Day ArchiveE njofton Rama, Shqipëria siguron mijëra vaksina të tjera Astrazeneca

Shqipëria siguron edhe 50 mijë vaksina të tjera Astrazeneca. Lajmin e ka bërë me dije kryeministri Rama në një postim në rrjete sociale.

Ndërkohë në vend ka nisur vaksinimi masiv për të moshuarit +70 vjeç.

FOTO/ “Zhavorr elektoral”, banorët bllokojnë njerëzit e Veliajt dhe Ballukut

Kryetari i Forumit Rinor të Partisë Demoktratike, Belind Këlliçi, ka akuzuar se po hidhet “zhavorr elektoral” në rrugët e kryeqytetit.

Këlliçi thekson se banorët në rrugën “Thoma Koxhaj” kanë ndaluar punimet.

Denoncimi i Këlliçit

“Zhavorr elektoral në rrugën “Thoma Koxhaj”, pranë pallateve Bruçi në Kashar.

Banorët kanë ndaluar punimet farsë sepse nuk hidhet zhavorr pa bërë fillimisht kanalizimet e ujërave të zeza.

Grupi i Ballukut është parë aty duke ndjekur nga afër situatën. Automjeti i një prej drejtorëve të OSHEE-së ishte gjithashtu stacionuar aty.

Ata që mashtruan këto 8 vjet nuk e kanë për gjë të vazhdojnë edhe për 25 ditë. Zhavorri elektoral nuk e mbulon dot parazitizmin e tyre 8-vjeçar.

Përballjes me qytetarët më 25 prill nuk do i shpëtojnë dot!”.

 

Komiteti Teknik nuk ndryshon masat anti-Covid, maturantët kthehen në shkolla

Komiteti teknik i Ekspertëve u mblodh këtë të Mërkurë dhe vendosi të mos ndryshojë masat ekzistuese të marra për frenimin e përhapjes së koronavirusit.

Kështu, mbetet në fuqi kufizimi i lëvizjes nga ora 20:00-6:00. Gjatë kësaj periudhe, baret e restorantet po ashtu do jenë të mbyllura. Për lëvizje gjatë kësaj fashe kohore, nevojitet leje që merret përmes portalit e-Albania.

Shkollat e mesme që deri më tani kanë vijuar mësimin online, do të procedojnë ende në këtë mënyrë. Përjashtim bëjnë maturantët, të cilët do të lejohet të kthehen në shkolla, në mënyrë që të përgatiten sa më mirë për provimet që do të duhet të japin në përfundim të vitit shkollor.

Edhe universitetet do mbeten online.

Po ashtu, fluturimet me Britaninë e Madhe do mbeten të pezulluara.

Masat rishikohen javën e ardhshme

Kryetarja e Komitetit Teknik, Mira Rakacolli tha se situata paraqitet e stabilizuar, por delikate.

“Mbi shifrat që kemi dhe mbi analizën e shkaqeve dhe situatave, ekspertët mendojnë situata mbetet e qëndrueshme në atë tendencë e vënë re që para një javë për uljen e lehtë të incidencës dhe në numrin e jetëve të humbura, por shifrat përsëri nuk janë aty ku duhet të jenë për të liruar situatën. Prandaj kemi menduar se masat të shikohen javën e ardhshme, me përjashtim të faktit, që maturat të fillojnë mësimin në klasë”, shtoi ajo.

Shqipëria ka zyrtarisht 124 723 raste të konfirmuara me koronavirus, prej të cilave 90 617 janë të shëruar, ndërsa 31 879 aktivë. Numri i viktimave që nga nisja e pandemisë është zyrtarisht 2227.

I penduari fundos Ardian Çapjan: Më ofroi 50 mijë euro! Zbardhen bisedat para ekzekutimit të babë e bir

Dëshmia e të penduarit të drejtësisë, Ervis Bardhi, çoi në pranga Ardian Çapjan, ndërsa vijon të jetë në kërkim Florenc Çapja.

Në dosjen e Prokurorisë thuhet se ”Bardhi ka rrëfyer midis të tjerash edhe për vrasjen e Gentian Beqirit. Sipas tij, për këtë vrasje, Ardian Çapja i ka ofruar 50 mijë euro.

“Ardian Çapja me ofroi 50 mije euro për vrasjen e Gentian Beqirit. Realizimi i vrasjes ishte i vështirë, sepse Beqiri ishte në ruajtje nga Policia, pasi dyshohej për vrasjen e Sokol Çapjas në 2005. Takimet me Ardianin i kam pasur në hotelin e tij”, ka thënë Bardhi në rrëfimin e tij.

