Ish-zëvendëskomandanti i Forcës Detare, Artur Meçollari, ka publikuar në rrjete sociale disa foto, në të cilat dallohen mjete të rënda që po mbushin territorin me zhavorr dhe inerte.

Meçollari shkruan gjithashtu se Policia e Sarandës ka referuar në Prokurorinë e qytetit materiale për “hedhjen e inerteve në det”. Ndërkohë që, në postimin e tij, ai ka përmendur reagimin e kompanisë koncesionare, në të cilin thuhet se: “Jemi me leje të firmosur dhe vulosur nga Edi Rama. Në këtë zonë po ndërtojmë një port turistik dhe shërbimesh, duke ndjekur të gjitha procedurat përkatëse”.

Faktet e publikuara nga ish-ushtaraku i lartë Meçollari dëshmojnë për qasjen injoruese që ka kryeministri Edi Rama ndaj vendimeve gjyqësore, aq më tepër të Gjykatës së Posaçme, e cila konsiderohet prej tij dhe partnerëve ndërkombëtarë si “guri i kurorës” së Reformës në Drejtësi.

Në shkurt të vitit 2023, Gjykata e Posaçme pranoi kërkesën e Strukturës së Posaçme Anti-Korrupsion (SPAK) për të vendosur nën sekuestro pasurinë e emërtuar “Baza Ndihmëse Limion, Sarandë”.

Në mars të 2024-s, kryeministri Rama sulmoi ashpër SPAK-un për sekuestrimin e Portit duke e quajtur absurde sekuestrimin, ndonëse SPAK ka gjetur se prona e ushtrisë i është dhënë kësaj kompanie në shkelje të ligjit.