Në një takim me ekipin e tij të sigurisë kombëtare, Biden u tha se po merreshin të gjitha masat e mundshme për të mbrojtur personelin amerikan dhe të tjerët në aeroportin e qytetit.

“Ditët e ardhshme të këtij misioni do të jenë periudha më e rrezikshme deri më tani,” tha zyrtari, duke shtuar se forcat amerikane po shikonin objektivat e mundshëm të IS-K.

IS-K, ose Provinca Khorasan e Shtetit Islamik, është grupi që pretendoi se qëndron prapa sulmit vdekjeprurës të enjten në aeroport.

Presidenti u informua se pavarësisht çdo kërcënimi, trupat amerikane do të vazhdojnë me misionin e evakuimit deri në afatin e 31 gushtit.

Misioni, tha zyrtari i Shtëpisë së Bardhë, do t’i jepte përparësi qytetarëve amerikanë të mbetur që donin të largoheshin, me forcat amerikane “të angazhuara në mjete të ndryshme për t’i çuar ata në aeroport në mënyrë të sigurt”.