Sipas këtij televizioni, sinjali pësoi  “blackout” në platforma të ndryshme, përfshirë ato që vijnë nga kompanitë celulare, si Vodafone.

Syri.tv njoftoi që mbrëmë, se sinjali i tyre televiziv ishte bllokuar pothuajse në të gjithë Shqipërinë dhe jashtë vendit.

Në disa shkrime në faqen e internetit, Syri Tv raporton se Rama e urdhëroi mbylljen e transmetimit i trembur nga paralajmërimi promocional se Ahmetaj do publikonte fakte edhe për implikimin e tij dhe familjes së tij në afera korruptive.

“E pikërisht kjo intervistë e papritur e zuri Edi Ramën të papërgatitur, e duke i vënë me zor nën hyqëm mediat që komandon. Për këtë arsye, kur u lajmërua që Arben Ahmetaj do të fliste sërish dhe do të thoshte gjëra edhe më të forta, që do ta akuzonin personalisht Edi Ramën dhe familjen e tij, kryeministri i vendit tashmë i paralajmëruar, ka vendosur që marrë masa drakoniane që asnjë media të mos i japë hapësirë ish-zëvendësit të tij”, shkruan “SYRI”.

Sipas SYRI TV, pasi “Rama e fiku sinjalin në të gjitha platformat e mundshme televizive, vendosi që të t’u ulë automatin edhe medieve të tjera”.

“Diku me urdhër të drejtpërdrejtë e diku edhe me presion, Rama vendosi që asnjë media të mos përçonte deklaratat e Arben Ahmetajt. Asnjë media, as online, as gazetë as televizion mbrëmjen e djeshme deri ditën e sotme deri më tani, nuk kanë dhënë asnjë fjalë të Arben Ahmetajt”, vijohet, duke përfunduar se “tmerri i të vërtetës ka bërë që Rama këtë herë të jetë më i ashpër me ata që ka në dorë, duke ua bllokuar edhe të vetmen gjë që ju ka mbetur, fjalën”.

Intervista e Ahmetajt nuk gjeti hapësirë as mediat e Irfan Hysenbelliut Balkanweb.com apo Panorama.com.al, dy ndër mediat më aktive online në Shqipëri.

Pas këtij sulmi Syri Tv gjeti një zgjidhje ku tentakulat qeveritare nuk hyjnë dot, duke e transmetuar intervistën në platformën mbarëbotërore YouTube, aty ku të gjithë mund ta gjejnë të plotë dhe pa censurë atë edhe pas transmetimit. /Zoom.al