Bardhi është njeriu që ka ekzekutuar në 2012 Gentian Beqirin dhe babanë e tij, Nezirin, me urdhër të Çapjave. I penduari ka shpjeguar se vrasjen e kreu me Olsi Lekun, ndërsa Etjen Cani ishte në rolin e ndihmësit. Gentian Beqiri u ekzekutua në shtëpinë e tij në vitin 2012. Në atë periudhë u vra edhe babai i tij, Nezir Beqiri. Ekzekutimi i tyre bëri bujë në atë kohë pasi Gentiani ishte nën arrest shtëpie dhe ruhej nga Policia.

Në dosjen e Prokurorisë thuhet se ditën e krimit, nga banesa ka dalë nëna e Gentian Beqirit dhe bashkëshortja e Nezir Beqirit, Behije Arapi, për të bërë pazar dhe në këtë moment ka konstatuar se dy punonjësit e Policisë në detyrë, që ruanin Gentianin, nuk ndodheshin në vendin e shërbimit. Behije Arapi akuzon dy persona me emër konkret për ngjarjen. Kjo dëshmitare hedh dyshimet e saj se kjo vrasje ka lidhje me vrasjen e shtetasit Sokol Çapja. Behija në deklarimet e dhëna nga ana e saj shpjegon se ka dyshime se personat që kanë ndihmuar autorët për hapjen e derës kanë qenë shtetasit Etjen Cani dhe Lorenc Skilja.

 

DESHMIA E ERVIS BARDHIT

Më datë 19.06.2019, i pandehuri Ervis Bardhi është paraqitur në ambientet e Policisë së Tiranës duke u vetëdorëzuar. Që në momentet e para, i pandehuri Ervis Bardhi ka deklaruar se kërkon të mbrohet nga një avokat i caktuar nga shteti dhe ka deklaruar se kërkon të bashkëpunojë me organet e drejtësisë në lidhje me veprat penale për të cilat është akuzuar.

Pas verifikimit të kushteve të masës së sigurimit, Gjykata e Elbasanit ka lënë në fuqi masën e sigurisë “Arrest në burg”, vendosur më 12.06.2019. Pas marrjes së deklarimit të personit nën hetim, Ervis Bardhit, dhe verifikimeve të thënieve të tij, si dhe dhënien e këtij të pandehuri të cilësisë së bashkëpunëtorit të drejtësisë, me marrëveshjen e datës 19=8.07.2019 dhe kryerjen e një sërë veprimesh hetimore, rezulton e provuar se i pandehuri Ervis Bardhi është banor i qytetit të Elbasanit. Gjatë viteve 2010-2011 ai ka pasur lidhje dashurie me shtetasen Aurela Bardhi, të cilën aktualisht e ka bashkëshorte dhe nga martesa e tyre ka një fëmijë.

Në vitin 2010 i pandehuri Ervis Bardhi ka pasur një lidhje shoqërore me të pandehurin Etjen Cani dhe gjatë kësaj periudhe kanë ndenjur së bashku në ambiente të ndryshme të qytetit të Elbasanit dhe kryesisht në kafenetë e lagjes së tyre. Njohja mes tyre ka qenë për shkak se ata kanë qenë banorë të së njëjtës lagje, lagjja “Çlirimi” e qytetit të Elbasanit. Më datë 11.09.2010, rreth orëve të para të mëngjesit, i pandehuri Ervis Bardhi është telefonuar nga i pandehuri Etjen Cani dhe janë takuar në kafe. Gjatë bisedës mes tyre, Etjeni i ka paraqitur Ervisit një shqetësim për sa i përket shtetasit Ardit Sula, duke pretenduar se ky shtetas i ka ngacmuar të dashurën.

Nga ana e Etjenit i është dhënë Ervisit numri i telefonit të Arditit dhe Ervisi ka komunikuar me Arditin, duke bërë debat në telefon. Pas këtij debati, personat nën hetim, Ervis Bardhi dhe Etjen Cani kanë marrë një makinë taksi dhe kanë shkuar te vendi ku Arditi punonte si berber, në afërsi të vendit të quajtur “Kryqëzimi i Dinamos”.

Në këtë vend Ervisi dhe Etjeni kanë debatuar me shtetasin Ardit Sula dhe në grindje e sipër, i pandehuri Ervis Bardhi, ka nxjerrë nga brezi një armë pistoletë dhe ka qëlluar në drejtim të shtetasit Ardit Syla, por pa mundur ta dëmtojë atë. Menjëherë, Ervis Bardhi dhe Etjen Cani janë larguar nga vendi i ngjarjes dhe nga ana e Policisë janë kryer veprimet e para në vendin e ngjarjes. Pas shpalljes në kërkim policor, Ervis Bardhi dhe Etjen Cani kanë shkuar në qytetin e Tiranës.

