I dyshuari Mikea Zaka e pranoi autorësinë e vrasjes pas ndalimit dhe plagosjes së tre të tjerëve. 23-vjeçari u vetëdorëzua në polici, në prani të avokatit të tij, ndërsa rrëfeu ngjarjen, që ndodhi në Frosinone. Në dëshminë e dhënë, i riu u shpreh se qëlloi për t’u vetëmbrojtur, pasi i pari që kishin qëlluar me armë ndaj tij ishte viktima, Kasem Kasmi.

Ndërkohë, arma e krimit përfundoi në një landfill, por që nuk është gjetur ende. 23-vjeçari prej disa vitesh ka qenë pjesë e një bande të trafikut të drogës në Ciociaria. I riu ka një djalë dy vjeçar me një grua nga Frosinone, shkruajnë mediat italiane. Dy shqiptarët e tjerë që ndodheshin me të, janë shpallur në kërkim.

Pavarësisht raportimeve paraprake se sherri ndodhi për një grua, Prokuroria nuk po e heton këtë pistë. Hipoteza e hetuesve është se pas të shtënave ka një grindje që lidhet me kontrollin e shpërndarjes së drogës ose prostitucionit. Viktima Kasëm Kasmi njihej në zonë me pseudonimin ‘Carletto’.

Trupi i tij do ti nënshtrohet autopsisë përpara se ti dorëzohet familjarëve ndërsa ende nuk është gjetur pistoleta me të cilën është kryer krimi.

Jeta me shampanjë e jaht e vëllezërve nga Miloti

Vëllezërit Kasmi janë me origjinë nga Miloti, ku në të kaluarën policia shqiptare zbuloi plantacione të shumta marijuanë. Dy vëllezërit, Kasëmi dhe Ervin kishin vite që jetonin në Itali. Ishin vendosur në Frosinone, por vazhdimisht lëviznin në: Piza, Romë dhe Firence. Një shishe shampanjë mes këmbëve, duke pozuar para një Audi blu me shkëlqim ose në bordin e një jahti. Në shkurt kishte shkuar në Piza. Në Romë shkonte shpesh.

Kasëm Kasmi, viktima e vrasjes në lokalin Shaka në Frosinone, e donte jetën e mirë dhe nuk e fshehte atë nga rrjetet sociale. Në një nga fotot e shumta të shpërndara nga familja e tij, i riu është ulur në një karrige buzë pishinës dhe shikon drejt e në kamerë.

“Na ke marrë shpirtin, biri im, Zoti të bekoftë. Do të na mungosh shumë vëlla”, thuhet në mesazhin, i cili shumë shpejt u bë viral në llogaritë e komunitetit shqiptar që vajtuan vdekjen e të riut.

Kasmi dhe Zaka sherri për një vajzë

Kasëmi, i cili njihej në komunitet dhe si Carletto kishte pasur mosmarrëveshje me autorin e arrestuar si vrasësin e tij Mikea Zaka në të kaluarën, raporton “La Repubblica”. Të dy kishin debatuar për një vajzë, të paktën kështu pretendon Zaka në polici. Gruaja, e cila ishte me Kasem Kasmin, ishte fejuar me Zakën dhe këtu lindën mosmarrëveshjet. Hetuesit, megjithatë, nuk e besojnë plotësisht motivin sentimental pas të shtënave.

“Hetimet nuk kanë përfunduar kurrsesi – tha prokurori publik i Frosinone, Antonio Guerriero – por janë vetëm në fillim të rindërtimit të asaj që fshihet pas kësaj ngjarjeje shumë të rëndë të përgjakshme që përfshin dy grupe kriminale”.

Bandat rivale
Nga njëra anë do të ishte banda e Carlettos dhe vëllai i tij Ervin. Nga ana tjetër, ai i Zekës. Sipas hetuesve, pas grindjes mes dy grupeve ka interesa të lidhura me kontrollin e trafikut të drogës apo prostitucionit në zonë. Zaka, i cili jeton në Casermone, nuk ka precedentë penalë, por kur u ndalua një herë iu gjetën 20 mijë euro cash që dyshohet se ishin paratë e bandës dhe ai luante rolin e arkëtarit.

Vrasja ndodhi mbrëmjen e 9 marsit 2024 rreth orës 19:30 në qendër të Frosinones në Itali. Mikea Zeka ishte në Shake Bar në rrugën ‘Aldo Moro’ me miqtë e tij Guliano D., dhe Elia D., të gjithë shqiptarë. Mikea një emër i njohur për policinë ndërsa vitin e fundit ishte ndaluar dy herë për drogë. Në një rast policia i kishte gjetur 20 mijë euro dhe cash dhe dyshohet se ai ishte arkëtari i një bande.

Në lokalin plot me njerëz hyjnë dhe 4 shqiptarë të tjerë, Ervin, vëllai i tij Kasëm Kasmi dhe dy shokë. Mes tyre nis debati. Mikea nxjerr një pistoletë të kalibrit 22 dhe qëllon gjashtë të shtëna, të gjitha në shenjë. Njëri plumb godet Kasemin në qafë. Goditja është fatale për 27 vjeçarin i cili vdes pas 20 minutash në duart e mjekëve të urgjencës. Përpjekjet për ta ringjallur nga mjekët e urgjencës zgjatën disa minuta me një masazhe kardiake por nuk patën sukses. Trupi u tërhoq nga vendi i ngjarjes pas më shumë se gjashtë orësh: ndërsa hetimet mjeko-ligjore vazhduan deri në orët e vona të natës.

Tre të tjerët plagosen: njëri përfundon në spitalin Umberto i dhe gjëndja e tij shëndetësore është shumë i rëndë, një në San Camillo, i fundit në Spaziani në Frosinone ku i nënshtrohet operacionit pasi plumbi i ka thyer këmbën. Mikea Zaka u dorëzua pas disa orësh në kuesturë ku u paraqit me avokatin e tij. /ZOOM.AL/