Sipas Meteoalb, sot temperaturat do të pësojnë një rënie të ndjeshme ku variojnë: në zonat malore, nga -15°C në -1°C, në zonat e ulëta nga -6°C në 06°C dhe në zonat bregdetare nga -3°C në 08°C.

Ndërkohë, meterologët thonë se temperaturat do të ngrihen pas ditës së mërkurë, por i ftohti do të rikthehet sërish në 2 shkurt.

“Ka një tërheqje të masës së ftohtë ditën e mërkurë. Zonat malore mbeten në vlera -4 ose -5 gradë që janë temperatura tipike për stinën. Do kemi një riaktivizim të të ftohtit polar në fillim të shkurtit në datë 2 shkurt.”

Ekspertët njoftuan se në valën e dytë të të ftohtit, temperaturat nuk do të zbresin në vlerat aktuale dhe maksimumi do të jetë deri në -10 gradë. Edhe shkurti pritet të jetë i ftohtë, duke nisur nga data 2, por sidoqoftë nuk priten të jenë temperaturat ekstreme që po përjeton vendi gjatë këtyre ditëve.