Në Tiranë ata janë takuar me shtetasin Olsi Leka, edhe ky banor i qytetit të Elbasanit, por që gjatë asaj periudhe jetonte herë në qytetin e Tiranës dhe herë në shtetin grek. Etjen Cani me shtetasin Olsi Leka alias Jorgo Leku, kanë lidhje familjare, pasi babai i shtetasit Olsi Leka është martuar me hallën e të pandehurit Etjen Cani.

Pasi Ervis Bardhi dhe Etjen Cani janë takuar me shtetasin Olsi Leka, ky i fundit i ka ndihmuar duke iu gjetur shtëpi me qira dhe duke iu dhënë para me qëllim që ata t’i fshiheshin Policisë, e cila i kërkonte për ngjarjen e datës 12.10.2010. Pasi kanë ndenjur së bashku herë në Tiranë dhe herë në Durrës, nëpër shtëpi të ndryshme, të cilat i gjente Olsi dhe vetë, më datë 02.02.2011, i pandehuri Ervis Bardhi është dorëzuar në Komisariatin e Elbasanit, pasi Gjykata e Elbasanit, më 17.09.2010 kishte vendosur masën e sigurimit “Arrest në burg”. Më datë 11.02.2011, Gjykata e Elbasanit e ka dënuar personin nën hetim Ervis Bardhi me 8 muaj burg për armëmbajtje pa leje. I pandehuri Ervis Bardhi është dërguar në IEVP Peqin, në seksionin e paraburgimit, me qëllim vuajtjen e këtij dënimi. Në dhomat e paraburgimit, i pandehuri Ervis Bardhi ka qëndruar rreth 5 muaj duke përfunduar dënimin e dhënë nga Gjykata e Elbasanit.

Ervis Bardhi jetonte në banesën e bashkëshortes së tij, shtetases Aurela Bardhi, e cila ndodhet në lagjen “28 Nëntori”. Gjatë kësaj kohe, Ervis Bardhi takohej dhe me shtetasin Olsi leka dhe me të ka biseduar në lidhje me takimet që kishte me shtetasin Gentian Beqiri në banesën e tij.

Nga hetimi rezulton se disa kohë përpara ngjarjes, në kohën kur shtetasi Olsi Leka ka qenë duke qëndruar në një lokal në afërsi të banesës së bashkëshortes së të pandehurit Ervis Bardhi, ai ka vënë re një mjet tip “Fuoristradë”, me timon në krahun e kundërt, në të cilin kanë qenë dy persona dhe ky mjet ka kaluar para lokalit ku ai po qëndronte. Në kohen kur Olsi Leka ka shkuar nga lokali për në banesën ku qëndronte Ervisi, ka parë këtë makinë përsëri në rrugicë.

Në momentin kur ka hyrë në oborrin e banesës së bashkëshortes së Ervisit, është takuar me Ervisin dhe i ka thënë se e kishte ndjekur ky mjet. Olsi gjatë bashkëbisedimit me Ervisin i ka thënë këtij të fundit se këta që po na ndjekin mos kanë ndonjë problem me ty dhe mos po na ndjekin pasi ti shkon dhe takohesh me Gentian Beqirin në banesën e tij. Gjatë bisedës, Ervis Bardhi i ka thënë Olsit: “Po me mua çfarë kanë, se as i njoh dhe nuk e di kush janë?”. Në këtë moment Olsi i ka thënë se mund të gjente një mundësi të bisedonte me njerëz të fisit të Çapjave, pasi disa kushërinj të gruas së tij, Enkeledës, i njohin ata dhe mund të sqaroheshin.

Disa kohë pas kësaj ngjarjeje, Ervisi ka filluar të rrallojë takimet me shtetasin Gentian Beqiri. Në rastet kur ka qenë në këto takime ai është takuar me Etjen Vanin, të cilin herë e ka gjetur në banesën e Gentianit dhe herë ka shkuar me të. Disa kohë pas bisedës me shtetasin Olsi Leka, ky i fundit pasi ka marrë një mjet me qira, ka shkuar në banesën ku banonte Ervis Bardhi dhe e ka marrë në mjet.

