Klinika Infektive në Prishtinë u ka dhënë rreth 20 të sëmurëve plazmë konvaleshente nga gjaku i pacientëve të cilët e kanë kaluar sëmundjen.

Sadiku: Sigurisht që ka filluar në dy-tri javët e fundit aplikimi i plazmës konvalescente tek ne. Efektet është herët me fol sepse është një numër shumë i vogël i pacientëve. Konsiderohet se si edhe në vendet tjera që plazma konvalescente mund të ndihmojë pacientin.

Plazma konvaleshente dallon nga plazma normale e gjakut prej pranisë së antitrupave që luftojnë virusin vdekjeprurës, SARS-CoV-2.

Bukurije Zhubi, drejtoresha e Qendrës Kombëtare për Transfuzion të Gjakut (QKKTGJ), bën thirrje për më shumë dhurues të saj për të shpëtuar jetë.

Zhubi: Janë diku rreth 300 por jo të gjitha i plotësojnë kushtet për përdorim sepse ato duhet t’i kenë prezencën e antitrupave SARS-COV2, dhe ato që të plotësojnë kushtet kalojnë dhe prej tyre janë 35 doza deri tani.

Dhurimi i plazmës konvaleshente kryhet me kushte dhe kërkon që dhuruesi të dokumentojë me test PCR ose serologjik, prezencën e kundërtrupave.

Zhubi: Fillimisht duhet ai t’i plotësojë kriteret e përgjithshme të një dhuruesi standard të gjakut , dhe pastaj gjithashtu t’i plotësojë kërkesat specifike në këtë rast kalimin e sëmundjes COVID-19.

Kosova raporton përditë të infektuar të rinj nga koronavirusi.

Vendi po pret vaksinat e para me synimin për të imunizuar më së pari stafin shëndetësor dhe kategoritë më në rrezik, ndërsa deri në fund të vitit objektivi është imunizimi i mbi 60 përqind të popullsisë.