Informacionin e ka konfirmuar zëdhënësi i Gjykatës Themelore të Prizrenit, Marcel Lekaj.

Ndërkohë Kallxo.com ka publikuar pamje kur Dibran Hoxhaj dhe të tjerët sillen në gjykatë. Kobra ka vendosur kapuçin e xhupit në kokë, duke tentuar që të të fshihet.

Kujtojmë se pas ngjarjes së ndodhur në orët e para të mëngjesit të ditës së djeshme në një lokal nate në Prizren, ku mbeti i vdekur 31-vjeçari Visart Cengu nga Kukësi dhe u plagos shoku i tij 27-vjeçar Rufgen Shehu, policia e Kosovës ka bastisur “Kobra City”, pronari i së cilës është autori i dyshuar Dibran Hoxhaj (Kobra).

Sipas burimeve u bë e ditur se në vendngjarje janë gjetur të paktën tri gëzhoja plumbash.

“Ka pas bastisje të objekteve dhe të shtëpisë. Janë gjetë së paku 3 gëzhoja, lokali i demoluar”, tha zëdhënësi i policisë rajonale të Prizrenit, Shaqir Bytyqi.

Ai tha se janë duke u analizuar provat dhe dyshimet janë që vrasja ka ndodhur jashtë lokalit.

Dibran Hoxhaj dhe pesë persona të tjerë nga stafi i lokalit që u morrën në pyetje pas ngjarjes, u lanë në paraburgim për 48 orë.

Kujtojmë se 31-vjeçari Cengu vdiq rrugës për në spital, ndërsa i plagosuri është në spitalin e Kukësit jashtë rrezikut për jetë.

Gjithashtu mësohet se pas bastisjes, policia ka pezulluar punën në këtë lokal nate, deri në sqarimin e plotë të rrethanave të ngjarjes.

Nazan Shero, prokurorja e Prokurorisë Themelore të Prizrenit, e cila po merret me rastin e vrasjes dhe plagosjes së dy të rinjve nga Kukësi, ka deklaruar se dëshmitarët e marrë në pyetje kanë treguar se shkak për këtë ngjarje tragjike është bërë fatura prej 400 eurosh e tavolinës ku ishin ulur viktima dhe miku i tij.

Prokurorja Shero tha se pronari i lokalit “Kobra City”, Dibran Hoxhaj nuk ka pranuar të japë dëshmi gjatë parrjes në pyetje, ndërkohë që sipas saj, ngjarja po vijon të hetohet.

“Sa janë të sakta nuk mundemi me ditë se jemi në hetim e sipër dhe për momentin jam duke ndërmarrë veprime hetimore. Janë deklaratat e dëshmitarëve që flitet për 400 euro mirëpo ai (Dibran Hoxhaj) është mbrojtë në heshtje”, tha Shero ditën e djeshme.