Mësohet se kreu i shtetit turk gjatë vizitës zyrtare në Shqipëri do të zhvillojë një takim me kreun e qeverisë Edi Rama në kryeministri.

Më pas pas nënshtrimit të marrëveshjeve mes dy vendeve, do të mbajë një konferencë për mediat me Ramën.

Ai do të përmbyllë vizitën zytare në Shqipëri me përurimin e xhamisë së Namazgjasë.

Axhenda:

Kryeministri i Shqipërisë Edi Rama do të mirëpresë ditën e nesërme Presidentin Republikës së Turqisë, Recep Tayyip Erdoğan gjatë zhvillimit të vizitës zyrtare në Tiranë.

Më poshtë agjenda:

12:15 – Takimi Tête-à-tête i Kryeministrit Edi Rama me Presidentin Erdoğan
Vendi: Kryeministria

13:15 – Këshilli i Bashkëpunimit të nivelit të lartë Shqipëri-Turqi

14:25 – Firmosja e marrëveshjeve respektive mes dy vendeve
Vendi: Kryeministria

14:35– Deklaratë e përbashkët e Kryeministrit Rama – Presidentit Erdoğan
Vendi: COD, Kryeministri

16:50 – Përurimi, Xhamia e Namazgjasë

Anulimi i seancës

Seanca plenare e kësaj të enjteje u anulua me një vendim të Kuvendit të Shqipërisë.

Parlamenti mori vendimin për shkak të vizitës së Erdogan, edhe si pasojë e situatës në Kuvend, ku opozita është në jonormalitet.

Rrugët që do të bllokohen

Në kuadër të vizitës në Shqipëri, të Presidentit të Turqisë, z. Recep Tayyip Erdoğan, Drejtoria Vendore e Policisë Tiranë, me mbështetjen e Drejtorisë së Përgjithshme të Policisë së Shtetit ka marrë një sërë masash të detajuara për sigurinë e vizitës së Presidentit të Turqisë z. Recep Tayyip Erdoğan, duke filluar nga aeroporti i Rinasit, shoqërimi drejt Tiranës në vendet ku do të zhvillohen takimet dhe shoqërimi drejt Rinasit, në përfundim të vizitës.

Një nga masat e planit të detajuar konsiston në sigurimin e vizitës të presidentit të Turqisë, z. Recep Tayyip Erdoğan, i cili do të zhvillojë takime në datën 10 tetor 2024, në qytetin e Tiranës.

Në këtë kuadër, Policia e Shtetit njofton qytetarët se do të ketë bllokime të disa segmenteve rrugore, si dhe bllokime të pjesshme të disa segmenteve të tjera, në varësi të takimeve dhe aktiviteteve që do të zhvillohen gjatë vizitës, në Tiranë.

Drejtuesit e automjeteve të shfrytëzojnë autostradën e re Kashar – Rinas, për të qarkulluar në drejtim të aeroportit të Rinasit, pasi aksi i vjetër Kashar – Rinas nga ora 10:00 deri në 11:30, si dhe nga ora 17:00, deri në orën 18:00, të datës, 10.10.2024, do të jetë i bllokuar.

Rrugë të tjera që do të bllokohen janë:

Nga Rinasi – Qafa e Kasharit – Mbikalimi tek Casa Italia – nënkalimi te ish-sheshi “Shqiponja”, Unazë (Astir) – Rrethrrotullimi i Saukut, Rruga e Elbasanit.

Bulevardi “Dëshmorët e Kombit”, nga Ura te ish Hotel Dajtit deri te sheshi “Nënë Tereza”, rruga “Ismail Qemali”, rruga “Papa Gjon Pali II”, rruga “Ibrahim Rugova” rruga “Ukraina e Lirë”, bulevardi “Zhan D’Ark” dhe rruga “Xhorxh Bush”.

Policia e Shtetit kërkon mirëkuptimin e qytetarëve për masat që ka ndërrmarrë dhe do të zbatojë gjatë vizitës së z. Recep Tayyip Erdoğan.