Pasi kanë dalë nga rrugica, ata kanë shkuar në afërsi të banesë së Etjen Canit dhe e kanë marrë atë në mjet dhe më pas kanë shkuar në afërsi të unazës së qytetit ku kanë marrë në mjet dhe shtetasin Klajdi Dokoli. Të katërt së bashku ata kanë marrë rrugën në unazë dhe në këtë moment Olsi i ka thënë se do të shkonin të takonin disa persona me qëllim sqarimin e problemit. Personi nën hetim, Ervis Bardhi, nuk ka pasur dijeni se kë do të takonin, por ka vënë re se Olsi me mjetin e tij është futur nga unaza në një rrugicë, e cila të çon te banesa e fisit Çapja.

Nga ana e të pandehurit Ervis Bardhi është bërë e mundur që të çonte te shtëpia e Gentianit shtetasin Olsi Leka. Pas takimit të parë që kanë bërë dhe pasi Olsi ka biseduar me Gentianin, Ervis Bardhi dhe Olsi Leka kanë shkuar disa herë në banesën e Gentianit, ku dhe kanë qëndruar në kohë të ndryshme. Gjatë kësaj kohe, kur ata shkonin në banesën e Gentian Beqirit, në disa raste aty ka qenë dhe i pandehuri Etjen Cani. Ervis Bardhi në këto takime nuk ka pasur armë me vete, ndërsa Olsi Leka në disa raste pa pasur armë me vete. Rreth një javë përpara se të kryenin vrasjen e shtetasit Gentian Beqiri, Ervis Bardhi kishte biseduar me shtetasin Olsi Leka në lidhje me Etjenin. Olsi i ka thënë Ervisit që Etjeni do të ruante nënën e Gentianit në momentin kur të dilte nga banesa. Po kështu, nga ana e Olsit ishte biseduar me personat e tjerë organizatorë, që në momentin kur do ta kryenin vrasjen ata të mos ishin në qytetin e Elbasanit. Po kështu, nga biseda që i pandehuri Ervis Bardhi ka bërë me Olsi Lekën, ky i fundit i ka thënë se të gjitha janë llogaritur kur do ta bëjnë vrasjen pasi është marrë informacion kush do të jetë me shërbim te pallati i Gentianit, kush do të ishte në patrullim nga Policia dhe kush do të ishte prokuror i gatshëm. Rreth një javë përpara ngjarjes, Ervis Bardhi, pikërisht më datë 09.08.2012, ka blerë nga shtetasi Erjon Meka një mjet tip “Benz”, me targa DR 6212 D, për shumën 8 mijë euro.

Dy ditë pas blerjes së këtij mjeti, Ervis Bardhi ka vjedhur në qytetin e Tiranës një palë targa italiane në një mjet tip “Opel”, i cili nga verifikimet i përket shtetasit Kujtim A.. Disa ditë përpara ngjarjes, i pandehuri Ervis Bardhi, targat italiane të vjedhura në afërsi të “Myslym Shyrit”, në Tiranë, ia ka vënë mjetit tip “Benz”, të cilin ia kishte blerë shtetasit Erion M..

Një natë para ngjarjes së vrasjes, Ervis Bardhi ka qenë në banesën e marrë me qira prej tyre në rrugën “7 Marsi”, së bashku me shtetasin Olsi Leka dhe nga ana e Olsit i është thënë se të nesërmen në mëngjes do të vrisnin Gentianin, pasi çdo gjë ishte rregulluar. Ditën e ngjarjes, me 15.08.2012, Ervis Bardhi së bashku me Olsi Lekën janë ngritur nga gjumi dhe rreth orës 07:30 kanë dalë nga banesa, kanë hipur në mjetin tip “Benz”, ngjyrë e zezë, në pronësi të Ervis Bardhit, me targa DA 864 EA. Olsi Leka ka hipur në vendin e shoferit, ndërsa Ervis Bardhi ka hipur në vendin e parë të pasagjerit. Pasi janë nisur, ata kanë përshkuar rrugën nga vendi ku e kishin parkuar, në afërsi të banesës, kanë dalë në rrugë në krah të lumit të Zaranikës dhe pasi kanë bërë rrethrrotullimin e luleve janë futur në rrugën që të çon në drejtimin e Bashkisë së qytetit. Olsi Leka ka pasur me vete një sasi lënde narkotike, si dhe dy palë paruke, njëra me ngjyrë të zezë, tjetra e zezë me fije të bardha.

