“Christ Mocked” nga piktori fiorentin Cimabue u gjet në shtëpinë e një gruaje të moshuar në qytetin Compiegne në vitin 2019.

Ajo kishte mbajtur veprën e rrallë të artit, që mendonte se ishte një ikonë fetare greke, në kuzhinën e saj.

Piktura, e cila daton nga viti 1280, doli në ankand në tetor 2019 dhe pothuajse u shit për 24.2 milionë euro.

Por qeveria franceze më pas ndërhyri për të bllokuar eksportin e saj, duke i caktuar pikturës statusin e “thesarit kombëtar”.

Piktura e vogël u bllokua për 30 muaj, kohë gjatë së cilës qeveria mblodhi fondet për ta blerë atë për kombin.

Tani, ministrja franceze e kulturës, Rima Abdul Malak, dhe presidenti dhe drejtori i Muzeut të Luvrit, Laurence des Cars, kanë njoftuar se piktura është pjesë e koleksionit të muzeut.

Vetëm rreth 15 nga veprat e Cimabue janë të njohura, kjo është arsyeja pse piktura “është një thesar kombëtar me rëndësi të madhe”, i shpreh ministrja.

Ajo do t’i bashkohet pikturës shumë më të madhe të Cimabue “Maestà” në koleksionin e Luvrit dhe të dyja veprat do të jenë pjesë e një ekspozite në pranverën e vitit 2025, sipas ministrisë.

Cimabue është pseudonimi i artistit Cenni di Pepo, i lindur në Firence rreth vitit 1240. Ai njihet se ka qenë zbuluesi dhe mjeshtri i Giotto-s, i konsideruar gjerësisht si një nga artistët më të mëdhenj të epokës së para Rilindjes.