Për pesë prej tyre dhe konkretisht për Eduard Tërthorja, administrator i Universitetit Bujqësor, Altin Murton, drejtor i fondeve, Amarildo Lleshin, drejtor i prokurimeve, Mehmet Qoshka, specialist i fondeve dhe Pirro Zogu, me kërkesë të SPAK, gjykata kishte vendosur arrest me burg në mungesë.

Por, skandali thellohet më tej. Për të ruajtur një imazh të pastër në sytë e audiencës, Universiteti Bujqësor i Tiranës kishte lidhur kontratë me televizionin Top Channel.

Të dhënat nga Drejtoria e Përgjithshme e Thesarit, të siguruara nga Zoom.al, tregojnë se gjatë vitit 2024, Universiteti Bujqësor i pagoi Top Channel 580.000 lekë.

Shuma është lëvruar në tre këste. Bashkëpunimi ka nisur më 6 nëntor, kur UBT ka paguar 195.000 lekë. Më 25 nëntor është bërë pagesa e dytë, ndërsa kësti i tretë është dhënë më 30 dhjetor.

Sipas përshkrimit, këto para janë paguar nga UBT për Top Channel për shërbim mediatik.