Burime zyrtare bënë me dije se ndaluan të dyshuarin në kuadër të operacionit të koduar “Tempulli 2″ dhe sekuestruan lëndën narkotike.

“Si rezultat i kontrolleve në të gjithë territorin e qarkut dhe i punës së inteligjencës policore, që po kryhen në kuadër të megaoperacionit “Tempulli 2”, shërbimet e Forcës së Posaçme “Shqiponja” të DVP Lezhë evidentuan dhe goditën një tjetër rast të veprimtarisë kriminale të shitjes në doza, të lëndëve narkotike.

Në aksin rrugor Lezhë-Kallmet, shërbimet e Policisë ndaluan për kontrolle, automjetin tip “Audi” me të cilin lëvizte shtetasi A. R.. Nga kontrollet, në këtë automjet u gjet dhe u sekuestrua në cilësinë e provës materiale, një sasi lënde narkotike cannabis sativa, e ndarë në doza, të gatshme për shitje”, thuhet në njoftimin zyrtar.

Në përfundim të veprimeve procedurale u bë arrestimi në flagrancë i shtetasit A. R., 40 vjeç, banues në Lezhë, për veprën penale “prodhimi dhe shitja e narkotikëve”.

Kurse materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme. /ZOOM.AL/