Në krahasim me një vit më parë, kjo shumë është rritur me 4%.

Pagesat për koncesionet pritet të rriten më 12%, duke arritur në rekordin e 15 miliardë lekëve.

Ne 2022-n mbaruan tre kontrata, ajo e inineratorit të Elbasanit dhe të Fierit, të dyja nën hetim nga SPAK, dhe rimbursimi i rrugëve për ndërtimin e HEC-it mbi lumin Devoll. Ndërkohë, incineratori i Tiranës do të vijojë të marrë pagesa nga buxheti, prej gati 4 miliardë lekë, apo 34 milionë euro për periudhën 2023-2025.

Ndërtimi dhe operimi i “Rrugës së Arbrit” merr dhe pjesën më të madhe të pagesave në 2023-n, me 3 miliardë lekë, ose 22% të totalit.

Koncesionet e shëndetësisë marrin në total 5.2 miliardë lekë, ose gati 40% të totalit në 2023-n. Numri i tyre ka arritur në 4, pas fillimit nga puna të atij të laboratorëve. Sterilizimi parashikohet të paguhet me 1.75 miliardë lekë, ose 13% të totalit; laboratorët me 1.7 miliardë lekë (13% të totalit) dhe check up dhe dializa me përkatësisht 876 dhe 875 milionë lekë.

Skanimi në dogana merr çdo vit nga buxheti i shtetit gati 1.7 miliardë lekë.

Gjatë vitit 2022, Ministria e Financave dhe Ekonomisë thekson se ka vijuar monitorimin e performancës së kontratave koncesionare/PPP-ve me mbështetje buxhetore, duke monitoruar ecurinë e pagesave faktike buxhetore dhe treguesit e performancës të planifikuar/realizuar për secilën kontratë koncesionare/PPP.

Por pavarësisht deklaratave të ministrisë, rezultatet e këtyre monitorimeve nuk janë bërë ende publike, ndërsa disa nga këto koncesione si inceneratorët e Fierit e Elbasanit, sterilizimi dhe check up janë nën hetim nga Prokuroria e posaçme Antikorrupsion.