zoom

Aktualitet

Vrau Kejsi Hysën për kanabisin e humbur, Italia kap Agron Tufën. Dosja dhe dënimi me 30 vjet burg

Policia njoftoi se i shumëkërkuari Agron Tufa, i dënuar nga Gjykata e Krujës me 30 vjet burg në mungesë për vrasje, është arrestuar ne Bari të Italisë.

Agron Tufa është dënuar për vrasjen makabre të Kejsi Hysës (foto), nën dyshimin e prishjes së pazareve të drogës, teksa viktima njihej si fajdexhi dhe ishte hetuar dhe akuzuar po për një vrasje në bashkëpunim në Sarandë, shtatë vite më parë.

Gjykata e Krujës me trupë gjyqësore të deleguar nga KLGJ, Shefkie Demiraj dhe Kastriot Gramshi, e dënoi me 30 vite burg të shumë kërkuarin e drejtësisë Agron Tufa më 18 qershor 2021, nën akuzë për vrasjen e Kejsi Hysës. Ai u dënua në mungesë me 30 vite burgim për vrasje me dashje.

Masakrimi i Kejsi Hysës dhe fshehja e kufomës në afërsi të Niklës ndodhi për shkak të pazareve të kanabisit. Ngjarja tronditi vendin në 2018, viktima i la të ruajë rreth 50 kg kanabis, Hysni Ramaj i cili është dënuar më herët me 30 vite burgim.

Ai ka treguar gjithë dinamikën e vrasjes, pasi sipas tij pas humbjes së ngarkesës viktima kërkoi paratë dhe konfliktet kanë kulmuar në një parcelë me hashash, që disponohej nga Ramaj dhe Tufa të cilët mbasi e vranë e vodhën varësen e floririt dhe orën Rolex e varrosën.

Kush është Kejsi Hysa?

Kejsi Hysa është ekzekutuar në korrik të vitit 2018. Ai njihej në Krujë si fajdexhi, pasi jepte borxh në kërkim të intersit. 34-vjeçari që gjykohej në Sarandë për akuzën e vrasjes, dhe ishte në kërkim, qëndronte i lirë në këtë zonë në Krujë që sipas Prokurorisë ai kryente aktivitet kriminal në fushën e tregtimit të drogës dhe administronte një lokal, të quajtur bar “Nikla”.

Pikërisht në këtë lokal është njohur dhe me Hysni Ramën, me të cilin kishte krijuar një marrëdhënie të ngushtë dhe besim shoqëror, duke i dhënë herë pas here sasi droge për ta mbajtur në ruajtje në banesën e tij.

Për këtë shërbim, Hysni Ramën e paguante 100 deri në 200 euro. Por hera e fundit që i ka dhënë 50 kg drogë për ruajte, nuk ka qenë e suksesshme. /ZOOM.AL/