Kampioni i botës po valëviste flamurin për Italinë, teksa anija me atletët lundroi në lumin Sena, kur unaza i rrëshqiti nga gishti.

“Më fal dashuria ime, më vjen shumë keq”, ka shkruar ai në Instagram në një postim kushtuar bashkëshortes së tij, Chiara Bontempi Tamberi.

Atleti fajësoi “humbjen e shumë kilogramëve” dhe “entuziazmin e papërmbajtshëm” për humbjen e unazës.

“Nëse do të duhej të ndodhte, nëse do të më duhej ta humbja këtë unazë, nuk mund të imagjinoja një vend më të mirë”, shkroi ai, duke pretenduar se unaza tani do të “mbetej përgjithmonë në shtratin e lumit të qytetit të dashurisë”.

Ai i sugjeroi që të hidhnin edhe unazën e saj në lumë.

“Atëherë do të jenë bashkë përgjithmonë dhe ne do të kemi një justifikim më shumë për të rinovuar zotimet tona dhe për t’u martuar përsëri,” tha ai.

“Vetëm ti mund ta kthesh këtë në diçka romantike”, i komentoi Chiara.

Dyshja janë martuar që nga shtatori i vitit 2022.