Sipas protothema.gr, qeveria greke nuk mund ta ndalojë vizitën e kryeministrit shqiptar dhe as Kuvendi. Nga ana tjetër, Mitsotakis nuk dëshiron një takim të pakontrolluar, prandaj preferon një zonë të mbyllur, e cila mund të monitorohet më me efektivitet nga forcat e Policisë.

“Çështja nuk është dypalëshe, është evropiane, pavarësisht atyre që pretendojnë se është një çështje që ka të bëjë vetëm me pakicën kombëtare greke. Bëhet fjalë për shtetin e së drejtës dhe mënyrën sesi Shqipëria i trajton minoritetet, ka të bëjë me mënyrën se si funksionon gjyqësori shqiptar. Qeveria greke do të vazhdojë të ngrejë këto çështje”, tha Mitsotakis.

Nga të dhënat e deritanishme, SEF duket se është destinacioni më i mundshëm për Ramën, pasi ka pasur negociata intensive mes ambasadës shqiptare në Athinë dhe drejtuesve të Stadiumit për sallën ku mund të mbajë fjalimin kreu i qeverisë shqiptare, raporton media greke.

Në fakt, sipas informacioneve të protothema.gr, administrata e SEF-it ka kontaktuar me Ministrinë e Sportit dhe Ministrinë e Jashtme dhe ka marrë “dritën jeshile” për të ndarë një dhomë, për aq kohë sa ka disponueshmëri.

Në çdo rast, qeveria do të donte të shmangte imazhin e një “feste” në një ambient ​​të hapur, duke qenë se skenarë qarkullonin edhe për sheshin Sintagma.