Ervis Bardhi ka zbritur nga mjeti dhe ka shkuar te një kioskë ku ka blerë një shishe verë. Më pas, kanë vazhduar rrugën dhe pasi kanë dalë në afërsi të Bashkisë janë futur në një rrugicë që të çon në afërsi të banesës së Gentian Beqirit. Kur janë afruar në afërsi të banesës së Gentianit, Olsi ka parkuar makinën në anën e rrugës. Pasi kanë parkuar makinën, Olsi ka dalë nga mjeti dhe ka shkuar duke kaluar në rrugicën që të çon te sheshpushimi i pallatit të Gentianit, me qëllim që të shikonte se ku ishin punonjësit e Policisë, si dhe të shihte nëse kishte lëvizur nëna e Gentianit.

Gjatë kësaj kohe, Ervis Bardhi ka ndenjur në mjet dhe ka konsumuar lëndën narkotike dhe shishen e verës. Pas disa kohësh, Olsi është kthyer te mjeti dhe i ka thënë Ervis Bardhit: “Hajde ikim se nëna e Gentianit ka dalë nga shtëpia”. Olsi ka marrë pistoletën, e ka futur në brez dhe të dy kanë vënë paruke në kokë. Të dy së bashku janë larguar nga mjeti dhe kur janë afruar pranë sheshpushimit të pallatit ku banonte Gentiani, Olsi i ka thënë Ervisit: “Mos e vrit mendjen…”. Në këtë moment Ervis Bardhi i ka marrë Olsit pistoletën që mbante në brez duke e futur ai në brez.

Kur janë afruar pranë pallatit ata kanë vënë re se njëri prej punonjësve të Policisë ishte brenda në mjetin e tij tip “Golf”. Në momentin që kanë qenë duke u futur te hyrja e pallatit, ata kanë vënë re se babai i Gentian Beqirit, shtetasi Nezir Beqiri, ka qenë në ballkonin e sheshpushimit mes katit të pestë dhe të katërt.

I pandehuri Ervis Bardhi dhe shtetasi Olsi Leka, kur kanë hipur në katin e tretë kanë hequr parukat dhe i kanë lënë aty dhe më pas janë ngjitur për te shtëpia e Gentianit. Kur kanë kaluar te sheshpushimi mes katit të katërt dhe të pestë ata kanë folur me Nezir Beqirin dhe janë ngjitur për te shtëpia e Gentianit. Kur janë afruat te dera kanë bërë re se ajo ishte e hapur.

Në këtë moment Olsi Leka është kthyer duke zbritur poshtë te sheshpushimi dhe ka marrë babanë e Gentianit duke e ngjitur lart. Sapo janë futur brenda, Ervis Bardhi është drejtuar në drejtim të dhomës së Gentianit ku ka vënë re se ai ishte i shtrirë në një dyshek të vendosur në tokë dhe ishte në gjumë. Ervis Bardhi menjëherë ka nxjerrë nga brezi armën, pistoletë me silenciator dhe ka qëlluar në drejtim të Gentian Beqirit, i cili si pasojë e zhurmës së dëgjuar kur ata kanë hyrë, ishte ngritur në të ndenjura.

Plumbi i parë i shkrepur nga arma që mbahej nga Ervis Bardhi e ka goditur Gentianin në faqe dhe pistoleta ka ngecur. Pas tërheqjes përsëri të këmbëzës, Ervis Bardhi ka qëlluar dhe tri herë të tjera Gentianin në kokë, duke e lënë të vdekur.

Në këtë kohë, kur Ervis Bardhi ka qëlluar në drejtim të viktimës Gentian Beqiri, Olsi Leka ka qenë pas tij së bashku me babanë e Gentianit, Nezir Beqirin, i cili duke parë veprimet e tyre ka filluar t’u thotë: “Çfarë po bëni?” Në këtë kohë Olsi Leka ka qëlluar me grusht në fytyrë shtetasin Nezir Beqiri, i cili ka rënë në tokë. Në kohën që ai ishte në tokë, Olsi ka filluar ta qëllojë me shqelma në gjoks. Pasi e ka qëlluar disa herë, Olsi ka shkuar në dhomën e ndenjes ku ka marrë një jastëk dhe ia ka vendosur shtetasit Nezit Beqiri në kokë, me qëllim që ai të vdiste.

Nga veprimet e Olsit shtetasi Nezir Beqiri ka vdekur dhe në atë moment ata të dy, Ervis Bardhi dhe Olsi Leka kanë dalë nga banesa e shtetasve Gentian e Nezir Beqiri. Kur kanë zbritur në katin e tretë të pallatit, ata kanë marrë parukat dhe pasi i kanë vënë në kokë kanë dalë nga hyrja e pallatit për në drejtim të makinës që e kishin parkuar në rrugicën afër. /Panorama

Haradinaj shpjegon përse nuk e mbështet Vjosa Osmanin për presidente (VIDEO)

Kryetari i AAK-së, Ramush Haradinaj në një konferencë për media ka thënë se nuk e ka ndryshuar qëndrimin lidhur me votimin e Vjosa Osmanit për presidente, shkruan IndeksOnline.

