Komandanti Suprem i NATO-s, Gjeneral Tod Wolters aktivizoi forcën speciale shumëkombëshe të përbërë nga forcat tokësore, ajrore, detare, si një masë mbrojtëse në përgjigje të pushtimit të vazhdueshëm të Rusisë në Ukrainë.

Aktivizimi i trupave të reagimit të shpejt (NRF) nuk do të thotë se ato do të ndërhyjnë në Ukrainë, pasi këtë NATO e ka të ndaluar për sa kohë që Ukraina nuk është anëtare e Aleancës.

Një ditë më parë presidenti Biden bëri të ditur se trupat amerikane po vendosen në Evropën Lindore për të ndihmuar në forcimin e vendeve të NATO-s në lindje të Europës dhe se ato nuk do të luftojnë në Ukrainë.

Ky është një moment historik dhe hera e parë që Aleanca përdor këto forca të gatishmërisë së lartë në një rol parandalues ​​dhe mbrojtës. Më parë NATO ka përdorur element të kësaj njësie speciale në Afganistan, por vetëm për qëllime evakuimi.

Por çfarë është NRF?

Forca e Reagimit të NATO-s (NRF) është një forcë shumëkombëshe shumë e përgatitur dhe e avancuar teknologjikisht, e aftë për të reaguar në një kohë shumë të shkurtër ndaj gjithë gamës së sfidave të sigurisë nga menaxhimi i krizave deri te mbrojtja kolektive.

Ajo përbëhet nga njësi tokësore, ajrore dhe detare.

Aleatët e NATO-s vendosën të përmirësojnë NRF-në në vitin 2014 duke krijuar një “forcë majë shtize” brenda saj, të njohur si Task Forca e Përbashkët e Gatishmërisë Shumë të Lartë.

Komanda e përgjithshme e NRF i përket Komandantit Suprem të Aleatëve për Evropë (SACEUR).