Të arrestuarit janë Bexhet Berberin, me detyrë inspektor, Rushit Kola, me detyrë inspektor dhe Petrit Brahimaj, me detyrë nënkomisar. Mësohet, se Berberi dhe Kola kanë qenë policë roje tek dhoma e paraburgimit, ku i riu kreu vetëvrasjen.

Kujtojmë se 31-vjeçari ishte arrestuar ditën e djeshme (paradite), pasi dyshohej se kishte vjedhur një makinë qepëse dhe prerëse pllakash.

Arrestimi i tij kishte ardhur me kërkesë të Prokurorisë së qytetit, e cila, pasi kishte analizuar shenjat e gishtërinjve në një banesë të vjedhur, doli në përfundimin se ato i përkisnin të ndjerit.

Nga ana tjetër, babai i djalit, në një prononcim për mediat kërkon hetim të ngjarjes.

Po kështu ka reaguar edhe opozita përmes ish-kryeministrit Sali Berisha dhe deputetit të PD-së, Dashnor Sula, të cilët akuzojnë policinë, duke thënë se i riu nuk është vetëvrarë, por ka humbur jetën si pasojë e dhunës së ushtruar brenda qelisë nga uniformat blu.