zoom

Politikë

“Ç’ishte gjithë kjo dashuri mes shefit të FBI-së dhe Ramës”, Bardhi: Çfarë i lidhte?

“Ç’ishte gjithë kjo dashuri e madhe mes shefit të FBI-së dhe Ramës?”– kështu u shpreh deputeti Gazment Bardhi në Kuvend, teksa deklaroi se kryeministri Edi Rama nuk iu përgjigj asnjë pyetjeje dhe se sipas tij përdori vetëm metafora dhe një lumë akuzash ndaj opozitës shqiptare.

“Siç e patë erdhi foli 45 minuta nuk tha asgjë dhe iku. Mori thjesht një lumë metaforash, sharje ndaj opozitës dhe asnjë sqarim për vendimin e drejtësisë amerikane. Kur ka akuzë për të nga drejtësia amerikane, na thotë prisni drejtësinë amerikane. Sa kohë është kryeministër fshihet pas imunit diplomatik, e për t’i bërë shqiptarëve transparencën e nevojshme do të duhej të ishte larguar nga karrigia e kryeministrit dhe të lejonte drejtësinë amerikane të hetonte. Ç’ishte gjithë kjo dashuri e madhe mes shefit të FBI-së dhe Ramës. Çfarë e lidhte shefin e FBI me një kryeministër të një vendi të vogël si Shqipëria. Është e njohur se vetëm oligarku rus Deripaska dhe Edi Rama kanë korruptuar një shef të FBI. Njëri në biznes dhe tjetri në politikë. Ish-shefi i FBI pritet të dënohet. Nëse prisnit që sot Rama të jepte shpjegime besoj se e kuptuat që në këtë çështje të sillej si i pandehur. Ky kryeministër ka kaluar çdo vijë të kuqe,”- tha Bardhi.

Kryeministri Edi Rama u shfaq i shfazuar në sallën e Kuvendit ku foli për skandalin McGonigal.

Ai u tall me aktakuzën amerikane, ku përmendet 14 herë emri i tij. Si zakonisht, Rama përdori strategjinë e sulmit ndaj opozitës dhe minimizimit të skandalit duke thënë se nuk ka asnjë komprometim që i përmendet emri 14 herë në dosje.

Rama i pranon si fakte të gjitha herët kur emri i tij përmendet në aktakuzë, si për rastet kur takohet me ish-zyrtarin e FBI-së ashtu edhe me personat A dhe B në aktakuzë, por mohon që në ndonjë rast të ketë akuza apo “krime të kryera.”

“McGonigal mori informacion nga zyra e kryeministrit për lobimin rus. Unë, apo zyra ime, nuk kishim asgjë nga ato që kishin dalë në media. Sepse po t’i kishim, çfarë do të mbronin? Lulin apo tutorin e Lulit? Po të kisha pasur çfarëdolloj informacioni për këtë fakt të tmerrshëm do t’ia kisha përcjellë kujtdo që do të mundja, nga organizatat partnere. FBI-së të parës fare. Problem për vendin do të ishte e kundërta dhe të mos tregoja. Unë nuk e di sinqerisht ku do të donit të dilnit me këtë? Rusët i kam shpikur unë? CIA në raportimin e saj e ka publikuar se PD se bashku me një parti në Mal të Zi, Bosnjë, apo Maqedoni financohen nga para ruse për të destabilizuar. Kjo është ajo që doli nga ne sipas jush? Ai rusi vetë ka deklaruar se ka ndihmuar PD-në.Aktakuza nuk thotë asgjë as për mua as për qeverinë! As për personin tjetër në fjalë unë skam lidhje me atë”, tha Rama./ Zoom.al