Bardhollari dhe Hoxha u arrestuan pasi në bashkëpunim me njëra tjetrën, nëpërmjet mashtrimit përvetësuan rreth 400 milion lekë pajisje elekroshtëpiake.

Referuar hetimeve infermierja e psikiatrisë u vidhte kartat e identitetit pacientëve në spital, për t’i përdorur për kredi. Bardhollari dhe Hoxha përdornin një institucion finaciar për të tërhequr para përmes aplikimeve online duke përdorur mjetet e identifikimit pa dijeninë e pacientëve.

Elisabeta Bardhollari, nënë e dy fëmijëve kishte shkuar në dyqanin ku punonte Orjada Hoxha dhe kishte blerë disa elektroshtëpiake. Infermieria i ka pohuar shitëses se disa miq e familjarë të saj donin të merrnin disa produkte me kredi.

Pasi ka marrë aprovimin, infermieria në kohë të ndryshme u kishte vjedhur kartat e identitetit pacientëve dhe ia çonte shitëses me foto. Kjo e fundit niste procedurat e marrjes së elektroshtëpiakeve me kredi.

Rasti u zbulua pas denoncimit të bërë nga një qytetar në polici. Nëpërmjet bankës së nivelit të dytë ku merrej kredia, u identifikua fillimisht Hoxha, 32 vjeçe. Pasi u arrestua ajo pranoi veprimet që kishte kryer duke argumentuar se gjithçka e kishte bërë në mirëbesim.

Autorësinë e vjedhjes e ka pranuar në polici edhe infermieria Elisabeta Bardhollari. 39-vjeçarja i tha policisë se pasi merrte elektroshtëpiaket i shiste dhe se këto veprime i kishte bërë për shkak të gjendjes së vështirë ekonomike.

Në sajë të hetimeve janë dokumentuar 10 raste të vjedhjes, ku vetëm me kartën e identitetit të një pacienti janë marrë kredi në të paktën 4 milionë lekë të vjetra. Sipas policisë, nga operacioni i koduar “Elektro”, u sekuestruan edhe disa pajisje të ndryshme elektroshtëpiake që kapnin vlerën e 40 milionë lekëve të vjetra.

Si pjesë e kësaj skeme është proceduar dhe po hetohet në gjendje të lirë edhe një tjetër person. Ai luante rolin e shoferit që transportonte pajisjet elektroshtëpiake dhe i shiste në bashkëpunim me infermieren.

Ky nuk është skandali i vetëm në mjekësinë shqiptare. Shpeshherë janë denoncuar mjekë e infermierë që vjedhin apo mashtrojnë pacientët e tyre. Rasti më i bujshëm ishte ai i Tires, e cila mashtronte vajzën e një pacienteje me Covid duke i marrë shuma të konsiderueshme parash për t’i qëndruar afër të ëmës.