Haradinaj tha se AAK-ja ka qenë e hapur për bashkëpunim me fituesit e zgjedhjeve mirëpo nuk kanë pasur një kërkesë të tillë.

“Ne kemi mirëpitur mundësinë me bisedua me Kurtin e Osmanin, por nuk kemi marrë prej tyre një propozim, kërkesë, marrëveshje politike për bashkëpunim.

Nuk kanë kërkuar një bashkëpunim, vetvetiu nuk jemi pjesë e një marrëveshje politike për votim të presidentes.

S’kemi ndryshuar qëndrim”, tha ai.

 

Rama sulmon sërish Bashën: Të këmbëngulësh në gabim është djallëzore

Kryeministri Edi Rama sulmoi sërish kryetarin e PD Lulzim Bashë për takimet elektorale. Duke parë pritjen e Bashës në Korçë, të mërkurën, Rama reagoi duke thënë se Basha po vë në rrezik shëndetin e qytetarëve duke i lejuar të grumullohen në takimet elektorale në qytete të ndryshme. Rama thotë se këto takime janë “infektim masiv” dhe paralajmëron qytetarët se do të përfundojnë spitaleve pas 3 javësh, teksa në Tiranë po vijon beteja me injektimin e vaksinës.

“Të gabosh është njerëzore, të këmbëngulësh në gabim është djallëzore”, thoshin latinët. Kjo këmbëngulje prej shejtanbudallai në fajin e kërcënimit të shëndetit të njerëzve për interesin mizerabël të një fushate edhe më mizerabël, me makina, bori, zhurmë e turmë, duke bërë përshesh në çdo shesh, është një djallëzi prej njerëzish pa vizion, pa karakter, pa përgjegjësi e as fije njerzillëku. Lus Zotin që për dy a tre javë që i duhen virusit të kapë rrugët e frymëmarrjes, këta njerëz të verbër e të keqpërdorur, të mos përfundojnë spitaleve për mullaqet e Lulëzimit e për mustaqet e Saliut”, deklaroi Rama. ©Zoom.al

Makinacionet për të larguar Tom Doshin nga parlamenti

Tom Doshi, me shumë gjasë do të jetë sërish në parlament, nëse ai nuk do të ndalohet për të kandiduar. Të gjitha sondazhet e nxjerrin atë me një mandat në zonën e Shkodrës, me një mbështetje të madhe në Dukagjin.

Ambasada amerikane në Tiranë nuk e do në parlament. Për Shtetet e Bashkuara të Amerikës ai është një person i përfshirë në afera të mëdha korruptive. Për këtë arsye Departamenti i Shtetit e ka futur në listën e zezë.

Yuri Kim e bëri publik qëndrimin e amerikanëve, se ata nuk e donin Tom Doshin sërish në parlament.

Ambasadorja i kërkoi Partisë Socialiste të distancohej nga Doshi dhe të shprehej publikisht se nuk e donte Doshin në kuvend, njësoj sic ishin shprehur PD e LSI.

Kur kjo iu kërkua Edi Ramës, ai refuzoi. Madje, si për të zhvlerësuar ambasadoren, tha se ai ishte “engjëll” në krahasim me Sali Berishën e Ilir Metën.

Edi Rama la të kuptohet, pa ekuivok, se Tom Doshi i duhet si votë për ta përdorur kundër Metës e Berishës.

Ambasada amerikane e përjashton këtë si variant. Ajo nuk mund të pajtohet me “ofertën” e Edi Ramës.

Komisioni Qëndror i Zgjedhjeve, pas presionit të amerikanëve, tha se ligji nuk e ndalonte Doshin të kandidonte, por paralelisht i kërkoi prokurorisë të hetonte mbi figurën e tij.

Ky ishte hapi i parë i një makinacioni për ta nxjerrë Tom Doshin nga lista si kandidat i Partisë Socialdemokrate.

Pas kërkesës së marrë nga KQZ, prokuroria trokiti pa vonesë në dyert e amerikanëve. Prokuroria e Përgjithshme i kërkoi zyrtarisht ambasadës amerikane informacionet që ajo disponon mbi përfshirjen e Doshit në afera korruptive.

