Janë miliarda euro të përfituara nga ky aktivitet kriminal. Vetëm nga Lazarati, “Guardia di Finanza” përllogariste se përfitimet ishin 4.5 miliardë euro në vit, teksa Prodhimi i Brendshëm Bruto i Shqipërisë arrinte në 10 miliardë euro.
Mjafton kjo shifër për të kuptuar sadopak se sa fituan këto grupe nga kultivimi i kanabisit i shpërtheu kufijtë e Lazaratit dhe preku çdo cep të vendit.

Vetëm paratë e fituara nga një fshat i vogël si Lazarati janë të mjaftueshme për të kuptuar se çfarë janë të gatshëm të bëjnë trafikantët e drogës për të ruajtur perandorinë miliarda eurosh që u jep ky aktivitet, pa pyetur për pasojat. Me të ardhura gati sa PPB e vendit, ata nuk i ndalon më asgjë.

Me një polici politike dhe të paaftë, ku vetëm disa individë të ndershëm përpiqen të bëjnë detyrën, trafikantët po e zgjerojnë gjithnjë e më shumë aktivitetin e tyre.
Me një politikë që u ka hapur dyert, duke i futur edhe në paralament, apo duke pranuar financimet e shpërbimet e tjera të tyre gjatë fushatës, narko-trafikantët janë ulur këmbëkryq si në vatrën e tyre.

Me gjyqësorin që shitet e blihet si në treg, ata zotërojnë tashmë gjithçka. Ata e kanë kthyer Shqipërinë në çerdhen që i strehon të patrazuar. Këtu vijnë e shndërrohen në biznesmenë të suksesshëm edhe kur në vende të tjera janë të shpallur në kërkim. Agron Xhafaj, vëllai i ish –ministrit të Brenshdshëm, Fatmir Xhafaj, është shembulli tipik i trafikantëve –biznesmenë, por si ai janë me qindra të tjerë. Me kaq pushtet ekonomik e politik, narko-trafikantët s’ka asgjë që i ndalon.

Saimir Hoxha, efektivi i policisë së Lezhës që u vra mëngjesin e sotëm nga anëtarë të grupeve të tilla, që kanabisin po e kultivojnë edhe në rezerva shtetërore, si Kune Vaini, është viktima e radhës.

Ai u qëllua se i ishte afruar më shumë sesa duhet territorit që kontrollojnë bandat kriminale të narko-trafikut. Trafikantët nuk patën frikë ta ngrinin armën kundër tij dhe 2 kolegëve të tij që po kontrollonin zonën.

Ata nuk kanë më frikë. Frikën e kanë vrarë me para, sepse me miliardat e fituara nga trafiku mund të blejnë fare lehtë edhe lirinë, siç ka ndodhur këto vitet e fundit me mjaft krerë të grupeve kriminale që e kanë parë dritën e lirisë sërish edhe pse ishin dënuar me burg përjetë.

Aq shumë para kanë në dorë, saqë kanë korruptuar një shoqëri të tërë. Kush ngre dorë kundër tyre, përgjigjen e ka me plumba dhe eksplozivë! Kështu ka ndodhur në Kolumbinë e Pablo Eskobarit, në Meksikën e El Chapos apo në Sicilinë e Cosa Nostras. Tani radhën e ka Shqipëira. /Zoom.al