Një breshëri plumbash kallashnikovi, plot 100 të tillë, të derdhur lumë në oborrin e shtëpisë së 46-vjeçarit Ylli Brahimi, i morën jetën mbrëmë (22 korrik 2022) Klisman Preçit, i cili mbeti i pajetë rrugës për në spital. Ylli Brahimi ndodhet në gjendje të rëndë në Spitalin e Traumës.

Pamje nga atentati i mbrëmshëm në Milot

Ata ishin në një makinë të blinduar me targa të Shkupit, xhami i përparmë i së cilës nuk u rezistoi gjatë plumbave të dy kallashnikovëve që u derdhën nga vrasësit. Burime për mediat thonë se makina në fjalë u pa në varrimin e Brilant Martinajt, viktimë e një tjetër atentati të pak ditëve më parë.

Dy janë personat që dyshohet se qëlluan, ndërsa një i tretë i priste me makinën që u gjet e djegur në fshatin Gramëz, një fshat i Fushë Krujës, disa kilometra larg vendit të ngjarjes.

Nuk është e qartë se cili ishte në shenjestër të atentatit. Si viktima ashtu edhe i plagosuri u kanë shpëtuar dy atentateve të tjera, në dy situata të ndryshme.

ATENTATET E MËPARSHME

Në janar të vitit 2021, Ylli Brahimi mbeti i plagosur në këmbë, teksa u qëllua nga dy persona që udhëtonin me motor, në qendër të Laçit. Ai ishte i shoqëruar nga disa miq. Pamjet e kamerave të sigurisë së një biznesi, të publikuara në Zoom.al, tregojnë se si ai arrin t’u shpëtojë plumbave.

 

View this post on Instagram

 

A post shared by zoom.al (@zoom.al)

Arsyet se përse po tentohet të vritet me çdo kusht mbeten të paqarta zyrtarisht për policinë. 46-vjeçari Ylli Brahimi është marrë në pyetje për vrasjen e ish-efektivit të policisë, Xhelal Reçi, më 1 nëntor të vitit 2021.

Në fotografi, i plagosuri Ylli Brahimi

Nëse atentati i djeshëm ka lidhje me vrasjen e ish-policit Reçi, mbetet mister fakti se kush e donte atë të vdekur në atentatin e janarit 2021. Ai ishte i proceduar më parë edhe për trafik droge.

Më 14 maj të këtij viti shenjestër e një atentati do të mbetej Klisman Preçi. Ai ishte duke udhëtuar më një automjet me tip ML, së bashku me kushëririn e tij Blerim Preçi.

Viktima Klisman Preçi

Klismani, 28 vjeç, mbeti i plagosur. Policia nuk ka ende të dhëna se përse u tentua të eliminohej në maj dhe po kështu as se kush e vrau atë dje në Laç.

Vrasja e ndodhur në derën e shtëpisë së Ylli Brahimit, teksa po ktheheshin nga një kafe me një makinën e blindur vjen vetëm 6 ditë pas atentatit me 3 viktima në mbikalimin e Fushë Krujës.

VRASJA E FUSHË KRUJËS

Në rrugën Fushë Krujë-Thumanë, breshëria e kallashnikovëve do të shkaktonte tre viktima: Brilant Martinajn, 23 vjeç; Dikler Vatën, 30 vjeç dhe Besmir Hoxhën, 34 vjeç.

Në foto: Tre viktimat e atentatit të Fushë-Krujës

Martinaj dhe Hoxha do të përfundonin të shkrumbuar. Pasi i vranë, atentatorët i vunë flakën makinës së tyre. Dikler Vata kishte dalë prej saj dhe u ekzekutua në tentativë për të ikur.

Bilanci ësht alarmant, si nga numri i viktimave ashtu edhe nga natyra e ashpër kriminale dhe mafioze.

LIDHJE MES DY ATENTATEVE?

Policia dyshon se mes dy atentateve mund të ketë lidhje. Në media, gazetarë të ndryshëm thonë se është e njëjta dorë që kreu ekzekutimet. Sipas tyre, bëhet fjalë për një grup profesionishtësh që po i kryejnë ekzekutimet kundrejt pagesave të majme.

Vetëm për atentatin e Fushë – Krujës u dogjën dy makina të vrasësve me pagesë dhe një tjetër u zhduk.

Aludimet në media janë për një përplasje mes dy grupeve të fuqishme kriminale, njëri që vepron në Fushë Krujë – Laç dhe tjetri në Durrës.

Zanafilla e kësaj përplasje të përgjakshme duket se është vrasja e ish -policit Xhelal Reçi, pas një plagosje që bëri djali i tij.

Në foto: Xhelal Reçi

Konflikti mes tyre duket se është ndezur më shumë pas publikimit të dëshmisë së vrasësit me pagesë, Nuredin Dumani, i cili ka përmendur disa emra të njohur të botës së krimit që i kishin premtuar atij shuma marramendëse parash për kryer vrasjen e rivalëve.

AKSI I VRASJEVE MAFIOZE

Aksi Fushë Krujë – Laç – Milot – Lezhë është i njohur për ngjarje të vazhdueshme kriminale. Përplasje bandash, grabitje biznesmenësh, djegie makinash të përdorura në atentate të kryera edhe në qytete të tjera.

Aty u zhduk edhe motori i vrasësve të bankierit Artan Santo. Nikla konsiderohet si kryeqendra e aktivitetit kriminal, ku sipas të dhënave mediatike mund të gjesh kollaj vrasës me pagesë.

Policia duket e pafuqishme. Aksionet e saj sporadike nuk kanë sjellë ndonjë rezultat. Ndërsa puna e policisë kriminale duket sa e kompromentuar aq edhe e padobishme. Vrasësit e mbrëshmshëm janë të lirë, ashtu sikurse edhe ata të atentatit me 3 viktima në mbikalimin e Fushë – Krujës.

Gjasat janë që grupet rivale po përgatisin të tjera plane për të eliminuar njëri – tjetrin, ndërsa policisë i ka mbetur vetëm regjistrimi dhe numërimi i të vrarëve për statistikë. /Zoom.al