Vaksinat kanë qenë pjesë e një donacioni nga Norvegjia.

“Si Ministri e Shëndetësisë kemi lajmëruar qysh në fillim se afati i tyre është deri më 31 gusht”, tha Vitia.

Duke folur në një konferencë për media në Prishtinë, ai tha se “dezinformatat për afatin e këtyre vaksinave” kanë bërë që të mos ketë besim dhe që qytetarët të refuzojnë marrjen e tyre.

Vitia tha se Kosova, aktualisht, nuk është në situatë kur mund të zgjedhë vaksinën, “sidomos kur ato janë të sigurta”.

“Vaksinat që janë në stoqet tona, janë të sigurta”, tha Vitia, duke shtuar se sigurinë e tyre e garantojnë edhe mekanizma si: Organizata Botërore e Shëndetësisë, Agjencia Evropiane e Barnave apo Administrata e Ushqimit dhe Barnave e SHBA-së.

Dy vaksinat kundër koronavirusit që përdor Kosova, janë: Pfizer/BioNTech dhe AstraZeneca.

Vitia tha se qendrat e vaksinimit në Kosovë për momentin kanë 108,856 doza të vaksinës Pfizer/BioNTech dhe 46,947 doza AstraZeneca.

Ai paralajmëroi se në ditët në vijim në Kosovë do të arrijnë edhe doza të tjera, ndërsa tha se qendrat e vaksinimit do të punojnë edhe fundjavave, duke nisur nga 11 shtatori.

Deri të mërkurën, në Kosovë janë përdorur mbi 841,000 vaksina kundër koronavirusit.

Në total, 284,269 qytetarë janë vaksinuar plotësisht.

Kosova aktualisht është duke kaluar nëpër një valë të rëndë pandemie, me mbi 27,000 raste aktive të infektuarish.