Informacione të këtij lloji janë sensitive. Me gjasë ato nuk do ta shohin së afërmi dritën e publikimit.

Por nëse do t’i vihen në dispozicion prokurorisë, Tom Doshi nuk do të kandidojë dot në këto zgjedhje. Në këtë mënyrë, amerikanët e kanë vetë në dorë që ta largojnë atë nga parlamenti.

Por me vënien në dispozicion të prokurorisë të këtyre informacioneve, mbi bazën e të cilit SHBA e shpalli Doshin “non grata”, organi i akuzës do të duhet të nisë edhe një hetim mbi aferat e “engjëllit” të Edi Ramës.

Ambasada amerikane ka kërkuar vazhdimisht që të hetohen pasuritë e zyrtarëve apo deputetëve të korruptuar.

Raporti i publikuar një ditë më parë i Departamentit Amerikan të Shtetit e nënvizonte këtë fakt. “Korrupsioni është në cdo degë të qeverisë dhe pandëshkueshmëria është problem”, theksohej dukshëm në Raportin për të Drejtat e Njeriut.

Përballë hezitimit së Edi Ramës, amerikanët duket se këtë herë po tregojnë fuqinë e tyre për të ndaluar një person që ata e konsiderojnë të korruptuar, që të bëhet sërish deputet.

Qëndrimi i Ramës, në mbrojtje të Doshit, duket se ka cuar edhe në përplasjen e tij me ambasadoren Kim.

Publikisht ambasadorja Kim nuk ka mundur të replikojë me Ramën ashtu sic bënte me “mikun e saj Luli Bashën”, kur i kërkonte të tërhiqej nga qëndrimet që i konsideronte ekstreme.

Por nga ana tjetër, ambasada amerikane e ka vënë në punë mekanizmin e saj për t’ia prerë krahët “engjëllit” të Ramës, kësaj here me kosto edhe më të madhe për të dhe për mbrojtësin e tij. ©Zoom.al

 

 

 

Meta: Koha për të ndalur shpopullimin është tani

Presidenti i Republikës, Ilir Meta ka reaguar pas raportit të Institutit për Studime Ekonomike Ndërkombëtar në Vjenë, që e rëndit Shqipërinë ndër vendet me rrjedhjen më të lartë të trurit në rajon.

Sipas Kreut të Shtetit, largimi i rinisë është një plagë e madhe për vendin, ndaj ky fenomen duhet të ndalet sa më parë.

“Shqipëria ka nevojë për “fitim të trurit” dhe jo “ikje të trurit”, shkruan Presidenti Meta.

Postimi i plotë i Presidentit Ilir Meta

Largimi i trurit dhe i rinisë është një plagë e madhe për vendin.

Një tjetër institucion prestigjoz, Instituti për Studime Ekonomike Ndërkombëtare i Vjenës, bën me dije se fenomeni i shpopullimit në Shqipëri, gjatë viteve të fundit është përkeqësuar sidomos me largimin e grupmoshave 20-24 vjeç.

Studimi vëren se nga 105 mijë qytetarë që ikin nga Shqipëria, 40,700 persona janë të arsimuar ose 40 për qind e totalit.

Largimi i trurit dhe i forcave të reja dhe më krijuese të shoqërisë duhet ndalur sa më parë.

Të rinjve tanë u duhen ofruar më shumë shpresë, alternativa edukimi dhe punësimi, ndërsa të arsimuarve më shumë shanse të barabarta, vlerësim meritokracie dhe vende pune, ku të shfaqin talentin dhe potencialin e tyre intelektual.

Shqipëria ka nevojë për “brain gain” dhe jo “brain drain”!

KOHA PËR TË NDALUR SHPOPULLIMIN ËSHTË TANI! ??

INSTAT publikon shifrat: Sa ra ekonomia gjatë pandemisë

Në vitin e përballjes me pandeminë recesioni ka qenë në nivelin -3.31% krahasur me vitin 2019. Nga projeksionet fillestare të institucioneve ekonomike ndërkombëtare pritej që rënia ekonomike të ishte nga -6 deri në -7.5 për qind.

Sipas INSTAT impakti i pandemisë në ekonominë shqiptare ka qenë i përmbajtur edhe në krahasim me rajonin, ku recesioni mesatar kap shifrat -5.14%.

Njoftim për media

Statistikat zyrtare të INSTAT për Produktin e Brendshëm Bruto dhe rritjen ekonomike gjatë vitit të shkuar 2020 dëshmojnë se, goditja që ekonomia mori nga pandemia dhe recensioni i shkaktuar ishin në mënyrë domethënëse mjaft më të përmbajtura se sa pritshmëritë dhe shqetësimet fillestare.

