Presidenti Trump po planifikon të rikthejë tubimet e tij në shkallë të gjerë, në mbarë SHBA, që ishin një shenjë dalluese e kandidimit të tij presidencial, por këto tubime do të kenë në fokus “procesin gjyqësor” ku ai po sfidon rezultatet e zgjedhjeve të javës së kaluar.

Qëllimi është i qartë: tubimet do të jenë në mbështetje të procesit.

Së bashku me tubimet, Trump po planifikon të përdorë nekrologjitë e njerëzve që dyshohet se votuan edhe pse nuk jetonin më. Ai po dërgon gjithashtu ekipet e rinumërimit  në Georgia, Arizona dhe Pennsylvania.

Trump ka premtuar veprim ligjor në ditët në vijim pasi ai nuk pranoi humbjen ndaj Biden. Trump dhe ekipi i tij elektoral kanë ngritur akuza për mashtrim në shkallë të gjerë në Pensilvani dhe shtete të tjera ku Biden përmbysi rezultatin. Deri tani nuk ka prova.

Pavarësisht nga këto përpjekje, ndihmësit dhe aleatët e Trump kanë pranuar privatisht se betejat ligjore – në rastin më të mirë – do të parandalonin të pashmangshmen dhe disa kishin rezerva të thella për përpjekjet e presidentit për të minuar besimin tek zgjedhjet.

Por ata thanë se Trump dhe një grup kryesor i aleatëve po synonin të mbanin në anën e presidentit mbështetësit besnikë.

Pak çaste pasi AP njoftoi fitoren e Biden, avokati i Trump Rudy Giuliani qëndroi përpara banderolës së fushatës së ngjitur mbi derën e garazhit të një kompanie peizazhit në Filadelfia, i vendosur në afërsi të një qendre kremimi dhe një librarie të quajtur “Ishulli i Fantazisë”.

“Ne nuk kemi asnjë mënyrë për ta mësuar (manipulimin), sepse na është hequr e drejta për të inspektuar fletët e votimit,” tha ai.

Në të Dielën “Sunday Morning Futures” të Fox News, Giuliani tha se dy procese gjyqësore shtesë ishin duke u hartuar, përveç çështjeve gjyqësore ekzistuese në Pensilvani.

Deri në fund të kësaj jave, Giuliani parashikoi që do të ishin ngritur “katër ose pesë” padi, me një total prej 10 të mundshëm. Avokatët republikanë planifikuan një konferencë shtypi të hënën për të njoftuar çështje gjyqësore shtesë.

Fox News, një kanal mbështetës i presidentit Trump, shkruan se mashtrimi i votuesve është jashtëzakonisht i rrallë, dhe kur ndodh, njerëzit zakonisht kapen dhe ndiqen penalisht, por rezultati i zgjedhjeve nuk ndryshon.

Zyrtarët e fushatës së Trump kanë pretenduar se më shumë se 21,000 vota ishin hedhur në emër të të vdekurve në Pensilvani. Pretendimet burojnë nga padia e një grupi ligjor konservator kundër Sekretarit të Shtetit, duke e akuzuar atë për përfshirjen e gabuar të rreth 21,000 banorëve të supozuar të vdekur në listat e votuesve.

Gjykatësi federal që ka çështjen, John Jones, ka thënë se ishte dyshues për pretendimet. Ai kërkoi prova dhe pyeti pse ata kishin pritur deri në “orën e njëmbëdhjetë” për të ngritur padinë.

Por edhe nëse ato 21,000 vota do të shpalleshin të pavlefshme, Biden do të drejtonte ende shtetin me më shumë se 20,000 vota, sipas të dhënave të publikuara nga AP, raporton Zoom.al.

Agjencia e Sigurisë Kibernetike dhe e Sigurisë së Infrastrukturës, agjencia federale që mbikëqyr sigurinë e zgjedhjeve në SHBA, vuri në dukje se zyrat lokale të zgjedhjeve kanë masa zbulimi që “e bëjnë shumë të vështirë kryerjen e mashtrimit përmes fletëve të votimit të falsifikuara”.

Zyrtarët më të lartë të zgjedhjeve në shtetet e betejës Arizona, Georgia, Michigan, Pennsylvania dhe Nevada – si republikanë ashtu edhe demokratë – të gjithë kanë thënë se nuk shohin parregullsi të përhapura në votim, as raste kryesore të mashtrimit ose aktivitetit të paligjshëm. / Zoom.al