Zyrtarisht nuk ka ende një draft mbi ligjin që do të shkojë në Kuvend dhe të vetmet detaje publike janë ato çfarë ka thënë vetë kryeministri, apo edhe kreu i KOKSH, Fidel Ylli, ai që propozoi legalizimin e basteve. Sipas tij, të ardhurat do të taksohen me 15% dhe pritet të sjellin në buxhetin e shteti 17 mln euro brenda një viti. Këto para, do të ndahen më pas si fonde për sportin dhe kulturën.

Ndër të gjitha argumentet pro dhe kundër basteve, nga paraja e zezë tek fitimet e majme, Rama harroi të përmendte arsyen kryesore të mbylljes 5 vite më herët: varësinë.

“Do mbyllim bastet, një industri të kriminalizuar. Industri që sjell dëshpërim,1 nga 4 lojtarë ka menduar të vrasë veten. Është e pakonceptueshme. Përfytyro prindërit, sidomos nënat, dhe fëmijët iu kthehen në të sëmurë nga vesi i lojërave të fatit. Do mbyllen, ndryshe nga sa përflitet”, – do të thoshte kreu i qeverisë në tetor të 2018-s.

Problemi i rëndë i varësisë nuk është përmendur më nga asnjë palë pjesë e nismës. Asnjë pjesë e të ardhurave që pritet të arkëtohen nga taksimi i basteve online nuk është planifikuar të shkojë për këtë program.

Në vende ku ky aktivitet është masivisht i përhapur, si në vendin tonë, por ligjërisht, qeveritë ofrojnë burime për të menaxhuar varësinë, problemet me financat, si edhe reagimet agresive. Në Shqipëri nuk është përmendur një gjë e tillë, ndonëse draftligji nuk është publikuar ende. Gjithsesi, nëse një detaj i tillë do të ishte përfshirë, vështirë se kishte shpëtuar pa u përmendur nga të paktën, kryeministri i vendit.

Në një intervistë për një televizion vendas, Henri Telharaj, përfaqësuesi i Këshillit Shqiptar për problemet e lojërave të fatit u shpreh se me hapjen online, çdo kush do të ketë akses në to dhe janë më të predispozuar për të krijuar një lloj varësie.

“Hapja online ka vështirësitë e saj për shkak se varësia online nga lojërat e fatit, ka një tendencë 10 herë më të madhe, se sa nga varësia kur më përpara njerëzit shkonin nëpër lokale dhe vendosnin bast”, – u shpreh ai duke shtuar se marketingu i kompanive do ta bëjë edhe më delikate situatën.

Psikologia Gejsi Ndoja, tregon se moshat e reja janë më të prekurat.

“Përgjithësisht janë moshat 30-35 vjeç, ndoshta ato që sapo kanë filluar karrierën dhe mundohen të fitojnë sa më shumë. Por kjo nuk është kaq e thjeshtë. Janë paraqitur për stres, lodhje nga puna, ngarkesë të madhe psikologjike dhe më pas del se e gjithë kjo ngarkesë rrjedh po nga lojërat e fatit”, thotë Ndoja.

Referuar të njëjtit fjalim nga kryeministri Rama, ai tregon shifra; 1 në 4 lojtarë kanë menduar vetëvrasjen, pikërisht nga bastet dhe humbjet e tyre. Sot, 5 vite më vonë, po i njëjti kryeministër na thotë se aktiviteti është shtuar (logjikisht edhe problemet), por nuk na jep më shifra të tilla. Sipas raporteve botërorë, në vitin 2022, midis 17 dhe 39% e atyre që luajnë në mënyrë problematike janë raportuar të kenë ide për vetëvrasje dhe midis 2 dhe 57% kanë raportuar përpjekje për vetëvrasje (mosha 18-22).

Në Shqipëri nuk ka as qendra rehabilitimi, për problemet me kumarin dhe lojërat e fatit. Kështu, çdo trajtim u mbetet në dorë familjarëve, kosto të cilat nuk i shlyen kurrë asnjë shumë që buron nga bastet!/Zoom.al