Angie Craig, një demokrate nga Minesota, u kundërpërgjigj duke i hedhur kafe të nxehtë sulmuesit, thuhet në një raport të policisë.

Kendrick Hamlin akuzohet se e ka goditur me grusht dhe e ka kapur në qafë.

26-vjeçari, pa adresë fikse, është akuzuar për sulm të thjeshtë. Rasti nuk mendohet të jetë i motivuar politikisht.

E zgjedhur në Kongres në vitin 2018, zonja Craig, 50 vjeçe, është nënë e katër fëmijëve dhe shërben si bashkëkryetare e Grupit të Kongresit për Barazinë.

Ajo u sulmua rreth orës 07:10 me orën lokale (12:10 GMT) të enjten, thotë policia.

Shefi i saj i shtabit, Nick Coe, tha në një deklaratë se ajo “mbrojti veten nga sulmuesi dhe pësoi mavijosje, por është fizikisht në rregull”.

Ajo thirri shërbimet e urgjencës 911 dhe “sulmuesi u largua nga vendi i ngjarjes”.

Ai tha se zonja Craig falënderoi Departamentin e Policisë Metropolitane të DC “për përgjigjen e tyre të shpejtë dhe kërkon privatësi në këtë moment”.

Sipas një raporti nga Departamenti i Policisë Metropolitane, zonja Craig u tha hetuesve se kishte parë një person që silej në mënyrë të çrregullt dhe ndoshta nën ndikimin e drogës në hollin e ndërtesës ku banonte në zonën e ngarkuar të Rrugës H pranë Capitol Hill.

Kur ajo hipi në ashensor, personi e ndoqi brenda dhe “filloi të bënte rastësisht shtytje” pasi ajo i tha mirëmëngjes, thuhet në raport.

Personi dyshohet se e ka goditur zonjën Craig në mjekër dhe e kapi prej qafe. Mësohet se ajo u mbrojt duke i hedhur kafe të nxehtë sulmuesit.

Policia më herët kishte publikuar një fotografi të të dyshuarit dhe kishte kërkuar nga publiku ndihmë për identifikimin e tij.

Udhëheqësi demokrat i Dhomës së Përfaqësuesve, Hakeem Jeffries tha se grupi parlamentar ishte “i tmerruar” nga sulmi.

Senatorja amerikane Amy Klobuchar shkroi në Tëitter: “Për t’ju dhënë një ndjenjë se sa e fortë është Angie, ajo shkoi direkt në Hill këtë mëngjes dhe mori pjesë në një takim… askush nuk ngatërrohet me Angie.”

Zonja Craig shërben në distriktin e dytë të Minesotës, një zonë në jug të qytetit të St Paul. Vitin e kaluar Kongresi miratoi fondet për të forcuar sigurinë për ligjvënësit, të cilët marrin mijëra kërcënime çdo vit.

Policia e Kapitolit të SHBA-së hetoi rreth 7,500 raste të kërcënimeve të mundshme kundër ligjvënësve në vitin 2022, pak më pak se një vit më parë.

Tetorin e kaluar një burrë hyri në shtëpinë e kryetares së atëhershme të Dhomës së Përfaqësuesve, Nancy Pelosi, në San Francisko dhe sulmoi burrin e saj me një çekiç, duke i shkaktuar lëndime të rënda.

Ajo nuk ishte në shtëpi, por i dyshuari bërtiti: “Ku është Nancy?” dhe i tha policisë se kishte në plan ta merrte peng.

Vetëm anëtarët e udhëheqjes së kongresit marrin automatikisht mbrojtje sigurie me kohë të plotë, por fondet shtesë do të shkojnë për të ndihmuar të tjerët që kanë nevojë për të sipas kërkesës.