Ndërkohë që, fillimisht projeksione nga institucione të ndryshme (përfshirë MFE, FMN, BB, KE, etj.) varionin në një interval të recensionit nga rreth – 6% në – 7.5%, sipas statistikave paraprake (në bazë të llogarive kombëtare tremujore) të INSTAT rezulton se rritja reale ekonomike (recensioni) gjatë vitit 2020 ishte vetëm pothuajse sa gjysma e projeksioneve fillestare, konkretisht në nivelin -3.31% krahasur me vitin 2019.

Në gjykimin e Ministrisë së Financave dhe Ekonomisë, kjo përmbajtje e nivelit të impaktit të goditjes nga pandemia në ekonominë tonë, e pasuar nga goditja e mëparshme nga tërmeti, përveç se dëshmon edhe njëherë strukturën relativisht rezistente dhe elastike të ekonomisë sonë përballë goditjeve të tilla (ashtu siç ka rezultuar edhe më parë gjatë krizës globale financiare në vitin 2009), i atribuohet po ashtu në një masë të konsiderueshme edhe menaxhimit makroekonomik e financiar relativisht të mirë që ju bë sërish nga autoritetet, nëpërmjet një miksi adekuat dhe të mirë koordinuar të politikës fiskale e asaj monetare.

Ky impakt më i përmbajtur i goditjes në ekonominë tonë, vihet re edhe në kontekstin krahasimor rajonal, sipas tabelës më poshtë, ku recensioni i Shqipërisë gjatë 2020 prej -3.31% është dukshëm më i kontrolluar se sa recensioni mesatar i vendeve të rajonit prej -5.14%.

Kontribut pozitiv kanë dhënë degët: Ndërtimi me +1,84 pikë përqindje, Administrata publike, Arsimi dhe Shëndetësia me +1,01 pikë përqindje, Aktivitete të pasurive të paluajtshme me +0,52 pikë përqindje, Industri, Energji dhe Uji me +0,49 pikë përqindje dhe, Aktivitete profesionale dhe Shërbime administrative me +0,36 pikë përqindje, Aktivitete Financiare dhe të Sigurimit me +0,27 pikë përqindje, Informacioni dhe Komunikacioni me +0,24 pikë përqindje, Arte, argëtim dhe çlodhje; aktivitete të tjera shërbimi me +0.08 pikë përqindje. Negativisht kontribuan aktivitetet: Tregti, Transport, Akomodim dhe Shërbim ushqimor me  -0,96 pikë përqindje, Bujqësi, Pyje dhe Peshkim me -0,49 pikë përqindje. Taksat Neto mbi produktet kontribuan negativisht me -0,37 pikë përqindje.

Granit Xhaka i bën një super dedikim bashkëshortes

Granit Xhaka na e ka vërtetuar prej kohësh se është një djalë mjaft romantik, por sot  na i ka shkrirë zemrat me urimin e ditëlindjes për bashkëshorten e tij. Leonita feston sot ditën e saj të lindjes dhe Graniti i ka bërë një super dedikim për këtë rast. Ai ka publikuar në Instagram disa foto nga ditët e tyre më të rëndësishme si martesa, apo ardhja në jetë e motrës Ayana.

“Zemra ime! Të uroj nga zemra gëzuar ditëlindjen. Urimet më të mira për ditëlindjen tënde. U bëfsh edhe 100 vjeç. Paç gjithmonë shëndet, fat, mbarësi e lumturi”, ka shkruar ai në urimin për Leonitën.

 

 

Ndërkohë kujtojmë se dyshja janë në pritje të fëmijës së tyre të dytë. Disa kohë më parë Leonita zbuloi se është shtatzënë dhe aktualisht çifti janë në qiellin e shtatë nga lumturia. Graniti dhe Leonita ja dolën mbanë që lajmin e bukur ta mbanin të fshehtë për një kohë të gjatë derisa vendosën që ta zbulonin vetë për ndjekësit e tyre në rrjete sociale.

Futbollisti postoi në Instagram një foto shumë të ëmbël, në të cilën shihej përkrah bashkëshortes dhe vogëlushes së tyre, që shumë shpejt do të marrë rolin e motrës së madhe.

“Familja jonë e vogël po rritet… Mezi po presim të të njohim”, shkroi Graniti përkrah fotos.

 

 

Disa ditë pasi zbuluan shtatzëninë, Leonita tregoi se ata do të bëhen sërish prindër të një vajze dhe se Ayana do të bëhet me motër.