Një person i veshur me të njëjtat rroba si grabitësi i një nate më parë (bluzë të kuqe, pantallona xhins dhe kapele të zezë), futet në dyqan, ndërsa në dorë mban një çantë të vogël, nga ku pak çaste më vonë nxjerr një pistoletë.

Në momentin që u fut në dyqanin e “One”, aty ndodheshin dy punonjëse, të cilat po konsumonin darkë.

Pasi iu thotë “ju bëftë mirë”, grabitësi nxjerr armën dhe i kërcënon vajzat që t’i japin paratë.

“Ma boni hallall”, dëgjohet të thotë ai.

Por kësaj here plani i tij ka dështuar pasi vajzat nuk i frikësuan dhe njëra nga punonjëset bëri rezistencë. Ajo i tha grabitësit se arma që u drejtoi ishte fallso dhe i kërkoi të dalë jashtë.

Më pas ajo i tregoi derën dhe e nxori nga dyqani.

Ndërkohë që dilte, grabitësi paralajmëronte: “Mos ma bëni për borxh”.

Autori nuk është kapur ende nga policia.