Pas 10 masave lehtësuese të fundjavës së kaluar, konfirmohet edhe lirimi i ish-zyrtarit të lartë vendor, ish-kreut të Kadastrës.

Në seancën e zhvilluar në orën 10:00, është paraqitur Andri Dhima, ish-drejtor i ASHK Sarandë. Ai u vetëdorëzua të shtunën në një nga pikat e kalimit kufitar, pasi ishte shpallur në kërkim për “shpërdorim detyre” në kuadër të këtij operacioni. Prokurorja Silvana Belishta ka kërkuar “arrest në shtëpi” për 36-vjeçarin Dhima.

Por gjyqtari Mikel Hysometaj ka vendosur në përfundim të seancës masën e sigurisë “detyrim për t’u paraqitur në policinë gjyqësore” për Dhimën. Ndaj këtij të fundit është aktive edhe një masë tjetër sigurimi “Garanci pasurore” për një dosje të vitit 2022.

Nga 9 të ndaluarit në kuadër të operacionit të 5 ditëve më parë, vetëm dy prej tyre janë lënë në masën “arrest në shtëpi”, ndërsa 7 të tjerë janë lënë në masën “detyrim për t’u paraqitur në policinë gjyqësore”. Gjyqtari Mikel Hysometaj nuk ka pranuar në total 5 masa sigurimi të kërkuar nga Prokuroria, duke i ndryshuar ato dhe liruar përfundimisht të dyshuarit.

Në kërkim për këtë dosje vazhdojnë të jenë Mariel Murati, ish-drejtor i ALUIZNI Sarandë, i dyshuar për “falsifikim dokumentesh” dhe “ndërtim i paligjshëm” dhe Kozeta Statha, ish-Drejtore e ASHK Sarandë, e dyshuar për “shpërdorim detyre”. Ndaj kësaj të fundit ka një tjetër masë sigurimi aktive “arrest në burg” prej marsit 2022, për një dosje për të cilën tashmë kanë filluar edhe proceset gjyqësore. /ZOOM.AL/