Selcuk Bayraktar, i cili drejton kompaninë “Baykar” në Stamboll me vëllain e tij Haluk, tha se dronët kishin treguar se si teknologjia po revolucionarizonte luftën moderne.

“Bayraktar TB2 po bën atë që duhej të bënte – duke nxjerrë jashtë loje disa nga sistemet më të avancuara kundërajrore, artilerisë dhe automjetet e blinduara”, tha ai për Reuters duke ekspozuar pranë dronit të ri “Akinci” në një ekspozitë në Baku të Azerbajxhanit.

Të paktën për një kohë, “TB2”, i cili ka një hapje krahësh 12 metra dhe mund të ngrihet në 25,000 këmbë përpara se të hidhet për të shkatërruar tanke dhe artileri me bomba depërtuese të blinduara të drejtuara me lazer, ndihmoi në minimin e epërsisë dërrmuese ushtarake të Rusisë.

E tillë është fama e dronit, saqë u bë objekt i një kënge patriotike të përhapur në Ukrainë, e cila tallte trupat ruse, me korin “Bayraktar, Bayraktar”.

Përtej satirës, ​​droni “Bayraktar” ka marrë vëmendjen e presidentit rus Vladimir Putin dhe ministria e Mbrojtjes e ka përmendur të paktën 45 herë në publik që nga fillimi i luftës më 24 shkurt.

“Baykar”, i themeluar në vitet 1980 nga babai i Bayraktar, Ozdemir Bayraktar, filloi të përqëndrohet në avionët pa pilot në 2005, ndërsa Turqia u përpoq të forconte industrinë e saj të mbrojtjes lokale.

“TB2” ka qenë një faktor i tillë në konfliktet në Siri, Irak, Libi dhe Nagorno-Karabakh, si dhe në Ukrainë, saqë tani kryeson shtytjen globale të eksportit të mbrojtjes së Turqisë.

Presidenti Tajip Erdogan thotë se kërkesa ndërkombëtare është e madhe për “TB2” dhe “Akinci” më të ri.

Bayraktar, i cili është i martuar me vajzën e Erdoganit, tha se “Baykar” mund të prodhojë 200 dronë “TB2” në vit.

Ai tha se ishte krenar që dronët ishin përdorur në Nagorno-Karabakh, një enklavë etnike armene e aleatit të Turqisë, Azerbajxhani, ku forcat e Bakut rimorën një pjesë të territorit në vitin 2020, dhe në Ukrainë.

“Është një pushtim i paligjshëm, kështu që TB2 po ndihmon popullin e nderuar të Ukrainës të mbrojë vendin e tyre,” tha ai.

“Okupimi i paligjshëm i Karabakut ishte si një plagë zemre që nga rinia jonë. Dhe si inxhinierë që zhvillojmë teknologjinë, është një nder që kemi ndihmuar vëllezërit dhe motrat tona këtu për të rifituar tokën e tyre.”

Rusia dy javë më parë promovoi një gjeneratë të re të armëve lazer, duke përfshirë një sistem celular, për të cilin Moska tha se mund të verbonte satelitët në orbita dhe të shkatërronte dronët.

Por Bayraktar, i cili ka lindur në Stamboll dhe ka studiuar në Universitetin e Pensilvanisë dhe Institutin e Teknologjisë në Massachusetts, tha se armë të tilla ishin joefektive kundër “TB2”.

“Rremet e tyre janë të kufizuara, kështu që nëse diapazoni juaj ndijor dhe i municionit është më i gjatë, ato nuk do të jenë efektive,” tha ai.

Baykar është duke punuar në një “TB3”, i cili ka krahë të palosshëm dhe mund të ngrihet ose ulet në aeroplanmbajtëse me pistë të shkurtër, dhe një avion luftarak pa pilot të quajtur “MUIS” ose “Kizilelma”.

“Inshallah, fluturimi i parë i “Kizilelma” do të jetë vitin e ardhshëm, dhe “TB3” ose në fund të këtij viti ose në fillim të vitit të ardhshëm,” tha Bayraktar.

“Nëse shikoni horizontin më të gjatë kohor, ne po punojmë në dronët taksi – për këtë ne kemi nevojë të zhvillojmë teknologji më të lartë të autonomisë – që në thelb është AI – por do të revolucionarizojë mënyrën se si njerëzit do të transportohen në qytete”.

Pushtimi i Rusisë ka vrarë mijëra njerëz, ka zhvendosur miliona dhe ka ngritur frikën për një konfrontim të drejtpërdrejtë midis Rusisë dhe Shteteve të Bashkuara.

Putin thotë se Uashingtoni po përdorte Ukrainën për të kërcënuar Rusinë përmes zgjerimit të NATO-s dhe se Moska duhej të mbronte rusishtfolësit nga persekutimi.