Megjithatë duke filluar nga dita e nesërme Anticikloni Afrikan fillon gradualisht tërheqjen e tij duke i lënë vendin masave ajrore më të freskëta dhe relativisht më të lagështa me origjinë veriperëndimore, sipas Shërbimit Meteorologjik Ushtarak.

Pra, moti parashikohet i kthjellët në të gjithë territorin, por pa përjashtuar vranësirat e pakta kalimtare në relievet malore në lindje.

Vranësirat në relievet e larta malore të vendit në orët e nxehta të ditës do të shoqërohen me reshje shiu të dobëta dhe lokale, sipas Shërbimit Meteorologjik Ushtarak.

Temperaturat edhe nesër do të vijojnë të jenë relativisht të larta (vlera deri dhe në 39 grad celcius), por kjo situatë do të ndryshojë duke nisur nga dita e diel, por dhe më pas, me rënie të temperaturave dhe vlera të cilat janë brenda “normaleve” të mesatareve klimatike mujore për vendin tonë.

Ndërsa për ata që do ta kalojnë fundjavën në bregdet, era do të jetë pak problematike pasi në mesditë deri në orët e pasdites (dhe kryesisht ditën e diel) do të fryjë me shpejtësi mesatare 3-7m/s dhe me rrahje deri në 10m/s dhe drejtim kryesor nga kuadrati i veriut.

Gjithashtu, orët e vona të mbrëmjes të ditës së sotme dhe orët e para të mëngjesit të ditës së shtunë vendi ynë do të përjetojë fenomenin që quhet “netë tropikale” me temperatura minimale që nuk zbresin posht 26-28 grad (zonat e ulta dhe bregdeti). Temperatura këto që mund të jenë shqetësuese për një kategori vulnerabël të njerëzve.