratike duhet të organizohet më fuqishëm, duke shtuar se ndryshimi do të ndodhë shumë shpejt dhe do të jetë shumë i fortë.

“Kushti i vetëm është që Berisha të mos bëjë kompromis me parimet e tij dhe me regjimin e Ramës, asgjë tjetër. E përshëndes doktorin për qëndresën e tij, PD të organizohet më shpejt dhe më fuqishëm, Kjo gjë do të ndodhë shumë shpejt, ndryshimi do të jetë shumë i fortë”, tha Meta. /ZOOM.AL/